پارتىيەنىڭ ئىستىلىنى كۈچەيتىش ھالقىما تەرەققىيات ۋە ئۇزاققىچە
ئەمىنلىكنى ئىشقا ئاشۇرۇشتا ئىنتايىن
مۇھىم ئەھمىيەتكە ئىگە
نۇرھاجى مۇھەممەت
پارتىيە ئىستىلى پارتىيەنىڭ ھەر دەرىجىلىك تەشكىلاتلىرى ۋە پارتىيە ئەزالىرى ئەمەلىيەت داۋامىدا شەكىللەندۈرگەن پارتىيەنىڭ خاراكتېرى ۋە خىسلىتىنى ئەكس ئەتتۈرۈپ بېرىدۇ. ئۇ پارتىيە تەشكىلاتلىرى ۋە پارتىيە ئەزالىرىنىڭ ئىدىيە، سىياسىي، خىزمەت، ئۆگىنىش ۋە تۇرمۇش قاتارلىق ھەر قايسى جەھەتلەردىكى ئىزچىل پوزىتسىيەسى ۋە ھەرىكىتىدە كونكرېت گەۋدىلىنىدۇ. پارتىيە ئىستىلى پارتىيەنىڭ ئوبرازىغا، ھايات – ماماتىغا، پارتىيە بىلەن ئاممىنىڭ مۇناسىۋىتىگە زىچ مۇناسىۋەتلىك بولىدىغانلىقى پارتىيەنىڭ ئىجادچانلىقى، جەڭگىۋارلىقى، ئۇيۇشۇشچانلىقى، ئىلغارلىقى ۋە پاكلىقىنىڭ مۇھىم بەلگىسىدۇر. شىنجاڭ خىزمىتى پارتىيە ۋە دۆلەت خىزمىتى ئومۇمىيىتىدە ئالاھىدە مۇھىم ئىستراتېگىيەلىك ئورۇنغا ئىگە بولۇپ، تەرەققىيات، مۇقىملىق ۋەزىپىسىمۇ ئالاھىدە مۈشكۈل ۋە جاپالىق. شۇڭا، يېڭى تارىخىي شارائىتتا ئاپتونوم رايونىمىزدا پارتىيەنىڭ ئىستىلىنى كۈچەيتىش ھالقىما تەرەققىيات ۋە ئۇزاققىچە ئەمىنلىكنى ئىشقا ئاشۇرۇشتا ئىنتايىن مۇھىم ئەھمىيەتكە ئىگە.
1. پارتىيەنىڭ ئىستىل قۇرۇلۇشىنى ئاپتونوم رايونىمىزنىڭ ئىجتىمائىي تارىخىي تەرەققىيات تەلىپى بىلەن ئۇيغۇنلاشتۇرۇش لازىم. ئىسلاھات ئېچىۋېتىلگەندىن بۇيان، ئاپتونوم رايونىمىز ئىقتىسادىي، ئىجتىمائىي تەرەققىياتتا غايەت زور مۇۋەپپەقىيەتلەرنى قولغا كەلتۈردى. بولۇپمۇ، مەركەزنىڭ شىنجاڭ خىزمىتى سۆھبەت يىغىنى شىنجاڭنىڭ يېڭى ئىستراتېگىيەلىك ئورنىنى بەلگىلەپ، شىنجاڭدىكى ھەر مىللەت خەلقىگە ھالقىما تەرەققىيات ۋە ئۇزاققىچە ئەمىنلىكىنى ئىشقا ئاشۇرۇشتىن ئىبارەت مۇھىم تارىخىي ۋەزىپىنى يۈكلىدى. بۇ ئىككى چوڭ تارىخىي ۋەزىپىنى روياپقا چىقىرىشتا پارتىيەمىز شىنجاڭدىكى ھەر مىللەت خەلقىنى ئىتتىپاقلاشتۇرۇپ، ھەممە بىر نىيەت – بىر مەقسەتتە ئورتاق نىشان ئۈچۈن تىرىشىشتەك پارتىيەنىڭ ئېسىل ئىستىلىنى جارى قىلدۇرۇپ، ئىقتىسادىي، ئىجتىمائىي تەرەققىياتنىڭ قۇدرەتلىك بىرىكمە كۈچىنى شەكىللەندۈرگەندىلا، ئىلمىي ھالقىش، كېيىنكىلەر ئالدىنقىلاردىن ئېشىپ كېتىشتەك ئۇلۇغۋار نىشاننى ئىشقا ئاشۇرغىلى بولىدۇ.
