جاھان ئاگېنتلىقى 14-ماي خەۋىرى؛ لەگلەك تورى تەرجىمىسى: ئافرىقا ئىتتىپاقى كومىتىتى باشلىقى نكوسازانا دلامىنى زۇما، بۇرۇندىدا سابىق باش شىتاب باشلىقى رەھبەرلىكىدە يۈز بەرگەن ھەربىي ئىنقىلابنى ئەيىبلىدى. زۇما، ئافرىقا ئىتتىپاقىنىڭ ئاساسى قانۇنغا زىت ھەرىكەتلەرگە قارشى ئىكەنلىكى ۋە دېموكراتىيەگە ھۆرمەت قىلىدىغانلىقىنى بىلدۈرۈپ،« ئافرىقا ئىتتىپاقى شەرقى ئافرىقا ئەللىرىنىڭ كىرزىسنى ھەل قىلىش ئۈچۈن كۆرسەتكەن تىرىشچانلىقلىرى ۋە تانزانىيەدىكى يىغىندا قارار قىلغان پىلانلىرىنى قوللايدۇ» دېدى. زۇما، بۇرۇندىدىكى ئالاقىدار تەرەپلەرنى، زوراۋانلىق ۋەقەلىرىنىڭ ئاخىرلىشىشى، ئىنسانى ھۇقۇق ۋە ئەركىنلىككە ھۆرمەت قىلىنىشى ئۈچۈن ئاساسى قانۇن رامكىسىدا يارىشىش ۋە شەرقى ئافرىقا بىرلەشمىسى يىغىنىدا ماقۇللانغان قارارلارغا ماسلىشىشقا چاقىرىق قىلىپ، ئەكسىچە بولغاندا بۇ ۋەزىيەتنىڭ رايۇننىڭ مۇقىملىقىغا سەلبىي تەسىر يەتكۈزىدىغانلىقى ۋە دېموكراتىك سايلام ئۈچۈن ساغلام مۇھىت يارىتىشقا توسقۇنلۇق قىلىدىغانلىقىنى بىلدۈردى.
بۇرۇندى پرېزىدېنتى نكۇرۇنزىزا دۆلىتىدىكى كىرزىسقا سىياسىي ھەل قىلىش چارىسى تېپىش ئۈچۈن تۈنۈگۈن تانزانيەدە ئۆتكۈزۈلگەن شەرقى ئافرىقا ئەللىرى يىغىنىغا قاتنىشىش ئۈچۈن بارغان ئىدى. پرېزىدېنت نكۇرۇنزىزا، بۇرۇندىدا ھەربي ئۆزگىرىش خەۋىرى تارقالغاندىن كېيىن دۆلىتىگە قايتقان ئەمما بۇرۇندى ھاۋا تەۋەلىكىگە كىرىشى چەكلەنگەن بولۇپ تانزانىيەگە قايتىپ كەتكەن.
سابىق باش شىتاب باشلىقى نىيامبورا پايتەخت بۇجۇمبۇرادا پرېزىدېنت نكۇرۇنزىزانىڭ ۋەزىپىسىدىن ئېلىپ تاشلانغانلىقىنى، ھۆكۈمەتنىڭ تارقىتىۋېتىلگەنلىكىنى جاكارلىغان ئىدى. بۇرۇندى پرېزىدېنتىنىڭ ئېلان قىلغان باياناتىدا، ھەربي ئۆزگىرىشنىڭ مەغلۇب بولغانلىقى بىلدۈرۈلگەن ئىدى.