1993-يىلى شىنجاڭدىكى بىر تۈرمىدىن قاچقان ليۇ جياڭخۇا، 2015-يىلى 3- ئايدا شىنجاڭ قۇمۇل بوز يەر ئۆزلەشتۈرۈش رايونى جامائەت خەۋپسىزلىكى ئىدارىسى جىنايى ئىشلار رازۋېدكا چوڭ ئەترىتى تەرپىدىن تۇتۇپ كېلىنگەن. پېڭبەي خەۋىرىنىڭ ئىگىلىشىچە، ليۇ جياڭخۇانىڭ قېچىش دېلوسىغا 1-ئاينىڭ 11-كۈنى سوراق قىلىنىپ ھۆكۈم ئېلان قىلىنغان بولۇپ، ليۇ جياڭخۇا قېچىش جىنايىتى بىلەن شىنجاڭ ئىشلەپچىقىرىش قۇرۇلۇش بىڭتۈەننى بوز يەر ئۆزلەشتۈرۈش رايونلۇق خەلق سوت مەھكىمىسى تەرپىدىن مۇددەتلىك ئۈچ يىللىق قاماق جازاسىغا ھۆكۈم قىلىنغان، ھەمدە ئەسلىدىكى يۈرگۈزىلىدىغان جازا مۇددىتى بىلەن قوشۇپ، مۇددەتلىك يەتتە يىللىق قاماق جازاسىغا ھۆكۈم قىلىشنى قارار قىلغان.

      بۇ دېلونىڭ ھۆكۈمنامىسىدە كۆرسىتىلىشچە، 55 ياشلىق ليۇ جياڭخۇا 1992-يىلى ئادەتلەنگەن ئوغرىلىق جىنايىتى بىلەن جازاغا ھۆكۈم قىلىنغان. 1993-يىلى 10-ئاينىڭ 7-كۈنى سەھەر سائەت 3-4 ئەتراپىدا، ليۇ جياڭخۇا بىلەن يەنە بىر گۇماندار گاۋ يەن ( ئۆلگەن ) تۈرمە سىرتىدىكى بىر سېختا قۇيمىچىلىق قىلىپ ئەمگەك قىلىۋاتقاندا، ساقچىلار قارىمىغان پۇرسەتتىن پايدىلىنىپ قېچىپ كەتكەن. شۇنىڭدىن كېيىن، ليۇ جياڭخۇا ئىزچىل قۇمۇل، تۇرپان، فۇكاڭ، سانجى قاتارلىق يەرلەردە ئىشلەمچىلىك قىلغان. 1999-يىلى 6-ئايدا، شىنجاڭ بىڭتۈەن 13-دىۋىزىيە تۈرمە باشقۇرۇش ئىدارىسى ئۇنى قېچىپ يۈرىۋاتقانلار قاتارى ئىچىدە توردا ئىز قوغلاپ تۇتۇشقا باشلىغان. 2015-يىلى 3-ئايدا، ليۇ جياڭخۇا قۇمۇل بوز يەر ئۆزلەشتۈرۈش رايونى جامائەت خەۋپسىزلىكى ئىدارىسى جىنايى ئىشلار رازۋېدكا چوڭ ئەترىتى تەرپىدىن تۇتۇپ كېلىنگەن.

        2015-يىلى 9-ئاينىڭ 16-كۈنى، بوز يەر ئۆزلەشتۈرۈش رايونلۇق خەلق تەپتىش مەھكىمىسى قېچىش جىنايىتى بىلەن ليۇ جياڭخۇاغا قارىتا، سوت مەھكىمىسىگە ئەيىبلەش ئەرزى سۇنغان.

      سوت مەھكىمىسىنىڭ قارىشىچە، ليۇ جياڭخۇا جازا ئۆتىگەن مەزگىلدە تۆۋە قىلىشنى خالىماي، سېختا ئەمگەك قىلىشتىن پايدىلىنىپ قېچىپ كەتكەن، ھەمدە قىلمىشى قېچىش جىنايىتىنى شەكىللەندۈرگەن. جاۋابكارنىڭ تۇتۇپ كېلىنگەندىن كېيىن جىنايىتىنى ئۆزلۈكىدىن تونۇشى، گۇناھىنى ئەينەن بايان قىلىشىنى نەزەردە تۇتۇپ، قانۇن بويىچە يېنىكلىتىپ جازا بېرىلگەن.