تارىخنىڭ تەرەققىياتىدا دائىم ئالاھىدە پەيتلەر بولىدۇ، بۇ پەيتلەر ئابىدە خاراكتېرلىك ئەھمىيەتكە ئىگە بولۇپ، دۆلەت، مىللەت، دۇنيا ئۈچۈن چوڭقۇر تەسىر كۆرسىتىدۇ. 2012 – يىلى 29 – نويابىر دەل مۇشۇنداق مۇھىم پەيت بولدى. باش شۇجى شى جىنپىڭ ‹‹گۈللىنىش يولى›› ناملىق كۆرگەزمىنى كۆرگەندىن كېيىن، ‹‹جۇڭگو ئارزۇسى››نىڭ چوڭقۇر مەناسىنى شەرھلەپ، جۇڭگوچە سوتسىيالىزم يولىدا مېڭىشتىكى قەتئىي ئىرادىسى ۋە جۇڭخۇا مىللەتلىرىنىڭ ئۇلۇغ گۈللىنىشىنى ئىشقا ئاشۇرۇشقا بولغان قەتئىي ئىشەنچىسىنى ئىپادىلىدى.

ئىككى يىلدىن بۇيان ‹‹جۇڭگو ئارزۇسى›› جۇڭگو خەلقىنى تىرىشىپ كۈرەش قىلىشقا رىغبەتلەندۈرۈپلا قالماي، يەنە دۇنياغا تەسىر كۆرسىتىپ، جۇڭگونىڭ ‹‹يېڭى ئىسىم كارتىسى››غا ئايلاندى.
باش شۇجى شى جىنپىڭ ‹‹جۇڭگو ئارزۇسى››نى تەسىرلىك ھېكايىلەر، چىن سەمىمىيىتى ئارقىلىق دۇنيانى تەسىرلەندۈردى. ئىككى يىلدىن بۇيان، ئۇ خەلقئارا سەھنىلەردە كەلگۈسىنى كۆزدە تۇتۇپ، چۈشىنىشلىك ھەم يېقىملىق سۆزلىرى بىلەن ‹‹جۇڭگو ئارزۇسى››نىڭ ئىچكى مەنىسى ۋە دۇنياۋى ئەھمىيىتىنى شەرھلىدى، كەڭ قورساق ۋە ئوچۇق – ئاشكارا بولۇش پوزىتسىيەسىدە جۇڭگونى دۇنياغا تونۇتتى. شى جىنپىڭ پارىژدا جۇڭگونى ‹‹تىنچ، يېقىملىق، مەدەنىي شىر››غا ئوخشاتتى؛ ئۇ بېرلىندا چىن سەمىمىيىتى بىلەن ئاۋامغا جۇڭگونىڭ قورقۇنچلۇق ‹‹موفېستو›› ئەمەسلىكىنى ئېيتتى.

جامائەتچىلىك بىردەك مۇنداق قارىدى: جۇڭگونىڭ نۇرغۇن ئىستراتېگىيەلىك تەسەۋۋۇرلىرى دۇنيا ئىقتىسادىنىڭ يەنىمۇ ئېچىۋېتىلىشىگە، ئۆزئارا باغلىنىشىغا، دۇنيا ئىقتىسادىنى بىرلەشتۈرۈش يېڭى ئەندىزىسىنى بەرپا قىلىشقا، دۇنيانىڭ سىياسىي، ئىقتىسادىي تەرتىپىنىڭ ھەمكارلىشىش، تەڭ پايدا ئېلىش يېڭى دەۋرىگە قەدەم قويۇشىغا پايدىلىق.

كونكرېت ھەمكارلىق تۈرلىرى ھەممە جايدا ئارقا – ئارقىدىن يولغا قويۇلۇپ، ‹‹جۇڭگو ئارزۇسى›› دۇنيانىڭ تەرەققىياتى ۋە گۈللىنىشىنى غايەت زور ھەرىكەتلەندۈرگۈچ كۈچكە ئىگە قىلدى. چۇڭچىڭ – شىنجاڭ – ياۋروپا خەلقئارا تۆمۈريولى، ۋۇخەن – شىنجاڭ – ياۋروپا خەلقئارا تۆمۈريولى، جېڭجۇ – شىنجاڭ – ياۋروپا خەلقئارا تۆمۈريولى، يىۋۇ – شىنجاڭ – ياۋروپا خەلقئارا تۆمۈريولى قاتارلىق تۆمۈريوللاردا كەينى – كەينىدىن قاتناش باشلىنىپ، ئاسىيا – ياۋروپا چوڭ قۇرۇقلۇقىنى كېسىپ ئۆتۈش سەپىرى قولايلىق بولۇپ قالدى؛ كېسەك ئالتۇن دۆلەتلىرى بانكىسى، ئاسىيا مەبلەغ سېلىش بانكىسى قاتارلىق ئېچىش تۈرىدىكى چوڭ پۇل مۇئامىلە ئاپپاراتلىرىنىڭ قۇرۇلغانلىقىدىن تارتىپ يىپەك يولى فوندى قۇرۇشقىچە، جۇڭگو دۇنيانىڭ تەرەققىياتى ۋە گۈللىنىشىنى مەبلەغ بىلەن تەمىنلىدى...

بۈگۈنكى كۈندە جۇڭگو ئىقتىسادىنىڭ ئېشىشىنىڭ دۇنيا ئىقتىسادىنىڭ ئېشىشىغا قوشقان تۆھپىسى %30 كە يېقىنلاشتى. جۇڭگونىڭ تەرەققىيات ۋە ئىسلاھات نەتىجىلىرىدىن قانداق تەڭ بەھرىمەن بولۇش كېرەك؟ دېگەن مەسىلە دۇنيا مىقياسىدا ئويلىشىدىغان مۇھىم مەسىلىگە ئايلاندى. كەلگۈسى بەش يىلدا جۇڭگو ئىمپورت قىلىدىغان تاۋارلار 10 تىرىليون دوللاردىن ئېشىشى، جۇڭگونىڭ سىرتقا سالىدىغان مەبلىغى 500 مىليارد دوللاردىن ئېشىشى، چەت ئەلگە ساياھەتكە بارىدىغان جۇڭگولۇقلار 500 مىليون ئادەم(قېتىم)دىن ئېشىشى مۇمكىن. جۇڭگو ئېچىۋېتىش پوزىتسىيەسىدە ‹‹كۆپچىلىكنىڭ جۇڭگونىڭ تەرەققىيات تېز پويىزىغا ئولتۇرۇشىنى قارشى ئالىدۇ››.

‹‹جۇڭگو ئارزۇسى›› دۇنياغا بارغانسېرى چوڭ تەسىر كۆرسەتمەكتە. شۇنىڭغا ئىشەنچىمىز كامىلكى، ‹‹جۇڭگو ئارزۇسى››نى روياپقا چىقىرىش يولىدا، جۇڭگونىڭ خەلقئارادىكى تەسىرى تېخىمۇ كۈچىيىپ، ئىناۋىتى تېخىمۇ يۇقىرى كۆتۈرۈلۈپ، ‹‹جۇڭگو ئارزۇسى›› ‹‹دۇنيا ئارزۇسى›› بىلەن تەڭ روياپقا چىقىرىلىدۇ، جۇڭگو دۇنيا بىلەن بىرلىكتە تېخىمۇ گۈزەل كەلگۈسى يارىتىدۇ.