خەلقئارا لىنىيەسى خەۋىرى: ياپونىيە «سۈبھى خەۋەرلىرى»نىڭ 27-يانۋاردىكى خەۋىرىگە قارىغاندا، ياپونىيە يۇمشاق دېتال بانكا گۇرۇھى 27-يانۋار بۇ يىل ئىچىدە «Pepper» ناملىق ئادەمسىمان ماشىنا ئادەمنى چەت ئەللەرگە ساتىدىغانلىقىنى ئېلان قىلغان. مۆلچەرلىنىشىچە ئاساسلىق زاكازلار كارخانىلاردىن كېلىدىغان بولۇپ، ياۋروپا، ئامېرىكا، ئاسىيا قاتارلىقلار رايونلاردىكى دۆلەتلەرگە ئېكسپورت قىلىنىدىكەن.

     بۇلتۇر يازدا، بۇ ماشىنا ئادەم ياپونىيەنىڭ دۆلەت ئىچىدە سېتىلىشقا باشلاپ، كەڭ كۆلەمدە سېتىۋېلىش قىزغىنلىقى كۆتۈرۈلگەن. يۇمشاق دېتال بانكا گۇروھى قاتارلىق 500 كارخانا بۇ ماشىنا ئادەمدىن كىرگۈزۈپ، دۇكاندا مەھسۇلات تونۇشتۇرۇش قاتارلىقلارغا ئىشلەتكەن.

  ئىگىلىنىشىچە، ياپونىيەدە دۆلەت ئىچىدە يۈزلەنگەن مەھسۇلاتلارغا ئوخشاش، چەت ئەللەرگە سېتىلغان مەھسۇلاتلارنى «خۇڭخەي» شىركىتىنىڭ جۇڭگودىكى زاۋۇتى ھاۋالە بىلەن ئىشلەپچىقىرىدىكەن.

  يۇمشاق دېتال بانكا گۇرۇھى بۇ ماشىنا ئادەمنىڭ ئىنسانلارنىڭ چىراي ئىپادىسى ۋە ئاۋازىنىڭ ئاجىز-كۈچلۈكلۈكىنى تەھلىل قىلىش، ھېسسىيات پەرقلەندۈرۈش، ئىنسانلار بىلەن پاراڭلىشىش قاتارلىقلارنى قىلالايدىغانلىقىنى بىلدۈرگەن. يۇمشاق دېتال بانكا گۇرۇھىنىڭ باش مۇدىرى ماسايوشى سون بۇ ماشىنا ئادەمنىڭ دۇنيادىكى تۇنجى ھېسسىياتچان ماشىنا ئادەم ئىكەنلىكىنى بىلدۈرگەن.

  بۇنىڭدىن ئىلگىىرىكى خەۋەرلەردە دېيىلىشىچە، «Pepper» ناملىق ئادەمسىمان ماشىنا ئادەمنىڭ قىسمەن گەۋدىسىنىڭ باھاسىنىڭ 213 مىڭ 840 ياپونىيە يىنى (11200 يۈەن خەلق پۇلى) بولۇپ، قوللىنشىچان يۇمشاق دېتالى ۋە كاشىلا مۇلازىمىتىنى ئىشلىتىشكە يەنە ھەق تۆلىنىدىغان بولۇپ، ئۈچ يىلدا يەنە 956 مىڭ 448 ياپونىيە يىنى (50 مىڭ يۈەن خەلق پۇلى) ھەق تۆلىنىدىكەن.

  بۇنىڭدىن باشقا، 2014-يىلى 6-ئايدا، ياپونىيە يۇمشاق دېتال بانكا گۇرۇھى، «ئەلى بابا» گۇرۇھى ۋە تەيۋەن «خۇڭخەي» نازۇك سانائەت شىركىتى «Pepper» ناملىق ئادەمسىمان ماشىنا ئادەمنى بىرلىكتە ئىشلەپچىقىرىش ھەققىدە توختام ئىمزالىغان. كەلگۈسىدە «ئەلى بابا» گۇرۇھى قارىمىقىدىكى تور بېكەتلەردىن بۇ ماشىنا ئادەمنى سېتىۋالغىلى بولىدىكەن.