ئەنگىلىيە «كۈندىلىك پوچتا گېزىتى» نىڭ 2-ئاينىڭ 2-كۈنىدىكى دوكلاتىغا قارىغاندا، دۇنيادىكى ئەڭ سېمىز ئەر ئاندرەس مورېنو كۈنى يۈرەك كېسىلى قوزغىلىپ 38 يېشىدا ئالەمدىن ئۆتكەن. ئاندرەس ئالەمدىن ئۆتۈشنىڭ ئۈچ كۈن ئالدىدا ھەر كۈنى ئەڭ ئاز دېگەندە ئالتە بوتۇلكا ئېنىرگىيە ئىچىملىكى ئىچكەن. بۇ نورمال كىشىنىڭ ئۈچ كۈندە 42 بوتۇلكا كوكاكولا ئىچكىنىگە باراۋەر ئىكەن.

         ئاندرەس مېكسىكىلىق بولۇپ، ھايات ۋاقتىدىكى بەدەن ئېغىرلىقى 444 كىلوگرامغا يەتكەن. ئۇ ھەقىقەتەن ئىسمى-جىسمىغا لايىق دۇنيادىكى ئەڭ سېمىز ئەر بولغان. ئاندرەس تۇغۇلغان چېغىدىلا شۇنداق سېمىز تۇغۇلغان بولۇپ، يېشىنىڭ چوڭىيىشىغا ئەگىشىپ بەدەن ئېغىرلىقىمۇ ئېشىپ ماڭغان. كۆپ يىللاردىن بۇيان كارۋاتتىن چۈشەلمەي ئاز بولمىغان كېسەللەرنى تېپىۋالغان. ئايالىمۇ مۇشۇ سەۋەبتىن ئۇنىڭدىن ئايرىلىپ كېتىپ قالغان.

        ئاندرەسنىڭ دوختۇرىنىڭ ئاشكارلىشىچە، ئۇ ئالەمدىن ئۆتۈشتىن ئىككى ئاي بۇرۇن ئورۇقلاش ئوپراتسىيىسى قىلدۇرغان. بۇ ئوپراتسىيىدە ئۇنىڭ ئاشقازان قىسمىنىڭ تۆتتىن ئۈچ قىسمى كېسىۋېتىلگەن. ئۇنىڭ ئېشىپ قالغان ئاشقازىنىنى نەيچە شەكىلگە كەلتۈرۈپ قويغان بولۇپ، بۇنداق قىلغاندا ئۇنىڭ كۆپ يېمەكلىك يېيىشىگە توسقۇنلۇق قىلغىلى بولىدىكەن. ئوپراتسىيەدىن كېيىن، ئۇ ئاستا-ئاستا يول يۈرەلەيدىغان بولغان، بەدەن ئېغىرلىقىمۇ تۆۋەنلىگەن. بۇنداق چاغدا ئاندرەسنىڭ بۇنچە كۆپ ئېنىرگىيە ئىچىملىكىنى ئىچىشى ناھايىتى خەتەرلىك بولۇپ، يۈرەك سوقۇشىنىڭ قالايمىقانلىشىشىنى كەلتۈرۈپ چىقىرىدىكەن، ھەتتا يۈرەك كېسىلىنى قوزغاپ ئۆلۈمنى كەلتۈرۈپ چىقىرىشى مۇمكىنكەن.