ئابرال تۇراسى

سەپەر

ئانا ھېلىمۇ ئېسىمدە،ئون سەككىز ياشقا كىرگەن يىلىم يىراققا سەپەرگە چىققىنىمدا قولۇمنى چىڭ تۇتىۋىلىپ قويۇپ بەرمىگىنىڭ؛كوچىنىڭ شاماللىق دۇقمۇشىدا تۇرۇپ جاھاندىكى بارلىق ئانىلارغا ئوخشاش ئۇنى،بۇنى قايتا تاپىلاپ كەتكىنىڭ.

شەرىقتىن چىققان قوياش دەل-دەرەخلەرنى ئالتۇن نۇرىغا چۈمۈلدۈرگەنگە،قۇشلار شاختىن-شاخقا قونۇپ ناخشا ئىيتقانغا قەدەر،جېنىم ئانا،قولۇمنى قويۇپ بەرمەي چىڭ تۇتۇپ تۇرغاندىڭ.

مەن ماڭماڭچى بولغان ھايات سەپىرىمدە،مىنى نۇرغۇن خېيىمخەتەرنىڭ كۈتۈپ تۇرغانلىقىنى،ئۇ يولدا نۇرغۇن خەتەرلىك ھاڭلار،نۇرغۇن ئاچا يوللار ئۇچرايدىغانلىقىنى،ھەر بىر ئاچا يولنىڭ ئاغزىغا كېلىپ قاياققا مېڭىشىمنى بىلەلمەي تېڭىرقاپ قالغىنىمدا، قايسى تەرەپكە كەتكەن يولدا ئاياق ئىزى كۆپ بولسا، شۇ تەرەپكە مېڭىشىمنى تاپىلىغاندىڭ.

لېكىن، ئانا، سەن ماڭا ئۇچرايدىغان توقسان تۇققۇز ئاچا يولنى ۋە ئۇلارنىڭ قايسىسىدا مېڭىشىمنى كۆرسىتىپ بەرگىنىڭدە،سەنمۇ،مەنمۇ بىلمەيدىغان،ئەزەلدىن مەن مېڭىپ باقمىغان،سەن ئاڭلاپ باقمىغان يۈزىنچى ئاچا يولنىڭ مېنى كۈتۈپ تۇرغانلىقىنى بىلەرسەنمۇ؟...

ئىشقىلىپ،سەن ئاخىر چىڭ تۇتۇۋالغان قولۇمنى قويۇپ بەردىڭ.مېنىڭ سەپىرىم باشلاندى.بېشىمدىن ئۆتكەن جىمى كەچمىش-كەچۈرمىشلەرگە چىن يۈرىكىڭدىن چىققان ئىشەنچ ھەمراھ بولدى،ئانا...

ئانا،بېشىمدىن ھەر خىل ىسسىق-سوغۇقلارنى ئۆتكۈزۈپ ئاخىر قايتىپ كەلدىم.گەرچە ھايات سەپىرىدىكى ئاچا يوللاردا گاڭگىرىشىم بىز باشتا قىياس قىلغاندەك ئۇنچە قورقۇنۇچلۇق بولمىسىمۇ،لېكىن مەن يەنىلا تەۋەككۈل دەرياسىغا كېمە سېلىپ زەپەر قۇچۇپ قايتىپ كەلگەن تەۋەككۈلچىگە ئايلاندىم.

قانداقلىكى بولمىسۇن،مەن سېنىڭ قانىتىڭ ئاستىدىن چىقىپ ئۇچۇرما بولغانىدىم.

ئىككىنجى قىتىملىق سەپىرىمنىڭ قاياققا بولغىنى ئېسىمدە يوق،ئەمما ئورۇق قوللىرىڭنى ئېگىز كۆتۈرۈپ پۇلاڭلىتىپ مەن بىلەن خۇشلاشقىنىڭ ھېلىمۇ ئېسىمدە.

بۇ قىتىم سەن ماڭا ئارتوقچە گەپ قىلمىدىڭ،ئانا.

ئۇنىڭدىن كېيىن مەن يەنە سەپەرگە چىقىدىغانلىقىمنى ساڭا مۇنداقلا ئىيتتىم،سەنمۇ بىر ئېغىز گەپ قىلماستىن ماڭا قاراپ بېشىڭنى لىڭشىتىپ قويدۇڭ.

مەن چاپىنىمنى كىيىپ ئىشىكتىن چىقتىم.سەنچۇ؟سەن ئاشۇ كونا ساپايىمزدىن قوزغالماستىن كەينىمدىن قاراپ قالدىڭ.

شۇ چاغدا سېنىڭ كۆزۈڭدە قالغىنى، مېنىڭ ئاستا- ئاستا يىراقلاپ كىتىۋاتقان گەۋدەم بولدى، خالاس.