ئەمما، بىزدە ئۇزاقتىن بۇيان شەكىللىنىپ قالغان شەكىلۋازلىق، بىيۇروكراتلىق، راھەتپەرەسلىكتىن ئىبارەت خەلقنىڭ جانىجان مەنپەئەتى ۋە تەرەققىياتقا توسالغۇ بولىدىغان ‹‹ئىستىل›› نىڭ ئىجتىمائىي سەلبىي تەسىرىنىمۇ چوڭقۇر تونۇشىمىز لازىم، بۇلار ھازىر خەلق ئەڭ كۆڭۈل بۆلۈۋاتقان، ئىنكاسى ئەڭ كۈچلۈك بولۇۋاتقان، پارتىيە بىلەن خەلقنىڭ مەنپەئەتىگە زىيان يەتكۈزۈۋاتقان مەسىلىلەرنىڭ مۇھىم مەنبەسى بولۇپ، پارتىيەنىڭ خاراكتېرى، مەقسىتى ۋە ئوبرازىغا زىيان يەتكۈزۈپ، پارتىيەنىڭ پاكلىقى، جەڭگىۋارلىقى، ئۇيۇشۇشچانلىقىغا ئېغىر تەسىرلەرنى پەيدا قىلدى. شۇڭا، ئىجتىمائىي تەرەققىيات شىنجاڭدىكى ھەر مىللەت پارتىيە ئەزالىرى، كادىرلارغا سىياسىي ساپا، خىزمەت ئىقتىدارى ۋە ئىستىلى جەھەتلەردىن تېخىمۇ يۇقىرى تەلەپلەرنى قويدى. بۇ پارتىيە ئەزالىرى، كادىرلاردىن پارتىيە بىلەن ئامما ئوتتۇرىسىدىكى مۇھىم كۆۋرۈكلۈك رولىنى ياخشى جارى قىلدۇرۇشنى تەلەپ قىلىدۇ. ئىدىيەدە خەلق تۇرمۇشىنى ياخشىلاشنى گەۋدىلىك ئورۇنغا قويۇش، خەلق بىرىنچى دەيدىغان ھاكىمىيەت يۈرگۈزۈش ئىدىيەسىنى مۇستەھكەم تۇرغۇزۇش؛ سىياسەتلەرنى تۈزگەندە، ئىجرا قىلغاندا ھەر ۋاقىت خەلقنى ئويلاش، ئاساسىي قاتلامغا چوڭقۇر چۆكۈپ، ئاممىدىن ئۆگىنىپ، خەلقنىڭ ئۇلۇغ ئىجتىمائىي ئەمەلىيىتى داۋامىدا مەيدانغا كەلگەن ئەقىل – پاراسىتى ۋە كۈچىنى ھەر ۋاقىت مەركەزلەشتۈرۈشكە ئەھمىيەت بېرىش لازىم. ‹‹تىرىشىپ ئۆگەنگەندىلا، ئۆزگەرتكىلى بولىدۇ، تىرىشقاندىلا، ئۆزگەرگىلى بولىدۇ›› دېگەن ئىدىيەنى مەنىۋى ھەرىكەتلەندۈرگۈچ كۈچ قىلىپ، ئۆزگىرىش، ئۆزگەرتىش، يېڭىلىق يارىتىشقا جۈرئەت قىلىپ، تىرىشىپ ئىزدىنىپ، ئەمەلىي ئۈنۈمنى قولغا كەلتۈرۈشتەك ئىستىلنى جارى قىلدۇرۇپ، شىنجاڭ روھىنى ئەۋج ئالدۇرۇپ ۋە تەشەببۇس قىلىپ، شىنجاڭچە ئۈنۈمنى قولغا كەلتۈرۈشكە ھەر ۋاقىت تىرىشىش لازىم.
