ئەنگلىيە رېيتېر ئاگېنتلىقىنىڭ 8-مايدىكى خەۋىرىگە قارىغاندا، نىگېرىيە ساقچىلىرى يېقىندا ئەسەبىي تەشكىلات بوكو ھەرەم تەرىپىدىن تۇتقۇن قىلىنغان ئوتتۇرا مەكتەپنىڭ 223 قىز ئوقۇغۇچىسىنىڭ ئىز-دېرىكىنى تاپالىغانلارغا 300 مىڭ ئامېرىكا دوللىرىغا مۇكاپات بېرىدىغانلىقىنى جاكارلىدى. دەرغەزەپ بولغان ئاتا-ئانىلار «بالىلىرىمىزنى قايتۇرۇپ كېلەيلى» دېگەن ھەرىكەتنى قوزغاپ، يەر شارىدىكى نۇرغۇن داڭلىق ئەربابلار ۋە سىياسىيونلارنىڭ قوللىشىغا ئېرىشتى. يېقىندا، جۇڭگو، ئەنگلىيە، فىرانسىيە، ئامېرىكا نىگېرىيە ھۆكۈمىتىگە ياردەم قولىنى سۇنۇپ، بۇ قىزلارنى قۇتقۇزۇشقا ياردەم بېرىدىغانلىقىنى بىلدۈردى.

بىر توپ قوراللىق ئۇنسۇر 14-ئاپرېل نىگېرىيەنىڭ شەرقىي شىمالىدىكى بورنو ئىشتاتى چىبوك بازىرىدىكى بىر ئوتتۇرا مەكتەپنىڭ ئوقۇغۇچىلار ياتىقىغا بېسىپ كىرىپ، ئۇخلاۋاتقان 12 ياشتىن 17 ياشقىچە بولغان 276 قىز ئوقۇغۇچىنى مەجبۇرىي ماشىنىغا چىقارغان. ئۇلار ھەربىيلەر بىلەن قىسقىغىنا ئېتىشقاندىن كېيىن، ماشىنىنى ھەيدەپ قويۇق ئورمانلىققا كىرىپ كەتكەن. نىگېرىيە ھۆكۈمىتى قوشۇن ئەۋەتىپ ئورمانلىققا بېرىپ قۇتقۇزماقچى بولغان بولسىمۇ، لېكىن قوراللىق ئۇنسۇرلار تەرىپىدىن چېكىندۈرۈلگەن. ھازىرغىچە، 53 قىز ئوقۇغۇچىنىڭ قېچىپ كەتكەنلىكى ئېنىقلاندى، لېكىن يەنە 223 قىز ئوقۇغۇچىنىڭ ئىز-دېرىكى يوق.

نىگېرىيەدىكى ئەسەبىي تەشكىلات بوكو ھەرەم 5-ماي بىر ۋىدىيودا بۇ ئىشنى ئۆزلىرىنىڭ قىلغانلىقىنى ئاشكارىلىدى. بۇ تەشكىلاتنىڭ باشلىقى شىكاۋۇ ۋىدىيودا، نىگېرىيە غەربچە مائارىپنى توختىتىشى كېرەك، بولمىسا مەن بازاردا تۇتقۇن قىلىۋالغان قىز ئوقۇغۇچىلارنى قۇل سۈپىتىدە سېتىۋېتىمەن دېدى.

بۇ تېررورچىلار نېمە ئۈچۈن قىز ئوقۇغۇچىلارنى تۇتقۇن قىلىدۇ؟ ئىگىلىنىشىچە، بوكو ھەرەم تەشكىلاتىنىڭ مەقسىتى غەربچە مائارىپنى چەكلەش بولۇپ، ئۇلار نىگېرىيە تالىبانلىرى دەپ ئاتىلىدىكەن. غەربچە مائارىپقا قارشى تۇرغانلىقتىن، مەكتەپ ئۇلارنىڭ ھۇجۇم نىشانىغا ئايلانغان، بۇ تەشكىلاتنىڭ تېررورچىلىرى دائىم يېرىم كېچىدە ئالىي مەكتەپ ئوقۇغۇچىلىرىنىڭ ياتاقلىرىغا تۇيۇقسىز ھۇجۇم قىلىپ، قولىدا تۆمۈرنىڭ سۇنۇقىمۇ يوق ئوقۇغۇچىلارنى ئۆلتۈرىدىكەن. ئامېرىكا دۆلەت ئىشلىرى مەھكىمىسى 2010-يىلى 8-ئايدا بۇ تەشكىلاتنى تېررورلۇق تەشكىلات قاتارىغا كىرگۈزگەن. بۇلتۇر 3-ئايدا، ئامېرىكا دۆلەت ئىشلىرى مەھكىمىسى بۇ تەشكىلاتنىڭ باشلىقى شىكاۋۇنى تۇتۇپ بەرگۈچىلەرگە يەتتە مىليون ئامېرىكا دوللىرى مۇكاپات بېرىدىغانلىقىنى جاكارلىغان.

