2004-يىلىنىڭ باشلىرى ئىشلەنگەن «تەڭرىتاغ جىددىي ھەرىكەتتە» ناملىق 28 قىسىملىق تېلىۋىزىيە تىياتىرىدا مەككار، قارانىيەت سانىيەنىڭ سىرلىق ھەم مۇرەككەپ سەلبىي ئوبرازىنى ئىنتايىن يۇقىرى ماھارەت بىلەن جانلىق ھەم تەسىرلىك يارىتىپ كەسىپداشلىرى ھەم تاماشىبىنلار ئارىسىدا زور تەسىر قوزغىغان بىر ياش ئاكتىيور بار، ئۇ بولسىمۇ شىنجاڭ ئوپىرا ئۆمىكىنىڭ خەلققە تونۇلغان تالانتلىق ياش كىنو-تىياتىر ئاكتىيورى ئايشەمگۈل مەمتىلىدۇر.

        ئايشەمگۈل مەمتىلى 1977-يىلى 6-ئاينىڭ 28-كۈنى ئۈرۈمچىدە تۇغۇلغان. ئۇ كىچىكىدىنلا سەنئەتكە چوڭقۇر ئىشتىياق باغلىغاچقا 1994-يىلى ئوتتۇرا مەكتەپنى پۈتتۈرگەندىن كېيىن، مەركىزىي تىياتىر ئىنىستىتۇتىنىڭ ئاكتىيورلۇق كەسپىگە قوبۇل قىلىندى. ئۇ 1998-يىلى مەكتەپ پۈتتۈرۈپ شىنجاڭ ئوپىرا ئۆمىكىگە تەقسىم قىلىندى، ئۆز كەسپىدە مۇۋەپپەقىيەت قازىنىشقا كۈچلۈك ئىرادە باغلىغان بۇ تالانت ئىگىسى ئىلگىرى-ئاخىرى بولۇپ «مۇھەببەت ھەققىدە رىۋايەت»، «كېيىنكى ئاتا»، «مۇز تاغقا كەلگەن مېھمان» قاتارلىق دراممىلار، «چىڭگىزخان»، «گۈزەل تۈلكە يوۋلى» قاتارلىق كىنو فىلىملىرى ۋە 30 قىسىملىق تېلىۋىزىيە تىياتىرى «جەننەت چۈشى» 28 قىسىملىق تېلىۋىزىيە تىياتىرى «تەڭرىتاغ جىددىي ھەرىكەتتە»، ئىككى قىسىملىق تېلىۋىزىيە تىياتىرلىرىدىن «ئۆچكەن يۇلتۇز»، «سەرسان روھ»، يېڭىدىن ئىشلەنگەن «ئانارخان» فىلىمى، شۇنداقلا «كاتىپ تاللاش»، «خاتا چاي»، «لايىق تاللاش»، «مەردنى مەيداندا سىنا»، «تىلەك»، «مېنىڭ قوشنام»، «ئىنساب»، «ساختىپەز» قاتارلىق كۆپلىگەن ئىتوتلاردا ئوخشاش بولمىغان پىرسوناژلارنىڭ ئوبرازىنى ناھايىتى جانلىق ھەم تۇرمۇشلۇق يارىتىپ تاماشىبىنلاردا ئۇنتۇلغۇسىز تەسىراتلارنى قالدۇردى.