ئوقۇغۇچىلارنىڭ خەنزۇتىلى دەرسىگە بولغان قىزىقىشىنى ئاشۇرۇش ھەققىدە ئويلىغانلىرىم

   ئىلىم – پەن ئۇچقاندەك تەرەققىي قىلىۋاتقان، جەمئىيەت ئىختىساسلىقلارغا ئېھتىياجلىق بولۇۋاتقان، قوش تىل مائارىپى ئومۇميۈزلۈك يولغا قويۇلۇۋاتقان بۈگۈنكى كۈندە، ئوقۇغۇچىلارنىڭ خەنزۇ تىلى دەرسىگە بولغان قىزىقىشىنى ئاشۇرۇشنىڭ مۇھىملىقى بارغانسېرى گەۋدىلەنمەكتە. تۆۋەندە مەن ئوقۇغۇچىلارنىڭ خەنزۇ تىلى دەرسىگە بولغان قىزىقىشىنى ئاشۇرۇشتا دىققەت قىلىشقا تېگىشلىك بىر قانچە نۇقتا ھەققىدە كەسىپداشلار بىلەن ئورتاقلاشماقچى.

   1. ئوقۇغۇچىلارنىڭ خەنزۇ تىلى ئۆگىنىش ھەققىدىكى تونۇشىنى توغرىلاش كېرەك. بۇنىڭدا ئوقۇغۇچىلارغا خەنزۇ تىلىنى ياخشى ئۆگىنىشنىڭ مۇھىم ئەھمىيىتىنى چۈشەندۈرۈش لازىم. خەنزۇ تىلى خەلقئارادىكى مۇھىم تىللارنىڭ بىرى، شۇنداقلا ئېلىمىزنىڭ دۆلەت تىلى ۋە مىللەتلەرنىڭ ئۆز ئارا ئالاقە قىلىشىدىكى مۇھىم تىل، خەنزۇ تىلىنى ياخشى ئۆگەنمىگەندە كەلگۈسىدە باشقا تىللارنى ئۆگىنىش تەسكە توختايدۇ. ئاز سانلىق مىللەتلەرگە نىسبەتەن ئېيتقاندا خەنزۇ تىلى مىللەتلەر ئىتتىپاقلىقىنى كۈچەيتىش، ۋەتەننىڭ بىرلىكىنى قوغداش، پەن – تېخنىكا بىلىملىرىنى ياخشى ئۆگىنىپ دەۋر بىلەن تەڭ ئىلگىرىلەش، خىزمەتنى تېخىمۇ ياخشى ئىشلەشنىڭ مۇھىم كاپالىتى. شۇڭا ئوقۇغۇچىلارنىڭ خەنزۇتىلى ئۆگىنىش ھەققىدىكى تونۇشىنى توغرىلاپ، ئۇلارنىڭ خەنزۇ تىلى ئۆگىنىش ئاكتىپلىقىنى كۈچەيتىش كېرەك.

   2. ئوقۇغۇچىلارغا خەنزۇ تىلى ئۆگىنىشنىڭ زۆرۈرلۈكىنى تونۇتۇش كېرەك. ھازىرقى پەن – تېخنىكا ئۇچقاندەك تەرەققىي قىلىۋاتقان، رىقابەت كەسكىنلىشىۋاتقان ئۇچۇر دەۋرىدە، خەنزۇ تىلى ھەر قايسى مىللەت كىشىلىرىنىڭ پەن – مەدەنىيەت بىلىملىرىنى ئىگىلىشىدىكى ھەم كۈندىلىك ئالاقىسىدىكى مۇھىم ۋاسىتە. بولۇپمۇ قوش تىللىق ئىختىساسلىقلارنى يېتىشتۈرۈش ۋە تاللاپ ئىشقا قويۇش تەكىتلىنىۋاتقان بۈگۈنكى كۈندە، خەنزۇ تىلىنى ياخشى ئۆگىنىش دەۋرنىڭ جىددىي تەلىپى. بۇ نۇقتىنى ئوقۇغۇچىلارغا تۇرمۇشتىكى ئەمەلىي مىساللار ئارقىلىق جانلىق چۈشەندۈرۈش لازىم. شۇنىڭ بىلەن بىللە، ئوقۇتۇش ئۇسۇلىنى يېڭىلاپ تۇرۇش كېرەك. چۈنكى ئوقۇتۇش ئۇسۇلى بىر قېلىپتا مېڭىۋەرسە ئوقۇغۇچىلارنىڭ ئۆگىنىش قىزغىنلىقى سۇسلىشىپ كېتىشى مۇمكىن. شۇڭا ئوقۇتۇش ئۇسۇلىنى پات – پات يېڭىلاپ، كۆپ خىل ئوقۇتۇش ئۇسۇلىنى جانلىق قوللىنىش كېرەك.

