مەيلى ياش-ئۆسمۈرلەر، ياشانغانلار ۋە ياكى باشقا ياشتىكى كىشىلەر بولسۇن، چېنىقىشنىڭ ئادەم بەدىنىگە ئېلىپ كېلىدىغان پايدىسى ئىنتايىن كۆپ. ئەمما چېنىقىدىغان كىشىنىڭ يېشى، بەدەن سالامەتلىكى ۋە باشقا ئامىللارنىڭ ئوخشىماسلىقىغا ئاساسەن چېنىقىشنىڭ مىقدارى، تۈرى، شەكلىمۇ مۇۋاپىق تاللىنىشى ۋە كونترول قىلىنىشى كېرەك. ياش-ئۆسمۈرلەر ئۈچۈن ئېيتقاندا، ئۆگىنىش بىلەن چېنىقىشنى بىرلەشتۈرۈشنىڭ ئىنتايىن چوڭ پايدىسى بار، ئەمما چېنىقىش بەك ئېغىر بولۇپ كەتسە زىيانلىق. چۈنكى ھەرىكەت مىقدارى بەك ئېغىر بولغاندا، بەدەن ۋاقىتلىق ئوكسىگېن يېتىشمەسلىك ھالىتىدە تۇرىدۇ. قۇرامىغا يەتكەن كىشىلەر ئۈچۈن بۇ خىل ئوكسىگېن يېتىشمەسلىك پەقەتلا مۇسكۇللارنىڭ ۋاقىتلىق ئاغرىشىنى كەلتۈرۈپ چىقىرىدۇ. ئەمما ياش-ئۆسمۈرلەردە بولسا، مۇسكۇللارنىڭ ئاغرىشىدىن باشقا يەنە، بەدەندە نۇرغۇنلىغان ئەركىن رادىكاللىق بىرىكمىلەر قويۇپ بېرىلىدۇ. بۇ ئەركىن رادىكاللىق بىرىكمىلەر بەدەندىكى ھەرخىل مۇھىم ئۆستۈرگۈچى ھورمۇنلارنى ئاكتىپسىزلاشتۇرۇپ، ياش-ئۆسمۈرلەرنىڭ سۆڭىكىنىڭ نورمال ئۆسۈپ يېتىلىشىگە تەسىر يەتكۈزدىدۇ. ئۇندىن باشقا يەنە، ياش-ئۆسمۈرلەرنىڭ سۆڭىكىنىڭ ئىلاستىكىلىقى ياخشى بولغاچقا، بەك ئېغىر نەرسىلەرنى كۆتۈرۈپ مەشىق قىلسا، سۆڭەك شەكلىنىڭ ئۆزگىرىپ كېتىشىنى كەلتۈرۈپ چىقىرىدۇ. شۇنىڭ ئۈچۈن ياش-ئۆسمۈرلەر چېنىققاندا ھەرىكەتنىڭ مىقدارى، تۈرى، ۋاقتىنى ياخشى تاللىشى، ھەرىكەت مىقدارىنى بەك ئېغىر قىلىۋەتمەسلىكى كېرەك.