Apple Pay كېلەر يىلنىڭ بېشىدا جۇڭگوغا كىرىدۇ، جۇڭگودىكى 15 خىل بانكا قوللايدۇ. دېمەك، بۇندىن كېيىن iPhone نى بانكا بىرلەشمىسىنىڭ POS ئاپپاراتىغا ئېلىپ كېلىپ، بارماقنى Touch ID ئۈسكۈنىسىگە قويۇش ئارقىلىق ھەق تاپشۇرۇپ مال سېتىۋالغىلى بولىدۇ. ئەگەر Apple Watch بولسا، يان تەرىپىدىكى كۇنۇپكىنى ئىككى قېتىم باسقاندىن كېيىن، سائەت يۈزىنى كارتا ئوقۇش ئۈسكۈنىسىگە يېقىن ئېلىپ كېلىش ئارقىلىق پۇل تاپشۇرغىلى بولىدۇ. ئەلۋەتتە، بۇ مەشغۇلاتلارنى تاماملاش ئۈچۈن ئالدى بىلەن بانكا كارتىسىنى ئۈسكۈنە بىلەن باغلاش كېرەك.

   نۆۋەتتىكى يانفون ئارقىلىق پۇل تاپشۇرۇش شەكىلگە نىسبەتەن ئېيتقاندا، Apple Pay مۇلازىمىتى دۆلەت ئىچىدىكى باشقا ئۈچىنچى تەرەپ ھەق تاپشۇرۇش ئۆلچىمىگە زەربە بېرىپ قالماستىن، ApplePay يەنە كۆپ قىسىم ئۈچىنچى تەرەپ ھەق تاپشۇرۇش كارخانىلىرىنىڭ ئورنىنى ئېلىشى مۇمكىن ئىكەن.

   بۇ ئىشقا قارىتا، جۇڭگو بانكا بىرلەشمىسىنىڭ مۇئاۋىن مۇدىرى سەي خوڭفېڭ ‹‹بىز ئىستېمالچىلارنى Apple Pay نى ئۆز ئىچىگە ئالغان بىر يۈرۈش يېڭىچە ھەق تاپشۇرۇش مۇلازىمەتلىرى بىلەن تەمىنلىگەنلىكىمىزدىن ناھايىتى خۇشال›› دېگەن. ئالما تەرەپ بولسا، خۇددى بۇرۇنقىغا ئوخشاش، تېخىمۇ تىرىشىپ، ئىستېمالچىلار ئۈچۈن تېخىمۇ قولايلىق يارىتىدىغانلىقىنى بىلدۈرگەن.

   ئىگىلىنىشىچە، تور سىرتىدا مال سېتىۋالغاندا Apple Pay نى قوللايدىغان ئۈسكۈنىلەر iPhone 6s/6s Plus ،iPhone 6/6 Plus ۋە Apple Watch ئىكەن. ئالما دۇكىنىدىن مال سېتىۋالغاندا Apple Pay نى قوللايدىغان ئۈسكۈنىلەر بىر قەدەر كۆپ بولۇپ، iPhone 6s／6s Plus ،iPhone 6／6 Plus ،iPad Air 2 ،iPad mini 3 ،iPad mini 4 ھەمدە iPad Pro قاتارلىقلارنى ئۆز ئىچىگە ئالىدىكەن.

   مۇلازىمەت مۇھىتى جەھەتتە، جۇڭگو بانكا بىرلەشمىسى جۇڭگودىكى 15 خىل بانكا بىلەن ھەمكارلىشىپ، جۇڭگودىكى ئىستېمالچىلار ئۈچۈن بىخەتەر ھەم قولايلىق مال سېتىۋېلىش مۇھىتى يارىتىپ بېرىدىكەن.

   Apple Pay بولسا، ئالما شىركىتى 2014يىلى كۈزلۈك مەھسۇلات ئېلان قىلىش يىغىنىدا ئېلان قىلغان، يانفوننىڭ NFC ئىقتىدارى ئاساسىدا ھەق تاپشۇرۇش ئىقتىدارى بولۇپ، 2014-يىلى 10-ئاينىڭ 20-كۈنى رەسمىي يولغا قويۇلغان. NFC تېخنىكىسى ئارقىلىق، ئۈسكۈنىلەر ئارىسىدا قىسقا ئارىلىق ئىچىدە سىمسىز ئۇچۇر ئالماشتۇرغىلى بولىدىغان بولۇپ، ئىستېمالچىلار ھەق تاپشۇرۇش جەريانىدىكى بىر قىسىم ئاۋارىچىلىقلاردىن خالىي بولغىلى بولىدىكەن.