مۇخبىرىمىز گۈلمىرە مۇھەممەد خەۋەر قىلىدۇ: ئاپتونوم رايونلۇق ئىتتىپاق كومىتېتى بىلەن ئاپتونوم رايونلۇق ياشلار بىرلەشمىسى ئاپتونوم رايونىمىز قۇرۇلغانلىقىنىڭ 60 يىللىقىنى تەبرىكلەش، ياش تور خىزمەتچىلىرىنىڭ بىرلىك سەپ خىزمىتىنى كۈچەيتىش مەقسىتىدە، 21 – سېنتەبىر چۈشتىن كېيىن، ئاپتونوم رايونىمىزدىكى ياش تور خىزمەتچىلىرىنىڭ ئاپتونوم رايونىمىز قۇرۇلغانلىقىنىڭ 60 يىللىقىنى تەبرىكلەش سۆھبەت يىغىنى ئۇيۇشتۇردى. بۇ قېتىمقى سۆھبەت يىغىنىغا «مىسرانىم»، «چىمبۇلاق»، «نۇر»، «باغداش»، «ياشىن»، «شالقار» قاتارلىق ئۇيغۇر، خەنزۇ، قازاق تىلىدىكى تور بېكەتلىرىدىن كەلگەن 50 ئادەم قاتناشتى. سۆھبەت يىغىنىدا كۆپچىلىك بىردەك ئاپتونوم رايونىمىز قۇرۇلغانلىقىنىڭ 60 يىللىقىنى تەبرىكلەش تەشۋىقات ئىشلىرىنى چىڭ تۇتۇپ ئىشلەيدىغانلىقىنى، ئاكتىپ كۈچ تارقىتىپ ئاپتونوم رايونىمىزدا ساغلام تور مۇھىتى يارىتىش ئۈچۈن كۈچ چىقىرىدىغانلىقىنى بىلدۈرۈشتى.
ئۇقۇشىمچە، 2014 – يىلى 12–ئايغىچە ئاپتونوم رايونىمىزدىكى تور ئەھلى 11 مىليون 390 مىڭغا يېتىپ، ئومۇمىي نوپۇسنىڭ %57.9 ىنى ئىگىلىگەن. ئىنتېرنېت تورىنىڭ قاپلىنىش نىسبىتى %50.3 كە يېتىپ، مەملىكەت بويىچە 10–ئورۇندا، غەربىي رايون بويىچە 1–ئورۇندا تۇرغان. كەڭ بەلباغ ئاپتونوم رايونىمىزدىكى%70 كەنتتە ئومۇملىشىپ، يان تېلېفون ئابۇنىچىلىرى %91.3 كە يەتكەن. ئىنتېرنېت تورى ئاپتونوم رايونىمىزدىكى ھەر مىللەت ياشلىرىنىڭ جەمئىيەتنى كۆزىتىش ۋە تونۇش، ئۇچۇر تارقىتىش ۋە قوبۇل قىلىشتىكى ئاساسلىق ۋاسىتىگە ئايلانغان.
شىنجاڭ «باغداش» تور بېكىتىنىڭ قۇرغۇچىسى ئەكبەرجان ئابدۇراخمان مۇنداق دېدى: «يېڭى تاراتقۇلار جەمئىيەت مۇقىملىقىنى قوغداش مەسئۇلىيىتىنى زىممىسىگە ئېلىپ، تور ئەھلىنى ساغلام، توغرا ئۇچۇرلار بىلەن يېتەكلەپ، جەمئىيەتتە ئاكتىپ كۈچ تارقىتىش ئۈچۈن تىرىشىشى كېرەك.»
ئەسلى مەنبەسى: http://uy.ts.cn/news/content/2015-09/24/content_457144.htm
