چىلان ۋە ئۆرۈكلۈك كۆلىمى مەملىكەت بويىچە 1–ئورۇندا تۇرىدۇ

ئاپتونوم رايونىمىز ئۆزگىچە ئىسسىقلىق شارائىتىدىن پايدىلىنىپ، باغۋەنچىلىكنى تەرەققىي قىلدۇرۇپ، ئېلىمىزنىڭ ‹‹غەربىي رايونىدىكى كاتتا باغ›› بەرپا قىلدى. بۇلتۇرنىڭ ئاخىرىغىچە، ئاپتونوم رايونىمىزنىڭ ئۆزگىچە مېۋىلىك باغ كۆلىمى 22 مىليون موغا، ئومۇمىي ھوسۇلى 6 مىليون 500 مىڭ توننىغا، مەھسۇلات قىممىتى 45 مىليارد يۈەنگە يەتتى. قىسقىغىنە بىر نەچچە يىلدا باغ كۆلىمى يىلىغا 1 مىليون مولۇق سۈرئەت بىلەن كۆپەيدى. ئىلگىرى ئاپتونوم رايونىمىزدىكى مېۋىلىك باغ 3 مىليون موغا يەتمەيتتى، ھازىر 22 مىليون موغا يەتتى. شۇنداقلا تەڭرىتاغنىڭ جەنۇبىي ۋە شىمالىدا چىلان، ياڭاق، ئۆرۈك، نەشپۈت ۋە ئالما قاتارلىق ئالاھىدە خاسلىققا ئىگە مېۋىلىك باغلار بارلىققا كەلدى.

6 – فېۋرال ئېچىلغان ئاپتونوم رايونلۇق ئورمانچىلىق خىزمىتى يىغىنىدىن ئىگىلىنىشىچە، بۇلتۇر ئاپتونوم رايونىمىزدا ئۆزگىچە خاسلىققا ئىگە باغۋەنچىلىك بىلەن شۇغۇللانغان دېھقان 3 مىليون 500 مىڭغا، مېۋىچىلىكتىن قىلغان ئوتتۇرىچە كىرىمى 1400 يۈەنگە يەتكەن. باغۋەنچىلىكنى بالدۇرراق تەرەققىي قىلدۇرغان ۋىلايەت، ئوبلاست، ناھىيە، شەھەرلەردە مېۋىچىلىك كىرىمى دېھقانلارنىڭ ئوتتۇرىچە ساپ كىرىمىنىڭ %45تىن كۆپرەكىنى ئىگىلىگەن. ھازىرغىچە، ئاپتونوم رايونىمىزدىكى چىلان، ئۆرۈك كۆلىمى مەملىكەت بويىچە 1 – ئورۇندا، ياڭاق كۆلىمى مەملىكەت بويىچە 3 – ئورۇندا تۇرۇپ، باغۋەنچىلىك ئاپتونوم رايونىمىزنىڭ يېزا ئىقتىسادىي تەرەققىياتى ۋە دېھقانلارنىڭ كىرىمىنى سىجىل ئاشۇرۇشتىكى تۈۋرۈك كەسىپكە ئايلانغان.