قانۇنچىلىق كەچلىك گېزىتىنىڭ خەۋەر قىلىشىچە، تاماكا چېكىشنى چەكلەش پىدائىيسى تاماكا چەككۈچىنى نەسىھەت قىلىپ توسقاندا، تاماكا چەككۈچى ئۇيالغىنىدىن ئاچچىقلىنىپ پىدائىينى ئۇرۇپ بارمىقىنى سۇندۇرۇۋەتكەن. مۇشۇ ھەپتىنىڭ ئۈچىنچى كۈنى، ئىككى نەپەر پىدائىي بايلىق  مەركىزىدە قانۇنسىز تاماكا چېكىش قىلمىشىنى نەسىھەت قىلىپ توسقاندا، تاماكا چەككۈچى تەرپىدىن ئۇرۇپ يارىلاندۇرۇلغان، ھەمدە ئىچىدىكى بىر پىدائىينىڭ ئوڭ قولىنىڭ چىمچىلاق بارمىقى سۇنغان. بېيجىڭ تاماكا چېكىشنى چەكلەش جەمئىيىتى چۈشتىن بۇرۇن بۇ قىلمىشنى قاتتىق ئەيىبلىگەن ۋە ئادەم ئۇرغۇچىنى تېزدىن قانۇن بويىچە بىر تەرەپ قىلىشقا مۇراجىئەت قىلغان.

      بۈگۈن چۈشتىن بۇرۇن، قانۇنچىلىق كەچلىك گېزىتى مۇخبىرىنىڭ، بېيجىڭ تاماكا چېكىشنى چەكلەش جەمئىيىتىدىن ئىگىلىشىچە، مۇشۇ ھەپتىنىڭ 3-كۈنى پىدائىي لى ئەپەندىم بىلەن يەنە بىر پىدائىي بايلىق مەركىزىدىكى بىر ئۆينىڭ ئىچىدە تاماكا چەككەن كىشىنى نەسىھەت قىلىپ توسقاندا، ئۇيالغىنىدىن ئاچچىقلانغان تاماكا چەككۈچى، پىدائىينى ئۇرۇپ قولىنى يارلاندۇرۇپ، قېچىپ كەتكەن. كەينىدىن ئىككى نەپەر پىدائىي چاۋياڭ دوختۇرخانىسىدا كېسەل كۆرسەتكەن، ھەمدە دوختۇرخانىنىڭ دىئاگنوز ئىسپاتىغا لى ئەپەندىمنىڭ ئوڭ قولىنىڭ چىمچىلاق بارمىقىنىڭ سۇنغانلىقى يېزىلغان.  

        نۆۋەتتە، ئادەمنى يارىلاندۇرغان كىشى تېخى تۇتۇلمىغان. ساقچى تەرەپ ئادەمنى يارىلاندۇرغۇچىنىڭ شىركىتىگە بېرىپ سۈرۈشتە قىلغاندا، شىركەت ئۇ كىشىنىڭ كىملىك ئۇچۇرى بىلەن  تەمىنلىگەن، نەتىجىدە تەمىنلىگەن كىملىك ئۇچۇرىنىڭ يالغان ئىكەنلىكى بايقالغان.نۆۋەتتە، ئادەمنى يارىلاندۇرغان كىشى خىزمەت قىلىدىغان شىركەت، پىدائىيغا تۆلەم تۆلىگەن. بېيجىڭ تاماكا چېكىشنى چەكلەش جەمئىيىتى بۈگۈن يارىلانغان پىدائىيدىن ھال سورىغان. شەھەرلىك سەھىيە نازارەت باشقارمىسى، تاماكىنى چەكلەش پىدائىيلىرىنى قوللايدىغانلىقىنى، ھەمدە قانۇنسىز تاماكا چىكىش قىلمىشىغا قاتتىق زەربە بېرىش كېرەكلىكىنى بىلدۈرگەن.

        2015-يىلى 6-ئاينىڭ 1-كۈنىدىن باشلاپ بېيجىڭ تارىختىكى ئەڭ قاتتىق تاماكا چېكىشنى چەكلەش بۇيرۇقىنى ئىجرا قىلغاندىن باشلاپ، تاماكا چېكىشنى چەكلەش بېيجىڭ شەھىرىنىڭ نورمال ھالەتتىكى خىزمىتىگە ئايلانغان. مۇشۇ مۇناسىۋەتتە، بېيجىڭ شەھىرى «ھەر ھەپتىنىڭ ئۈچىنچى كۈنى، تاماكىنى چەكلەش» ھەرىكىتىنى ئىشقا سالغان، ھەمدە ھەر بىر پىدائىينىڭ ھەپتىنىڭ 3-كۈنى، ئۈچ قېتىم تاماكا چېكىش قىلمىشىنى چەكلىشى، ئۈچ دانە تەشۋىقات بويۇمى تارقىتىشى، ئۈچ ئاممىۋىي سورۇننى چارلىشى بەلگىلەنگەن.

     ئىگىلىنىشىچە، تاماكا چېكىشنى چەكلەش بۇيرۇقى يولغا قويۇلغاندىن باشلاپ، ئىشخانا بىناسىنىڭ تاماكا چېكىشنى چەكلەش خىزمىتى ئىزچىل مۇھىم ۋە قېيىن نۇقتا بولۇپ كەلگەن. بولۇپمۇ قىش كىرىپ ھاۋا سوۋۇغاندىن باشلاپ، كىشىلەرنىڭ ئىشخانا ئىچىدىكى پائالىيىتى مۇئەييەن دەرىجىدە كۆپەيگەن، ھەمدە تاماكا خۇمارى بارلار ئىشخانىدا تاماكا چېكىشكە باشلىغان، كارىدور بىلەن ھاجەتخانا ئۇلارنىڭ تاماكا چېكىدىغان ئاساسلىق ئورنىغا ئايلانغان. مۇشۇ مۇناسىۋەتتە، بېيجىڭ تاماكا چېكىشنى چەكلەش جەمئىيىتى قاۋاقخانا، تورخانا، يېمەك-ئىچمەك ۋە كۆڭۈل ئېچىش كەسپى بىلەن شۇغۇللىنىدىغانلارغا  قارىتا مەخسۇس ھەرىكەتنى يولغا قويغان.