ياپونىيە باش ۋەزىرى ئابې شىنزو ئامېرىكىدا زىيارەتتە بولۇۋاتقاندا، ياپونىيە – ئامېرىكا ھۆكۈمىتى 27 – ئاپرېل نيۇيوركتا ياپونىيە – ئامېرىكا يېڭى مۇداپىئە ھەمكارلىق قىبلىنەماسىنى ئېلان قىلدى. قىبلىنەمادە ياپونىيە قوراللىق كۈچلىرىنىڭ ھۇجۇم قىلىش رولىنى ئوينىشىغا رۇخسەت قىلىنىپ، ياپونىيە – ئامېرىكا ھەربىي ئىتتىپاقداشلىقىنىڭ دائىرىسىنى ياپونىيە ئەتراپىدىكى رايونلاردىن پۈتۈن دۇنيا مىقياسىغىچە كېڭەيتتى.
بۇ ياپونىيە بىلەن ئامېرىكىنىڭ 1997 – يىلىدىن بۇيان مۇداپىئە ھەمكارلىق قىبلىنەماسىگە يەنە بىر قېتىم تۈزىتىش كىرگۈزۈشى. ياپونىيە تاراتقۇلىرىنىڭ ئاشكارىلىشىچە، بۇ قېتىم تۈزىتىش كىرگۈزۈشنىڭ ئالدىنقى قېتىمقى تۈزىتىش كىرگۈزۈشكە ئوخشىمايدىغان يېرى شۇكى، بۇ قېتىم ياپونىيە ھۆكۈمىتى تۈزىتىش كىرگۈزىدىغان مەزمۇنلارنى ئاكتىپ ئىلگىرى سۈرگەن ۋە ئۇنىڭغا يېتەكچىلىك قىلغان. ياپونىيە ھۆكۈمىتىنىڭ يېڭى قىبلىنەمانى تۈزۈشكە ئالدىرىشى ئابې شىنزونىڭ قوغدىنىش قىسىمىنىڭ چەت ئەلگە قوشۇن ئەۋەتىشىگە چەكلىمە قويۇشنى بىكار قىلىش، ياپونىيەنىڭ ھەربىي ۋە خەۋپسىزلىكنى قوغداش تۈزۈلمىسىنى قايتا بېكىتىشتىكى مۇھىم ھالقا، شۇنداقلا ئابې شىنزونىڭ ياپونىيە – ئامېرىكا ئىتتىپاقى بايرىقىنى مەقسەتلىك كۆتۈرۈۋېلىپ، خەلقئارا جۇغراپىيەلىك سىياسىي ئويۇنغا قاتنىشىپ ۋە ئارىلىشىپ، چوڭ دۆلەت بولۇش نىيىتىنى ئەمەلگە ئاشۇرۇش ئۈچۈن ئىشلەتكەن ۋاسىتىسى.
كونا قىبلىنەماگە قارىغاندا، يېڭى قىبلىنەمادە ئاساسلىقى تۆۋەندىكى ئۈچ ئالاھىدىلىك بار:
ئىلگىرىكى قىبلىنەمادە بىۋاسىتە ھۇجۇمغا ئۇچرىغاندا ‹‹قىسمەن قوغدىنىش ھوقۇقى››نى يۈرگۈزۈشكە يول قويۇلغان؛ يېڭى قىبلىنەمادە ياپونىيە ھۇجۇمغا ئۇچرىمىغاندىمۇ، ئەھۋالغا قاراپ كوللېكتىپ قوغدىنىش ھوقۇقىنى يۈرگۈزۈشىگە يول قويۇلغان.
ئىلگىرىكى قىبلىنەمادە ياپونىيە قوغدىنىش قىسىمىنىڭ ئامېرىكا ئارمىيەسىگە ياردەم بېرىش چەكلىمىسى يىراق شەرقتىكى چاۋشيەن يېرىم ئارىلى قاتارلىق ياپونىيە ئەتراپىدىكى رايونلار بىلەنلا چەكلىنەتتى؛ يېڭى قىبلىنەمادە ‹‹ئەتراپتىكى رايونلار››يەنە تىلغا ئېلىنمىدى، ياپونىيەنىڭ ئامېرىكا ئارمىيەسىگە ياردەم بېرىش دائىرىسى پۈتۈن يەر شارىغىچە كېڭەيتىلدى.
يېڭى قىبلىنەمادە ياپونىيە – ئامېرىكا ئارمىيەسىنىڭ ماسلىشىش مېخانىزمى بېكىتىلگەن، ئالەم بوشلۇقى ۋە تور قاتارلىق ساھەلەردىكى ھەربىي ھەمكارلىقى يېڭىدىن كۆپەيتىلگەن.
يېڭى قىبلىنەما ئەمەلىيەتتە ئابې شىنزو ھاكىمىيەت بېشىغا چىققاندىن كېيىن خەۋپسىزلىكنى قوغداشتىكى بىر قاتار چوڭ – چوڭ سىياسەتلەرنىڭ ئۆزگىرىش يۈزلىنىشى ۋە يىغىندىسى بولدى.
ئابې شىنزو ھۆكۈمىتىنىڭ مۇداپىئە ھەمكارلىق قىبلىنەماسىگە تۈزىتىش كىرگۈزۈشكە ئالدىرىشىدىكى يەنە بىر ئامىل شۇكى، ئۇلار ئامېرىكىنىڭ ‹‹ئاسىيا – تىنچ ئوكيان رايونىنى قايتا تەڭپۇڭلاشتۇرۇش›› ئىستراتېگىيەسىدىكى ‹‹پۇرسەت››نى سەزگەن. ئامېرىكىنىڭ ‹‹ئاسىيا – تىنچ ئوكيان رايونىنى قايتا تەڭپۇڭلاشتۇرۇش›› ئىستراتېگىيەسىدە ئاشكارىلانغان سوغۇق مۇناسىۋەتلەر ئۇرۇشى تەپەككۇرىدىن توپ – زەمبىرەكلىرىنى ئەمەلىي كۈچ قىلىپ خەلقئارا جۇغراپىيەلىك سىياسىي ئويۇنغا قاتنىشىشقا ئىنتىزار بولۇۋاتقان ئابې شىنزو ھۆكۈمىتى گۆھەرگە ئېرىشكەندەك بولغان. ئامېرىكىنىڭ كۆز ئالدىدىكى مەنپەئەتنى دەپ قىسقا مۇددەتلىك سىياسەت تۈزۈشىگە توغرا كېلىدۇ، شۇڭا ئامېرىكا ئابې شىنزونىڭ ‹‹چوڭ دۆلەت بولۇش›› قارا نىيىتىنى بىلىپ تۇرسىمۇ، ئابې شىنزو ۋە ئۇنىڭ ئەتراپىدىكى ئوڭ قانات كۈچلەرنىڭ ئۇرۇشتىن كېيىنكى خەلقئارا تەرتىپنىڭ قىزىل سىزىقىنى بۇزۇشىغا قاراپ تۇرغان.

شىنخۇا ئاگېنتلىقى