ئامېرىكا دۆلەت ئىشلىرى مەھكىمىسىنىڭ باياناتچىسى خاف 5-ماي ئاخباراتتىن تەڭ بەھرىمەن بولۇش ئۇسۇلى بىلە نىگېرىيەنىڭ تېررورلۇققا قارشى تۇرۇشىغا ياردەم بېرىمىز دېدى. 7-ماي جۇڭگو، ئەنگلىيە، فىرانسىيەمۇ قۇتقۇزۇش ھەرىكىتىگە قاتنىشىدىغانلىقىنى بىلدۈردى. نىگېرىيە زۇڭتۇڭى جوناتان زىيارەتكە بارغان جۇڭگونىڭ زۇڭلىسى لى كېچياڭ بىلەن سۆھبەتلەشكەندىن كېيىن، جۇڭگو نىگېرىيەگە سۈنئىي ھەمراھ ۋە ئاخبارات تارماقلىرى ئېرىشكەن كېرەكلىك ئاخباراتلار بىلەن تەمىنلەشكە ماقۇل بولدى دېدى.

فىرانسىيەمۇ مەخسۇس قۇتقۇزۇش ئەترىتىنى نىگېرىيەگە ئەۋەتىمىز دېدى. ئەنگلىيەمۇ سۈنئىي ھەمراھ ئارقىلىق سۈرەت ھاسىل قىلىش ئىقتىدارى بار ئۈسكۈنە ئورۇنلاشتۇرۇشقا قوشۇلدى.
بوكو ھەرەم تەشكىلاتى 6-ماي يەنە بىر قېتىم نىگېرىيە ھۆكۈمىتىگە ئىغۋاگەرچىلىك قىلدى. بىر توپ قوراللىق ئۇنسۇر ئاپتوماتىك مىلتىق بىلەن شەرقىي شىمالدىكى بىر سودا بازىرىنى غالجىرلارچە ئوققا تۇتتى. بۇندىن باشقا، ئۇلار يەنە ئۆي ۋە ماشىنىلارنى كۆيدۈردى، ھەتتا ئادەملەرنىڭ بوينىنى ئۈزۈپ تاشلاپ، 310 ئادەمنىڭ جېنىغا زامىن بولدى. نىگېرىيەنىڭ كېڭەش پالاتا ئەزاسى ئەھمەد بۇ پاجىئە يۈز بەرگەن بازاردا تۇرۇشلۇق ئارمىيە بىلەن ساقچىلار يوقاپ كەتكەن ئوقۇغۇچىلارنى ئىزدەشكە كېتىپ قالغانلىقتىن، پۈتكۈل بازارنى قوغدايدىغان ئارمىيە ۋە ساقچىلار قالمىغان دېدى.

شۇنداق دېيىشكە بولىدۇكى، ھۆكۈمەت ئارمىيەسى پۈتۈن كۈچى بىلەن تازىلىغان بولسىمۇ، لېكىن بوكو ھەرەم تەشكىلاتىنىڭ يەنىلا خالىغان چاغدا، خالىغان جايدا خالىغانچە تېررورلۇق ھۇجۇمىنى تەشكىللەپ يولغا قويۇش ئىقتىدارى بار بولۇپ، ئېغىر ئۆلۈم-يېتىم ۋە جەمئىيەتتە ساراسىمە پەيدا قىلدى. ئەمەلىيەتتە، خەلقئارا جەمئىيەت نىگېرىيەنىڭ تېررورلۇققا قارشى تۇرۇش ئىقتىدارىنى ئۇزۇندىن بۇيان ئەيىبلەپ كەلگەن. بوكو ھەرەم تەشكىلاتىنىڭ نىگېرىيەنىڭ شەرقىي شىمالىدا ھەرىكەت قىلغىنىغا بەش يىل بولدى. بۇلتۇر 5-ئايدا، نىگېرىيە زۇڭتۇڭى جوناتان نۇرغۇن قوشۇننى شەرقىي شىمالدىكى بورنو، يوبى، ئاداماۋا ئىشتاتلىرىغا يۈرۈش قىلىپ، بوكو ھەرەم تەشكىلاتىنى تازىلاشقا بۇيرۇغان.

بىر يىلغا يېقىن ۋاقىت ئۆتۈپ كەتتى، بوكو ھەرەم تەشكىلاتى چەتئەللەر ئويلىغاندەك ئورمانلارنىڭ ئىچكىرىسىگە يوشۇرۇنۇۋالماستىن، بەلكى گازارمىلارغا ئارقىمۇ-ئارقا ھۇجۇم قىلىپ، مەكتەپلەرنى قانغا بوياپ، زەنجىرسىمان ماشىنا بومبا پارتلاتتى، ئارمىيە نىشانلىرىغا نۇقتىلىق ھۇجۇم قوزغىدى. بۇ يىل كىرگەندىن بۇيان، شەرقىي شىمالدىكى تېررورلۇق ھۇجۇملىرىدا مىڭدىن ئارتۇق ئادەم قازا قىلدى، ئېغىر خەتەر ئىچىدە قالغان جايلاردىكى مەكتەپلەر تاقالدى، شۇ جايلاردىكى نەچچە ئون مىڭ ئامما يۇرت-ماكانسىز قالدى، ھەتتا قوشنا دۆلەتلەرگە كۆچۈپ، مۇساپىرلارغا ئايلاندى.