دۆلەت رەئىسى شى جىنپىڭ 22-ماي شاڭخەي ئىران زۇڭتۇڭى روھانى بىلەن سۆھبەت ئۆتكۈزدى . سۆھبەتتىن بۇرۇن ، شى جىنپىڭ شاڭخەي غەربىي شەھەر يىغىن مەركىزىنىڭ مەيدانىدا مۇراسىم ئۆتكۈزۈپ ، روھانىنى قارشى ئالدى

 دۆلەت رەئىسى شى جىنپىڭ 22-ماي شاڭخەيدە ئىران زۇڭتۇڭى روھانى بىلەن سۆھبەت ئۆتكۈزدى . ئىككى دۆلەت باشلىقلىرى جۇڭگو-ئىران مۇناسىۋىتىنى ئورتاق پىلانلاپ ، قول تۇتۇشۇپ تىرىشىپ ، ھەرقايسى ساھەلەردىكى دوستانە ھەمكارلىقنى يېڭى باسقۇچقا كۆتۈرۈشكە تۈرتكە بولۇشنى قارار قىلدى . شى جىنپىڭ تەكىتلەپ مۇنداق دېدى : جۇڭگو تەرەپ ئىراننىڭ يادرو مەسىلىسىنى بالدۇرراق مۇۋاپىق ھەل قىلىش ئۈچۈن داۋاملىق تۆھپە قوشۇشنى خالايدۇ .

شى جىنپىڭ مۇنۇلارنى بىلدۈردى : جۇڭگو بىلەن ئىراننىڭ ئەنئەنىۋى دوستلۇقى ، ھەمكارلىق يۇشۇرۇن كۈچى زور . جۇڭگو تەرەپ ئىككى دۆلەت مۇناسىۋىتىنى تەرەققىي قىلدۇرۇشقا يۈكسەك ئەھمىيەت بېرىدۇ ، ئىران تەرەپ بىلەن ئورتاق تىرىشىپ، جۇڭگو-ئىران مۇناسىۋىتىنى يېڭى سەۋىيەگە كۆتۈرۈشنى خالايدۇ . ئىككى تەرەپ يۇقىرى قاتلاملار ئالاقىسىنى داۋاملىق ساقلاپ ، ئىككى دۆلەت ھۆكۈمەتلىرى ، پارلامېنتلىرى ، يەرلىك ، خەلقلەر ئارا بېرىش-كېلىشكە تۈرتكە بولۇشنى ، چۈشىنىش ۋە ئۆزئارا ئىشىنىشنى چوڭقۇرلاشتۇرۇپ ، سودا ئالاقىسىنى كېڭەيتىپ ، ماي-گاز ، نېفىت-خىمىيە ھەمكارلىقىغا مۇقىم قەدەمدە تۈرتكە بولۇشى كېرەك .

تارىختا ، جۇڭگو-ئىران ئىككى دۆلەت خەلقى يىپەك يولى ئارقىلىق دوستانە بېرىش-كېلىشنى قانات يايدۇرغان . جۇڭگو تەرەپ ئىران تەرەپنىڭ يىپەك يولى ئىقتىساد بەلبېغى ۋە 21-ئەسىر دېڭىز ئۈستى يىپەك يولى قۇرۇلۇشىغا ئاكتىپ قاتنىشىپ ، ئۇل ئەسلىھەلەر قۇرۇلۇشى قاتارلىق ساھەلەردىكى ھەمكارلىققا تۈرتكە بولۇپ ، يۇقىرى سۈرەتلىك تۆمۈريول ، ئىقتىساد باغچا رايونى قاتارلىق تۈرلەرنى باشلىشىنى قارشى ئالىدۇ . ئىككى تەرەپ بىخەتەرلىك ھەمكارلىقىنى كۈچەيتىپ ، تېررورىزم ، زەھەرلىك بۇيۇملار ۋە دۆلەت ھالقىغان جىنايەتلەرگە ئورتاق زەربە بېرىشى كېرەك . جۇڭگو بىلەن ئىران مەدەنىيەت قەدىمىي دۆلەتلەر بولۇپ ، ئادىمىيەت ئالماشتۇرۇشىنى كۈچەيتىپ ، مەدەنىيەت مەركەزلىرىنى بالدۇرراق قۇرۇپ، ساياھەت ھەمكارلىقىنى ئىلگىرى سۈرۈشى كېرەك.