‹‹سۇناي›› ئويۇنى

      ‹‹سۇناي›› ئويۇنى ئادەتتە ‹‹ئىسقىرت›› ئويۇنى دەپمۇ ئاتىلىدۇ. بۇ ئويۇن ‹‹پىپى›› ئويۇنىنىڭ يۇقىرى شەكلى بولۇپ، 10 ياشتىن ھالقىغان ئوغۇل بالىلار تەرىپىدىن باھار پەسلىدە ئوينىلىدۇ.

      ئوغۇل بالىلار ئالدى بىلەن چوڭ كىشىنىڭ باش بارمىقى توملۇقىدىكى 25 – 30 سانتىمېتىر سۆگەت نوتىسىنى نەم يەرگە بوش – بوش ئۇرۇپ ياكى نوتىنىڭ قوۋزىقىنى قولى بىلەن ئاستا تولغاپ بوشىتىپ، تۈۋىدىن ئۇچىغا سۈزۈپ نەيچە پېتىچە ياغاچ قىسمىدىن چىقىرىۋالىدۇ، ئاندىن نەيچىنىڭ توم بېشىدىن 6– 8 مىللىمېتىر كېلىدىغان بىر تۆشۈك ئاچىدۇ. ئۈچىنچى قەدەمدە نەيچىنىڭ ئىچىدىن ئېلىۋېتىلگەن تاياقچىنىڭ توم ئۇچىدىن 10 – 12 سانتىمېتىر كېسىپ، ئىنچىكە ئۇچىنىڭ ئاستىنى سەل قىيپاش شىلىپ، ئۈستى تەرىپىنى بۇ باشتىن ئۇ باشقىچە 1 مىللىمېتىر قېلىنلىقتا قىرىۋېتىپ، بۇ تاياقچىنى نەيچىنىڭ ئىچىگە ھېلىقى تۆشۈكنىڭ گىرۋىكىگىچە كىرگۈزىدۇ. تاياقچىنىڭ توم ئۇچى نەيچىدىن 2 – 3 سانتىمېتىر سىرتقا چىقىپ تۇرىدۇ. بۇنىڭ بىلەن سۇناي پۈتۈپ چىقىدۇ.

      بالىلار بۇ ئويۇنچۇقنى ياساپ بولغاندىن كېيىن، توپلىشىپ سۇناي چېلىش مۇسابىقىسى ئۆتكۈزىدۇ. بالىلارنىڭ سۇناي ياساش ماھارىتى ئوخشاش بولمىغاچقا، ياسالغان سۇنايلاردىن چىققان ئاۋاز ھەرخىل بولىدۇ، ئەمما بالىلارنىڭ سۇناي چىلىشى بىر خىل شەكىلدە بولۇشى شەرت، يەنى بالىلار سۇناينىڭ تاياقچە چىقىپ تۇرغان تەرىپىنى ئاغزىغا سېلىپ، ئۈستىدىكى تۆشۈكنى كۆرسەتكۈچ بارمىقى ۋە ئوتتۇرا بارمىقىدا نۆۋەتلەشتۈرۈپ بېسىپ، بەلگىلىك رىتىمدا پۈۋلەپ ھەرخىل ئاۋاز چىقىرىپ ئوينايدۇ. چىققان ئاۋاز ‹‹پىپى››نىڭ ئاۋازىدىن كۈچلۈك ۋە يېقىملىق بولىدۇ.

      بۇ ئويۇن بالىلاردا مۇزىكا تۇيغۇسىنى پەيدا قىلىدۇ، بالىلارنى چالغۇ ياساش ۋە ئۇنىڭدىن ئۈنۈملۈك پايدىلىنىشقا يېتەكلەيدۇ.

()

• . ‹‹ئىلىشماق›› ئويۇنى
• . ‹‹قارا – قارا قۇشلارىم›› ئويۇنى
• . ‹‹سۇناي›› ئويۇنى
• . ‹‹چىلىشىش›› ئويۇنى
• . ‹‹ئىلەڭگۈچ›› ئويۇنى
• . ئەنئەنىۋى بالىلار ئويۇنلىرى ۋە بۈگۈنكى
• . ‹‹بىجىگەن توپ›› ئويۇنى
• . ‹‹تاقمۇ – جۈپمۇ؟›› ئويۇنى
• . ‹‹چانا تېيىلىش›› ئويۇنى
• . ‹‹ياڭاق سوقۇشتۇرۇش›› ئويۇنى
• . ‹‹راۋاب ياساش ۋە چېلىش›› ئويۇنى
• . ‹‹دۇتتار ياساش ۋە چېلىش›› ئويۇنى
• . ‹‹مېھماندارچىلىق›› ئويۇنى
• . ‹‹تۆگە ــ تۆگىلەڭ›› ئويۇنى
• . ئەنئەنىۋى ئويۇن-جۈپ – تاق ئويۇنى
• . ‹‹ئايشەمخاننىڭ تۇرغان جايى›› ئويۇنى