شىنجاڭ گېزىتى تورى خەۋىرى: دۇنيا سەھىيە تەشكىلاتى 10-ئاپرېل بايانات ئېلان قىلىپ، قورساقنى كېسىپ بالا ئېلىشتەك تېببىي تېخنىكىنىڭ بارغانسېرى پۈتۈن دۇنياغا ئومۇملىشىشى ۋە بۇ ئوپېراتسىيەنىڭ بەدەن ساغلاملىقىغا كۆرسىتىدىغان قىسقا ۋە ئۇزۇن مەزگىللىك خەۋپ-خەتىرىنى نەزەردە تۇتۇپ، بۇ ئوپېراتسىيەنى چوقۇم قىلمىسا بولمايدىغان زۆرۈر ئەھۋال ئاستىدا ئاندىن ئېلىپ بېرىشنى مۇراجىئەت قىلدى.
دۇنيا سەھىيە تەشكىلاتى مۇنداق دەپ كۆرسەتتى: يېقىنقى 30 يىلدىن بۇيان خەلقئارا ساقلىقنى ساقلاش-داۋالاش ساھەسىدىكىلەر قورساقنى كېسىپ بالا ئېلىش ئوپېراتسىيەسىنى ئېلىپ بېرىش نىسبىتى %10 تىن %15 گىچە بولسا مۇۋاپىق بولىدۇ، دەپ قارىدى، بىراق، مەيلى تەرەققىي قىلغان دۆلەتلەر ياكى تەرەققىي قىلىۋاتقان دۆلەتلەر بولسۇن، بۇ ئوپېراتسىيە بارغانسېرى ئومۇملىشىشقا باشلىدى. زۆرۈر ئەھۋال كۆرۈلگەندە بۇ ئوپېراتسىيەنى ئېلىپ بېرىشنىڭ ئانا-بالىنىڭ ئۆلۈپ كېتىشى ۋە باشقا ئالاقىدار كېسەللىكلەردىن ئۈنۈملۈك ساقلىنىشتەك پايدىلىق تەرىپى بار، بىراق قىلسىمۇ، قىلمىسىمۇ بولىدىغان ئەھۋالدا بۇ ئوپېراتسىيەنى ئېلىپ بېرىش ئانا-بالىغا پايدىلىق، دەيدىغانغا ھېچقانداق دەلىل-ئىسپات يوق.
دۇنيا سەھىيە تەشكىلاتى يەنە مۇنداق دەپ ئەسكەرتتى: قورساقنى كېسىپ بالا ئېلىش ئوپېراتسىيەسىنى چوقۇم زۆرۈر ئەھۋالدا ئېلىپ بېرىش كېرەك. بۇنىڭمۇ خۇددى ھەر قانداق تاشقى كېسەللىك ئوپېراتسىيەسىگە ئوخشاشلا قىسقا ۋە ئۇزاق مەزگىللىك خەۋپ-خەتىرى بار، ئۇنىڭ ئۈستىگە ئۇزاق مەزگىللىك خەۋپ-خەتەر بەلكىم بىر نەچچە يىلدىن كېيىن ئاشكارىلىنىشى شۇنداقلا، ئانا ۋە بالىنىڭ ساغلاملىقى، ھەتتا ئانىنىڭ كېيىن پەرزەنت كۆرۈشىگىمۇ تەسىر يەتكۈزۈشى مۇمكىن.
ئۆتكەن بىر قانچە يىلدا، ھەر قايسى دۆلەتلەردىكى ھۆكۈمەت ۋە تېببىي خادىملار قورساقنى كېسىپ بالا ئېلىش ئوپېراتسىيەسىنىڭ بارغانسېرى كۆپىيىۋاتقانلىقىدىن ۋە بۇنىڭ ھامىلدار ئايال ۋە بوۋاققا كۆرسىتىدىغان پاسسىپ تەسىرىدىن ئەنسىرەۋاتقانلىقىنى بىلدۈرگەن.
دۇنيا سەھىيە تەشكىلاتى يەنە تېببىي خادىملارنى قورساقنى كېسىپ بالا ئېلىش ئوپېراتسىيەسىنى كۈچىنىڭ يېتىشىچە ئەڭ ياخشى سەۋىيەدە ئېلىپ بېرىشنى، ھەرگىزمۇ مەلۇم بەلگىلىك ساندا مەجبۇرىي كونترول قىلماسلىقنى تەۋسىيە قىلغان. بۇ ئوپېراتسىيەنىڭ ھامىلىنىڭ ئۆلۈپ كېتىشى، ھامىلدارلىق مەزگىلى ھەم تۇغۇت يېقىنلىشىش مەزگىلىدىكى كېسەللىكلەر ۋە بالىلار كېسەللىكلىرى قاتارلىقلارغا كۆرسىتىدىغان تەسىرى ھازىرچە ئېنىقلانمىغان بولغاچقا، بۇ تەشكىلات ئالاقىدار خادىملارنى كۆپرەك تەتقىق قىلىپ بۇ ئوپېراتسىيەنىڭ ئۇزۇن مەزگىللىك خەۋپ-خەتىرىنى ئېنىقلاشقا چاقىرغان.