2. پارتىيەنىڭ ئىستىل قۇرۇلۇشى ئامما بىلەن بولغان مۇناسىۋەتنى قويۇقلاشتۇرۇشنىڭ مۇقەررەر تەلىپى. خەلقنىڭ ئىشلەپچىقىرىش پائالىيىتى پۈتكۈل ئىجتىمائىي پائالىيەتنىڭ ئالدىنقى شەرتى ۋە ئاساسى. خەلق يالغۇز جەمئىيەتنىڭ ماددىي بايلىقلىرى ۋە مەنىۋى بايلىقلىرىنى يارىتىپلا قالماستىن، بەلكى ئىجتىمائىي ئۆزگىرىشنىڭمۇ ھەل قىلغۇچ كۈچى. ماۋزېدۇڭ ماركسىزمنىڭ پارتىيە بىلەن ئاممىنىڭ مۇناسىۋىتىنى قويۇقلاشتۇرۇش توغرىسىدىكى قائىدىلىرىنى جۇڭگو ئىنقىلابى ئەمەلىيىتىگە جانلىق تەتبىقلاپ، پارتىيەمىزنىڭ‹‹ئاممىۋى لۇشيەنى››نى ئىجادىي ئوتتۇرىغا قويغان.
«ئاممىۋى لۇشيەن›› پارتىيەمىزنىڭ تۈپ خىزمەت لۇشيەنى ۋە رەھبەرلىك ئۇسۇلى بولۇپ، رەھبەرلىك ۋە تەدبىر بەلگىلەش جەريانىدا پۇرۇلتارىيات پارتىيەسىنىڭ پارتىيە بىلەن ئاممىنىڭ مۇناسىۋىتىنى قويۇقلاشتۇرۇشىنىڭ كونكرېتلاشتۇرۇلۇشى ۋە رېئاللاشتۇرۇلۇشى بولۇپ، پارتىيەنىڭ لۇشيەن، فاڭجېن، سىياسەتلىرى بىلەن خەلقنىڭ ئەمەلىي مەسىلىلىرىنى ھەل قىلىشنى كاپالەت بىلەن تەمىنلەيدۇ. شۇڭا پارتىيەمىز ھەر دەرىجىلىك پارتىيەلىك رەھبىرىي كادىرلاردىن مەيلى قايسى جايغا بارايلى، ئامما بىلەن قويۇق ئالاقە باغلاشنى، تەدبىر بەلگىلىگەندە خەلقنىڭ مەنپەئەتىنى چىقىش قىلىشنى، خەلقنىڭ ئارزۇ – تەلەپلىرىگە ھۆرمەت قىلىشنى، خەلق بىلەن بەك – بەك ئىتتىپاقلىشىشنى، خەلقنىڭ تۇرمۇشىغا مۇناسىۋەتلىك مەسىلىلەرنى ئىمكانىيەتنىڭ بارىچە ۋاقتىدا، ياخشى ھەل قىلىپ بېرىشنى تەلەپ قىلىپ كەلدى.
خەلق يەنە ئىجتىمائىي مۇقىملىق، مىللەتلەر ئىتتىپاقلىقىنى قوغداشتىكى يادرولۇق كۈچ. ئاساسىي قاتلامغا چوڭقۇر چۆكۈپ، ئامما بىلەن بولغان مۇناسىۋەتنى قويۇقلاشتۇرۇپ، شىنجاڭدىكى ھەر مىللەت خەلقىنىڭ تۈپ مەنپەئەتىنى قوغداش ئارقىلىق ئاممىنىڭ ئىشەنچىسى ۋە ھىمايىسىنى قولغا كەلتۈرۈش لازىم.