+++++++++++++++++++++++++++++++++++++++++++++++++++++++++++++++++++++++++

Seper

   ana hélimu ésimde,'on sekkiz yashqa kirgen yilim yiraqqa seperge chiqqinimda qolumni ching tutiwilip qoyup bermigining;kochining shamalliq duqmushida turup jahandiki barliq anilargha oxshash uni,buni qayta tapilap ketkining.
Sheriqtin chiqqan qoyash del-derexlerni altun nurigha chümüldürgen'ge,qushlar shaxtin-shaxqa qonup naxsha iytqan'gha qeder,jénim ana,qolumni qoyup bermey ching tutup turghanding.
     Men mangmangchi bolghan hayat sepirimde,mini nurghun xéyimxeterning kütüp turghanliqini,'u yolda nurghun xeterlik hanglar,nurghun acha yollar uchraydighanliqini,her bir acha yolning aghzigha kélip qayaqqa méngishimni bilelmey téngirqap qalghinimda, qaysi terepke ketken yolda ayaq izi köp bolsa, shu terepke méngishimni tapilighanding.
   Lékin, ana, sen manga uchraydighan toqsan tuqquz acha yolni we ularning qaysisida méngishimni körsitip berginingde,senmu,menmu bilmeydighan,'ezeldin men méngip baqmighan,sen anglap baqmighan yüzinchi acha yolning méni kütüp turghanliqini bilersenmu?...
   Ishqilip,sen axir ching tutuwalghan qolumni qoyup berding.méning sepirim bashlandi.béshimdin ötken jimi kechmish-kechürmishlerge chin yürikingdin chiqqan ishench hemrah boldi,'ana...
     Ana,béshimdin her xil issiq-soghuqlarni ötküzüp axir qaytip keldim.gerche hayat sepiridiki acha yollarda ganggirishim biz bashta qiyas qilghandek unche qorqunuchluq bolmisimu,lékin men yenila tewekkül deryasigha kéme sélip zeper quchup qaytip kelgen tewekkülchige aylandim.
     Qandaqliki bolmisun,men séning qaniting astidin chiqip uchurma bolghanidim.
Ikkinji qitimliq sepirimning qayaqqa bolghini ésimde yoq,'emma oruq qolliringni égiz kötürüp pulanglitip men bilen xushlashqining hélimu ésimde.
     Bu qitim sen manga artoqche gep qilmiding,'ana.
    Uningdin kéyin men yene seperge chiqidighanliqimni sanga mundaqla iyttim,senmu bir éghiz gep qilmastin manga qarap béshingni lingshitip qoydung.
    Men chapinimni kiyip ishiktin chiqtim.senchu?sen ashu kona sapayimzdin qozghalmastin keynimdin qarap qalding.
Shu chaghda séning közüngde qalghini, méning asta- asta yiraqlap kitiwatqan gewdem boldi, xalas.

+++++++++++++++++++++++++++++++++++++++++++++

сәпәр
 

     ана һелиму есимдә,он сәккиз яшқа киргән йилим йираққа сәпәргә чиққинимда қолумни чиң тутивилип қоюп бәрмигиниң;кочиниң шамаллиқ дуқмушида туруп җаһандики барлиқ аниларға охшаш уни,буни қайта тапилап кәткиниң.
    шәриқтин чиққан қояш дәл-дәрәхләрни алтун нуриға чүмүлдүргәнгә,қушлар шахтин-шахқа қонуп нахша ийтқанға қәдәр,җеним ана,қолумни қоюп бәрмәй чиң тутуп турғандиң.
   мән маңмаңчи болған һаят сәпиримдә,мини нурғун хейимхәтәрниң күтүп турғанлиқини,у йолда нурғун хәтәрлик һаңлар,нурғун ача йоллар учрайдиғанлиқини,һәр бир ача йолниң ағзиға келип қаяққа меңишимни биләлмәй теңирқап қалғинимда, қайси тәрәпкә кәткән йолда аяқ изи көп болса, шу тәрәпкә меңишимни тапилиғандиң.
   лекин, ана, сән маңа учрайдиған тоқсан туққуз ача йолни вә уларниң қайсисида меңишимни көрситип бәргиниңдә,сәнму,мәнму билмәйдиған,әзәлдин мән меңип бақмиған,сән аңлап бақмиған йүзинчи ача йолниң мени күтүп турғанлиқини биләрсәнму?...
   ишқилип,сән ахир чиң тутувалған қолумни қоюп бәрдиң.мениң сәпирим башланди.бешимдин өткән җими кәчмиш-кәчүрмишләргә чин йүрикиңдин чиққан ишәнч һәмраһ болди,ана...
ана,бешимдин һәр хил иссиқ-соғуқларни өткүзүп ахир қайтип кәлдим.гәрчә һаят сәпиридики ача йолларда гаңгиришим биз башта қияс қилғандәк унчә қорқунучлуқ болмисиму,лекин мән йәнила тәвәккүл дәрясиға кемә селип зәпәр қучуп қайтип кәлгән тәвәккүлчигә айландим.
    қандақлики болмисун,мән сениң қанитиң астидин чиқип учурма болғанидим.
иккинҗи қитимлиқ сәпиримниң қаяққа болғини есимдә йоқ,әмма оруқ қоллириңни егиз көтүрүп пулаңлитип мән билән хушлашқиниң һелиму есимдә.
    бу қитим сән маңа артоқчә гәп қилмидиң,ана.
униңдин кейин мән йәнә сәпәргә чиқидиғанлиқимни саңа мундақла ийттим,сәнму бир еғиз гәп қилмастин маңа қарап бешиңни лиңшитип қойдуң.
   мән чапинимни кийип ишиктин чиқтим.сәнчу?сән ашу кона сапайимздин қозғалмастин кәйнимдин қарап қалдиң.
шу чағда сениң көзүңдә қалғини, мениң аста- аста йирақлап китиватқан гәвдәм болди, халас.