«2015 - يىللىق جۇڭگو - ياۋروپا پەن تەتقىقاتتا يېڭىلىق يارىتىش سەپىرى پائالىيىتى − شىنجاڭ لېكسىيە سۆزلەش يىغىنى» 9 - ئىيۇن چۈشتىن بۇرۇن ئۈرۈمچىدە ئۆتكۈزۈلدى. بۇ، ياۋروپا ئىتتىپاقىنىڭ بۇنداق پائالىيەتنى شىنجاڭدا تۇنجى قېتىم ئۆتكۈزۈشى ھېسابلىنىدۇ. ياۋروپا ئىتتىپاقى شىنجاڭنىڭ ياۋروپا ئىتتىپاقىنىڭ «ئۇپۇق سىزىقى - 2020 پىلانى» غا قاتنىشىپ، جۇڭگو بىلەن ياۋروپانىڭ پەن - تېخنىكىدا يېڭىلىق يارىتىش جەھەتتىكى ھەمكارلىقىنى ئىلگىرى سۈرۈش ئۈچۈن ئاساس سېلىشىنى ئۈمىد قىلىدۇ.
ياۋروپا ئىتتىپاقىنىڭ «ئۇپۇق سىزىقى −− 2020 پىلانى» ئۇنىڭ يېڭىلىق يارىتىش سىياسىتىنى ئەمەلگە ئاشۇرىدىغان مەبلەغ قورالى. بۇ يەتتە يىللىق (2014 - يىلىدىن 2020 - يىلىغىچە)پىلاندىكى خامچوت ئومۇمىي سوممىسى تەخمىنەن 80 مىليارد ياۋرۇ بولۇپ، جۇڭگودىكى قاتناشقۇچىلارغا ئومۇميۈزلۈك ئېچىۋېتىلىدۇ.
ياۋروپا ئىتتىپاقىنىڭ جۇڭگودا تۇرۇشلۇق ۋەكىللەر ئۆمىكىنىڭ پەن - تېخنىكا مەسلىھەتچىسى بو سىرۈي مۇنداق دېدى: بۇ يىل جۇڭگو بىلەن ياۋروپا ئىتتىپاقى دىپلوماتىك مۇناسىۋەت ئورناتقانلىقىنىڭ 40 يىللىقى. بۇ پۇرسەتتىن پايدىلىنىپ، شىنجاڭغا ياۋروپا ئىتتىپاقىنىڭ جۇڭگو - ياۋروپا پەن - تېخنىكا ھەمكارلىقىغا ئىشلەتكىلى بولىدىغان نۇرغۇن تۈر مەبلىغى بارلىقىنى بىلدۈرۈپ، شىنجاڭنى ياۋروپا ئىتتىپاقىنىڭ «ئۇپۇق سىزىقى −− 2020 پىلانى» غا پائال قاتناشتۇرۇشنى ئۈمىد قىلىمىز.
ئاپتونوم رايونلۇق پەن - تېخنىكا نازارىتى خەلقئارا ھەمكارلىق باشقارمىسىنىڭ باشلىقى دۇڭ پىڭ مۇنداق دېدى: ياۋروپا ئىتتىپاقىنىڭ پەن - تېخنىكىدا يېڭىلىق يارىتىش جەھەتتە خېلىلا ئەمەلىي كۈچى بار. بۇ پائالىيەتنى شىنجاڭنىڭ يېڭىلىق يارىتىش ئىقتىدارىنى تېخىمۇ ئۆستۈرىدىغان ياخشى پۇرسەت دېيىشكە بولىدۇ. ھازىر شىنجاڭنىڭ يېڭى ئېنېرگىيە، جابدۇق ياسىمىچىلىقى، بىيو پەن - تېخنىكا قاتارلىق ساھەلەردىكى كەسىپلىشىپ تەرەققىي قىلىش قەدىمى تېزلىشىۋاتقاندا، ئىككى تەرەپنىڭ ھەمكارلىشىش ئېھتىماللىقى تېخىمۇ كۈچىيىۋاتىدۇ.
ئىگىلىنىشىچە، جۇڭگو - ياۋروپا پەن تەتقىقاتتا يېڭىلىق يارىتىش سەپىرى پائالىيىتى ئۈچ قېتىم ئۆتكۈزۈلگەن. بۇ قېتىمقى پائالىيەت 18 - ماي ۋۇخەندە باشلانغان بولۇپ، 11 - ئايدا ئاخىرلىشىدىكەن. بۇ پائالىيەت جۇڭگودىكى 16 شەھەردە ئۆتكۈزۈلىدىغان بولۇپ، ئۈرۈمچى بۇ پائالىيەتنىڭ 4 - بېكىتى ئىكەن.