3. پارتىيەنىڭ ئىستىل قۇرۇلۇشى ئاپتونوم رايونىمىزدا مىللەتلەرنىڭ ئىتتىپاقلىقىنى كۈچەيتىشنىڭ مۇقەررەر تەلىپى. ئاپتونوم رايونىمىزدىكى مىللەتلەر ئىتتىپاقلىقىدا ھەر مىللەت خەلقىنىڭ ئارزۇسى، تۈپ مەنپەئەتى مەركەزلەشكەن. بىز مىللەتلەر ئىتتىپاقلىقىنى كۈچەيتىشنى پارتىيە ئەزالىرى ۋە كادىرلارنىڭ ئىستىلىغا ۋە ئاممىۋى نۇقتىئىنەزەرىگە باھا بېرىشنىڭ ئۆلچىمى قىلىشىمىز لازىم. شۇڭا، پارتىيەلىك رەھبىرىي كادىرلار ئاپتونوم رايونىمىزدا مىللەتلەر ئىتتىپاقلىقىنى كۈچەيتىشكە بولغان تونۇشى يېتەرلىك بولماسلىق، پوزىتسىيەسى قەتئىي بولماسلىق، بۇ جەھەتتىكى خىزمەتلەرنى ئەمەلىيلەشتۈرۈشتە بىپەرۋالىق قىلىش، ئاممىۋى خىزمەتلەرنى ياخشى قانات يايدۇرماسلىقتەك مەسىلىلەرنى ئەستايىدىل تېپىپ چىقىپ، مۇقىملىققا تەسىر يەتكۈزىدىغان رېئال خەۋپ، گەۋدىلىك زىددىيەت، ئاجىز ھالقىلارنى ئىنچىكە تەھلىل قىلىپ، ئاپتونوم رايونىمىزدا مىللەتلەر ئىتتىپاقلىقىنى كۈچەيتىشنىڭ مۇستەھكەم ئاساسىنى تىرىشىپ بەرپا قىلىشى لازىم. شۇنىڭ بىلەن بىر ۋاقىتتا، بارلىق پارتىيە ئەزالىرى ۋە كادىرلار‹‹ئەينەككە قاراش، ئۈستىبېشىنى تۈزەشتۈرۈش، يۇيۇنۇش، كېسەل داۋالاش››تەلىپى بويىچە ئىستىل قۇرۇلۇشىنى كۈچەيتىپ، ئاممىنىڭ رازى بولۇش – بولماسلىقىنى ئىستىل قۇرۇلۇشىنىڭ ئاساسىي قىلىپ، ھەر مىللەت ئاممىسىنىڭ ئىشەنچىسى ۋە ھىمايىسىنى قولغا كەلتۈرۈشى لازىم.
ئىستىل قۇرۇلۇشىنىڭ يادرولۇق نىشانى ئاپتونوم رايونىمىزدىكى ھەر مىللەت خەلقىنى يېتەكلەپ، گۈللەنگەن، باي، ئىناق، مۇقىم بولغان گۈزەل شىنجاڭ قۇرۇپ چىقىشتىن ئىبارەت. پارتىيە ئەزالىرى ۋە كادىرلار ئالدى بىلەن ھەر مىللەت خەلقىنىڭ مەدەنىيىتى ۋە ئۆرپ – ئادىتىگە ھۆرمەت قىلىشى، چۈشىنىشى، كەڭ قورساقلىق بىلەن مۇئامىلە قىلىشى، باشتىن – ئاخىر سەمىمىي، راستچىل، كەمتەر، جاپاغا چىداپ كۈرەش قىلىش، ھەقىقەتنى ئەمەلىيەتتىن ئىزدەش، جان – دىل بىلەن خەلق ئۈچۈن خىزمەت قىلىشتىن ئىبارەت ئېسىل ئىستىلنى جارى قىلدۇرۇپ، ئاممىنى چۈشىنىپ، ئامما ئويلىغاننى ئويلاپ، ھەر مىللەت ئاممىسى بىلەن ھەمنەپەس، تەقدىرداش بولۇشتەك مۇناسىۋەتنى ئورنىتىشقا تىرىشىشى لازىم. تەدبىرلەرنى بەلگىلىگەندە، خىزمەتلەرنى قانات يايدۇرغاندا، ھەر ۋاقىت ئاممىنىڭ مەنپەئەتىنى چىقىش قىلىپ، ھەر مىللەت خەلقىنىڭ ئارزۇ – تەلەپلىرىگە ھۆرمەت قىلىپ، ھەر مىللەت خەلقى بىلەن ئىتتىپاقلىشىشقا ئەھمىيەت بېرىپ، ھەر مىللەت خەلقىنىڭ تۇرمۇشى ۋە بەختى ئۈچۈن شارائىت يارىتىپ بېرىشىمىز لازىم.