   3. خەنزۇ تىلى ئوقۇتۇشىدا ئوقۇغۇچىلارنىڭ ئۆگىنىشىگە ئىلھام بېرىشكە ماھىر بولۇش لازىم. خەنزۇ تىلى ئوقۇتۇشىدا ئوقۇغۇچىلارنىڭ ئۆگىنىشىگە ئىلھام بېرىشكە ماھىر بولۇش، ئوقۇغۇچىلارغا سوئاللارغا جاۋاب بېرەلمىگەندە دەرھال ئەيىبلىمەي، يەنىمۇ كۆپرەك ئويلىنىشقا رىغبەتلەندۈرۈش، بولۇپمۇ خەنزۇ تىلى ئۆگىىنىشتە نەتىجىسى ياخشى ئوقۇغۇچىلارنى باشقىلارغا خەنزۇ تىلىنى ئۆگىنىش ئۇسۇللىرى ھەققىدە تەجرىبە سۆزلەپ بېرىشكە تەكلىپ قىلىش، ھەر بىر سائەتلىك دەرسنى ئوقۇغۇچىلارنىڭ ئەمەلىي ئەھۋالىغا ئاساسەن تۈزۈش، ئوقۇغۇچىلارنى ئۆگەنگىنىنى ئەمەلىيەتتە ئىشلىتىشكە يېتەكلەش لازىم. خەنزۇ تىلى ئوقۇتۇشىدا ياخشىلىرىنى باشقىلارغا ئۈلگە قىلىش، ئوتتۇرا ھاللىرىنى رىغبەتلەندۈرۈش، كەينىدىكىلىرىنى يېتەكلەش ئۇسۇلىنى قوللىنىش كېرەك. بۇ خىل ئۇسۇل ئارقىلىق ئوقۇغۇچىلارنى خەنزۇ تىلى ئۆگىنىشتە ئومۇميۈزلۈك تەكشى يېتەكلەش مەقسىتىگە يەتكىلى بولىدۇ.

   دېمەك، ئوقۇغۇچىلارنىڭ خەنزۇ تىلى دەرسىگە بولغان قىزىقىشىنى ئاشۇرۇش ئوقۇتقۇچىلارنىڭ مەجبۇرىيىتى، شۇنداقلا خەنزۇ تىلى ئوقۇتۇش سەۋىيەسىنى ئاشۇرۇشنىڭ مۇھىم تەلىپى. ئوقۇغۇچىلارنىڭ ئۆگىنىش ئاكتىپلىقى تۇغما بولمايدۇ ئەلۋەتتە. ئۇ ئۆگىنىش مۇھىتى ۋە ئوقۇتقۇچىلارنىڭ كۆڭۈل قويۇپ تەربىيەلىشى بىلەن زىچ مۇناسىۋەتلىك. ئوقۇغۇچىلارنىڭ خەنزۇ تىلى دەرسىنى ئۆگىنىشكە بولغان قىزىقىشىنى ئاشۇرىمىز دەيدىكەنمىز، چوقۇم تۈرلۈك ئۇسۇل ۋە ئەمەلىي مىساللاردىن پايدىلىنىپ خەنزۇ تىلى ئۆگىنىشنىڭ مۇھىملىقىنى تونۇتۇش بىلەن بىللە، دەرستىن سىرتقى ۋاقىتلاردا ئوقۇغۇچىلار بىلەن كۆپرەك سىردىشىپ، ئۇلارنىڭ روھىي كەيپىياتىنى ئىگىلەپ تۇرۇشىمىز، دەرسخانىدا كۆڭۈللۈك، ئازادە ئۆگىنىش كەيپىياتىنى يارىتىش ئارقىلىق، ئوقۇغۇچىلارنىڭ خەنزۇ تىلى دەرسىنى ئۆگىنىشكە بولغان قىزىقىشىنى ئاشۇرۇشىمىز كېرەك.

(تەھرىر : admin)

• خەنزۇتىلى ئوقۇتۇشىدا ئوقۇغۇچىلارنىڭ ئا
• خەنزۇتىلى دەرس تەييارلىغاندا ئەھمىيەت
• ئوقۇغۇچىلارنىڭ خەنزۇ تىلى سەۋىيەسىنى ئ
• خەنزۇ تىلى ئوقۇتۇشىدا ھېس قىلغانلىرىم
• ئوقۇغۇچىلارنىڭ خەنزۇچە نۇتۇق ئىقتىدارى
• قانداق قىلغاندا تولۇقسىز ئوتتۇرا مەكتە
• قانداق قىلغاندا خەنزۇ تىلى ئوقۇتۇشىنىڭ
• ئوقۇغۇچىلارنىڭ خەنزۇتىلى دەرسىگە بولغا
• خەنزۇ تىلى ئوقۇتۇش سۈپىتىنى ئۆستۈرۈشتە
• خەنزۇ تىلى ئوقۇتۇشى ۋە ئۈنۈم
• خەنزۇتىلى ئوقۇتقۇچىلىرى ئۆزىنىڭ رۇلى ۋ
• خەنزۇ تىلىدىكى مەنىداش سۆزلەرنى پ
• مىللىي ئوقۇغۇچىلارنىڭ خەنزۇ تىلى
• خەنزۇ تىلى دەرسىنى تېخىمۇ ياخشى ئۆ
• خەنزۇتىلى دەرس تەييارلىغاندا ئەھم
• خەنزۇتىلى ئوقۇتۇشىدا ئوقۇغۇچىلار