بەرەڭگە تەركىبىدە كۆپ مىقداردا كىراخمال بولغاچقا،  قان شېكىرىنىڭ سەۋىيەسىگە سەلبىي تەسىر كۆرسىتىدىكەن. ھەر ھەپتىدە ئىككى قېتىملىق بەرەڭگىنى باشقا كۆكتاتلارغا ئالماشتۇرغاندا، ھامىلىدارلىق مەزگىلىدە دىيابېت كېسىلىگە گىرىپتار بولۇش نىسبىتىنى تەخمىنەن %10 ئەتراپىدا تۆۋەنلەتكىلى بولىدىكەن.

        فرانسىيە تاراتقۇلىرىنىڭ خەۋەر قىلىشىچە، 6-يانۋار ئېلان قىلىنغان بىر تۈرلۈك تەتقىقات نەتىجىسىدە كۆرسىتىلىشىچە، بەرەڭگىنى، بولۇپمۇ بەرەڭگە قەلەمچىسى ۋە بەرەڭگە ياپراقچىسىنى كۆپ ئىستېمال قىلغاندا، ئاياللارنىڭ ھامىلىدارلىق مەزگىلىدىكى دىيابېت كېسىلىگە گىرىپتار بولۇش خەتىرى يۇقىرى بولىدىكەن.

     فرانسىيە ئاخبارات ئاگېنتلىقىنىڭ 12-يانۋار خەۋەر قىلىشىچە، ھامىلىدارلىق مەزگىلىدىكى دىيابېت كېسىلى ئانا-بالىنىڭ ساغلاملىقىغا ئۇزۇن مەزگىل تەسىر يەتكۈزىدىغان بولۇپ، يۈرەك كېسىلى ۋە باشقا تۈردىكى دىيابېت كېسىلىگە گىرىپتار بولۇش خەتىرىنى ئاشۇرۇۋېتىدىكەن.

   خەۋەردە ئېيتىلىشىچە، بەرەڭگىنىڭ پۈتۈن دۇنيادىكى ئىستېمال مىقدارى ئىنتايىن يۇقىرى بولۇپ، تەركىبىدە ۋىتامىن C ۋە كالىي قاتارلىق مۇھىم ئوزۇقلۇق ئېلېمېنتلار بار ئىكەن.

       ھالبۇكى، باشقا كۆكتاتلار ۋە كاربون سۇ بىرىكمىلىرى بىلەن سېلىشتۇرغاندا، بەرەڭگىنىڭ تەركىبىدە كىراخمال بىر قەدەر كۆپ بولۇپ، بەرەڭگە ئىستېمال قىلغاندىن كېيىن قان شېكىرىنىڭ ئۆرلىشى تېخىمۇ تېز بولىدىكەن.

   ئومۇملاشتۇرۇپ ئېيتقاندا، ئادەم بەدىنى يېتەرلىك ئىنسۇلىن ئىشلەپچىقىرالمىغاندا، ئادەم دىيابېت كېسىلىگە گىرىپتار بولىدۇ. ئىنسۇلىن بولسا ئادەم بەدىنىدىكى ھۈجەيرىلەر قان سۇيۇقلۇقىدىن قەنتنى سۈمۈرۈپ، بەدەننى ئېنېرگىيە بىلەن تەمىنلەيدىغان ھەمدە ئېنېرگىيەنى ساقلايدىغان بىر خىل ھورمۇن.

   خەۋەردە ئېيتىلىشىچە، بۇندىن بۇرۇن، تەتقىقاتچىلار ھامىلىدار دىيابېت بىمارلىرى ۋە بەرەڭگە ئىستېمال قىلىش ئوتتۇرىسىدىكى مۇناسىۋەت توغرىسىدا مەخسۇس تەكشۈرۈپ ئېلىپ بارمىغان بولۇپ، ئىككىسىنىڭ مۇناسىۋىتىنى ئېنىقلاش ئۈچۈن، ئامېرىكا مارىلاند شتاتى روكۋىل دۆلەتلىك سەھىيە تەتقىقات يۇرتى جاڭ سۈيلىن باشچىلىقىدىكى تەتقىقات گۇرۇپپىسى 1991-يىلىدىن 2001-يىلىغىچە بولغان ئارىلىقتا ھامىلىدار بولغان، ئىلگىرى ھامىلىدارلىق دىيابېت كېسىلى بولمىغان ۋە باشقا ئاستا خاراكتېرلىك كېسەللىك تارىخى بولمىغان 15632 ئايالنىڭ سالامەتلىك ئەھۋالىنى ئانالىز قىلغان.

