قاراقاشتا قۇرۇلغان «ئەلقەلب»خەيرى-ساخاۋەت جەمىيىتى ئىشقا كىرىشتى

تۈرى : جەمئىيەت يوللىغۇچى : ئابلەت نۇرمۇھاممەد ۋاقتى : 2016-09-06 16:16:30

تەكلىپلىك مۇخپىرىمىز غۇجىئابدۇللا مەمىتىمىن خەۋىرى ،فوتوسى :
9-ئاينىڭ 4-كۈنى ،قاراقاش ناھىيەسىدىكى «ئەلقەلب»خەيرى-ساخاۋەت جەمىيىتىنىڭ 20 گە يېقىن پىدائىيلىرى ئاقساراي يېزىسىنىڭ ئاياغقۇمباغ كەنتىدىكى يەتتە يىلدىن بۇيان ئولتۇرۇپ قالغان 25 ياشلىق مېيىپ ياش ئابدۇباقى زىكرۇللانىڭ ئائىلىسىگە بېرىپ ئۇنىڭغا بىر دانە مېيىپلار ھارۋىسى تەقدىم قىلىپ ئۇنىڭ ئۇزۇندىن بۇيانقى ئارزۇسىنى رىئاللىققا ئايلاندۇرۇپ ئۇنى خۇشال قىلىۋەتتى.ئۇنىڭغا گۈرۈچ،سۇ يېغى قاتارلىق ماددى بۇيۇملارنى سوۋغا قىلىپ ئائىلىسىنىڭ غېمىنى يەڭگىللەتتى. ئابدۇباقى زىكرۇللا ھەم ئۇنىڭ ئاتا-ئانىسى ئۇلارنىڭ بۇ ئىشىدىن چەكسىز سۆيۈندى.
«جۇڭخۇا خەلق جۇمھۇرىيىتىنىڭ خەيرى-ساخاۋەت قانۇنى»نىڭ يولغا قويۇلىشىغا ئەگىشىپ قاراقاش ناھىيەسىدىكى ئىلغار پىكىرلىك،قولى ئوچۇق ياشلار بىرلىككە كىلىپ،خەلق ئىشلىرى تارماقلىرىنىڭ تەستىقى بىلەن قاراقاش «ئەلقەلب»خەيرى-ساخاۋەت جەمىيىتىنى ۋۇجۇتقا چىقاردى.ئۇلار پارتىيە،ھۆكۈمەتنىڭ قىيىنچىلىققا ئۇچرىغانلارغا ياردەم بېرىش،نامراتلارنى يۆلەش چاقىرىقىغا قىزغىن ئاۋاز قوشۇپ خەيرى-ساخاۋەت ئىشلىرى بىلەن خەلق ئاممىسىغا خالىس مەنپەئەت يەتكۈزىدۇ.
قاراقاش «ئەلقەلب»خەيرى-ساخاۋەت جەمىيىتىنىڭ مەسئۇلى تۇرغۇن تۇراتۇرسۇننىڭ تونۇشتۇرىشىچە بۇ جەمىيەت بۇ يىل يىل بېشىدا 25 ئەزا بىلەن سىناق تەرىقىسىدە خەيىرلىك ئىشلىرىنى باشلىغانىكەن،ھازىرغىچە ئۇلار ئېغىر قىيىنچىلىققا ئۇچرىغان كىشىلەرگە 60 مىڭ يۈەنلىك ماددى بۇيۇم ھەم نەق پۇل بىلەن ھال سوراپ ئۇلارغا مېھىر-شەپقەت يەتكۈزۈپتۇ. ھازىر ئۇلارنىڭ ئەزاسى 56 يەتكەن بولۇپ ئۇلار بۇنىڭدىن كىيىن ناھىيەلىك خەلق ئىشلىرى ئىدارىسىنىڭ يىتەكچىلكىدە ساخاۋەت ئىشلىرىنى تېخىمۇ ئىلگىرى سۈرۈپ ئىناق جەمىيەت بەرپا قىلىشقا تۆھپە قوشىدىكەن.
سۈرەتتە: پىدائىيلار ئابدۇباقى زىكرۇللانى مېيىپلار ھارۋىسىغا ئولتۇرغۇزماقتا