دۆلەتلىك ئىستاتىستىكا ئىدارىسى 18-ئىيۇن ئېلان قىلغان سانلىق مەلۇماتتىن ئايان بولۇشىچە، 5-ئايدا 70 چوڭ، ئوتتۇرا شەھەردە يېڭىدىن سېلىنغان تاۋار ئۆيلەر باھاسىنىڭ سېلىشتۇرما ئۇنىۋېرسال ئوتتۇرىچە ئۆرلەش كۆلىمى ئالدىنقى ئايدىكىدىن 0.7 پوئېنت يۇقىرى بولغان، نىمكەش ئۆيلەرنىڭ ئۆرلەش كۆلىمى يېڭىدىن سېلىنغان تاۋار ئۆيلەرنىڭكىدىن يۇقىرى بولغان، 1-سەپتىكى شەھەرلەرنىڭ ئۆي باھاسى كۆرۈنەرلىك ئۆرلىگەن.
دۆلەتلىك ئىستاتىستىكا ئىدارىسى شەھەر مەھكىمىسىنىڭ ئالىي ئىستاتىستىكىچىسى ليۇ جيەنۋېي مۇنداق دېدى: 5-ئايدىكى ئۆي سودىسىدا يىل ئىچىدىكى يۇقىرى سەۋىيە يارىتىلدى، ئۆي باھاسىنىڭ ئېشىشىغا ئاساسلىقى 1-سەپتىكى شەھەرلەردىكى ئۆرلەش كۆلىمىنىڭ بىر قەدەر يۇقىرى بولغانلىقى سەۋەب بولدى، شەھەرلەر ئوتتۇرىسىدىكى پەرق ئېغىرلاشتى. ئىگىلىنىشىچە، 5-ئايدا، 2-سەپتىكى شەھەرلەردىكى ئۆي باھاسى ئومۇمىي جەھەتتىن مۇقىم بولغان؛ 3-سەپتىكى نۇرغۇن شەھەرلەردىكى ئۆي باھاسى يەنىلا چۈشكەن. لېكىن سېلىشتۇرما ئۆرلەشكە ئەگىشىپ، قىسمەن شەھەرلەردىكى ئۆي باھاسىنىڭ چۈشۈشى سەل ئاستىلىغان.