   ‹‹ئەنگلىيە مېدىتسىنا ژۇرنىلى›› ئېلان قىلغان تەتقىقاتتا كۆرسىتىلىشىچە، 21693 قېتىملىق يالغۇز ھامىلىگە ھامىلىدار بولغانلار ئىچىدە، 854 نەپىرى ھامىلىدارلىق دىيابېت كېسىلىگە گىرىپتار بولغان.

   خەۋەردە ئېيتىلىشىچە، تەتقىقاتچىلار بۇ ئاياللارنىڭ ھامىلىدار بولۇشتىن بۇرۇنقى بىر يىلدىكى بەرەڭگە ئىستېمال قىلىش ئەھۋالىنى تەكشۈرۈپ، بەرەڭگە ئىستېمال قىلىش ئەھۋالىنى ‹‹ئەزەلدىن يوقتىن ھەر ئايدا ئاز دېگەندە بىر قېتىم›› دىن ‹‹ھەر كۈنى ئالتە قېتىم›› غىچە بىر نەچچە دەرىجىگە بۆلۈپ، بەرەڭگە ئىستېمال قىلىشقا دائىر سانلىق مەلۇماتلار بىلەن ھامىلىدارلىق دىيابېت كېسىلى خاتىرىسىنى سېلىشتۇرغان.

   تەكشۈرۈشكە قاتناشقانلارنىڭ يېشى ۋە دىيابېت كېسىلى جەمەت تارىخى قاتارلىق ئامىللارنىمۇ ئويلىشىش ئارقىلىق، تەتقىقاتچىلار بەرەڭگە، بولۇپمۇ مايدا پىشۇرۇلغان ياكى قاقلاپ پىشۇرۇلغان بەرەڭگە بىلەن ھامىلىدارلىق دىيابېت كېسىلىنىڭ ئىنتايىن چوڭ مۇناسىۋىتى بارلىقىنى بايقىغان.

     تەتقىقاتچىلار خۇلاسىلەپ، «بەرەڭگە ئىستېمالىنىڭ يۇقىرى بولۇشى بىلەن ھامىلىدارلىق دىيابېت كېسىلىگە گىرىپتار بولۇش خەتىرىنىڭ كۆرۈنەرلىك مۇناسىۋىتى بار» دېگەن قاراشقا كەلگەن.

   دوختۇرلار ھامىلىدارلىق دىيابېت كېسىلىنىڭ ئالامەتلىرى كۆرۈلگەن ئاياللارنىڭ يېمەك-ئىچمەك ۋە چېنىقىش ئارقىلىق كونترول قىلىشىنى، ئېغىر بولغانلىرى ئىنسۇلىننى ئوكۇل قىلىپ ئۇرۇش ئارقىلىق داۋالىنىشى كېرەكلىكىنى تەۋسىيە قىلغان.

   تەتقىقاتچىلار بولسا، بۇ مەسىلىنى ھەل قىلىش ئۈچۈن، كىراخمال تۈرىدىكى بەرەڭگىنى باشقا كۆكتاتلارغا ئالماشتۇرۇشنى تەۋسىيە قىلغان.

   تەتقىقاتچىلارنىڭ ئېيتىشىچە، ھەر ھەپتىدە ئىككى قېتىملىق بەرەڭگىنى باشقا كۆكتاتلارغا ئالماشتۇرغاندا، ھامىلىدارلىق مەزگىلىدە دىيابېت كېسىلىگە گىرىپتار بولۇش نىسبىتىنى تەخمىنەن %10 ئەتراپىدا تۆۋەنلەتكىلى بولىدىكەن.

   گەرچە يۇقىرىدىكى ستاتىستىكا ئىسپاتلىرى بولسىمۇ، تەتقىقاتچىلارنىڭ بىلدۈرۈشىچە، بەرەڭگە ئىستېمال قىلىش بىلەن ھامىلىدارلىق دىيابېت كېسىلى ئوتتۇرىسىدا بىۋاسىتە سەۋەب-نەتىجە مۇناسىۋىتى يوق ئىكەن. بىراق، بەرەڭگىنىڭ تەركىبىدە كىراخمال كۆپ بولغاچقا، قان شېكىرىنىڭ سەۋىيەسىگە سەلبىي تەسىر كۆرسىتىدىكەن.