سولياۋ خالتىلارنىڭ زەھەرسىزلىكىنى ئاددىي ئۇسۇلدا پەرقلەندۈرۈش

تۈرى : ساغلاملىق يوللىغۇچى : ئابلەت نۇرمۇھاممەد ۋاقتى : 2016-04-14 00:52:27

سولياۋ خالتىلارنىڭ زەھەرسىزلىكىنى ئاددىي ئۇسۇلدا پەرقلەندۈرۈش

كۈندىلىك تۇرمۇشتا پىشۇرۇلغان يېمەكلىكلەر، گۆش تۈرىدىكى يېمەكلىكلەر، مېۋە – چىۋە ۋە كۆكتات قاتارلىقلار سولياۋ خالتىلارغا ئوراپ قاچىلىنىدۇ. ئۇنداقتا قانداق قىلغاندا بۇ سولياۋ خالتىلارنىڭ زەھەرسىزلىكىنى پەرقلەندۈرگىلى بولىدۇ؟

كۆزىتىپ تەكشۈرۈش ئۇسۇلى:

زەھەرسىز سولياۋ خالتىلار ئادەتتە رەڭسىز، يېرىم سۈزۈك ياكى سۈت رەڭ ھالەتتە كۆرۈنىدۇ. قول بىلەن سىلىغان ۋاقىتتا بىر خىل سىلىق بىلىنىدۇ. زەھەرلىك سولياۋ خالتىلارنىڭ رەڭگى دۇغلىشاڭغۇ ھالەتتە بولۇپ، قول بىلەن سىلىغاندا قولغا چاپلىشىپ قالغاندەك سېزىم بېرىدۇ.

سولياۋ خالتىلارنى سىلكىپ تەكشۈرۈش ئۇسۇلى:

سولياۋ خالتىنىڭ بىر ئۇچىدىن تۇتۇپ كۈچەپ سىلكىگەندە، زىل ھەم جاراڭلىق ئاۋاز چىقارغىنى زەھەرسىز سولياۋ خالتا، يېقىمسىز ئاۋاز چىقارغىنى زەھەرلىق سولياۋ خالتا بولىدۇ.

كۆيدۈرۈپ تەكشۈرۈش ئۇسۇلى:

زەھەرسىز سولياۋ خالتىلار ئاسان كۆيىدۇ. ئوت يالقۇنى كۆك رەڭدە كۆرۈنىدۇ. كۆيگەن ۋاقىتتا شامغا ئوخشاش ئېرىپ چۈشىدۇ ھەم پارافىن پۇرىقى چىقىرىدۇ. زەھەرلىك سولياۋ خالتىلار زەھەرسىز سولياۋ خالتىغا قارىغاندا سەل تەسرەك كۆيىدۇ. ئوتتىن يىراقلاشتۇرۇلسىلا ئۆچۈپ قالىدۇ ھەم بىر خىل غىدىقلىغۇچى گاز پۇرىقى ھاسىل قىلىدۇ.

سۇدا تەكشۈرۈش ئۇسۇلى:

سولياۋ خالتىلارنى سۇغا سېلىپ، ئاستىغا بېسىپ قويۇپ بەرسەك، زەھەرسىز سولياۋ خالتىلار سۇ يۈزىگە ئاسانلا لەيلەپ چىقىدۇ. ئەمما زەھەرلىك سولياۋ خالتىلار سۇ يۈزىگە لەيلەپ چىقمايدۇ.

ئەلدىيار تورى ئۈندىدار سالونى : eldiyar99