شىنخۇا تورى، بېيجىڭ، 14-يانۋار تېلېگراممىسى: دۆلەت رەئىسى شى جىنپىڭ 14-يانۋار ‹‹خەلق›› سارىيىدا خەلقئارا ئولىمپىك جەمئىيىتىنىڭ رەئىسى، ئاسىيا ئولىمپىك كېڭىشىنىڭ رەئىسى، شاھزادە ئەھمەد بىلەن كۆرۈشتى.

شى جىنپىڭ مۇنداق دەپ كۆرسەتتى: خەلقئارا ئولىمپىك جەمئىيىتى پۈتۈن دۇنيادىكى 205 ئولىمپىك كومىتېتىنى ماسلاشتۇرىدىغان ئورگان بولۇش سۈپىتى بىلەن، ئىتتىپاقلىقنى ئىلگىرى سۈرۈپ، خەلقئارا ئولىمپىك كومىتېتى بىلەن بولغان ھەمكارلىق ۋە ماسلىشىشنى كۈچەيتىپ ، ھەرقايسى ئولىمپىك كومىتېتلىرىنىڭ مەنپەئەتىنى قوغداش، دۇنيا ئولىمپىك تەنھەرىكەت ئىشلىرىنىڭ سىجىل، ساغلام، مۇقىم تەرەققىياتىنى ئىلگىرى سۈرۈشتە ئىجابىي رول ئويناپ كەلدى. ئولىمپىك جەمئىيىتى ئۇزۇندىن بۇيان جۇڭگونىڭ تەنتەربىيە ئىشلىرىنىڭ تەرەققىياتى ئۈچۈن ئاكتىپ تۆھپىلەرنى قوشتى.

تەنتەربىيە ھەرىكىتى جۇڭگونىڭ بىر تۈرلۈك مۇقەددەس ئىشى، تەنتەربىيە ھەرىكىتى جۇڭگونىڭ تەرەققىياتىغىمۇ، ئىنسانىيەتنىڭ تەرەققىياتىغىمۇ تۆھپە قوشتى. جۇڭگو ھۆكۈمىتى تەنتەربىيە ئىشلىرىنى تەرەققىي قىلدۇرۇشقا ئىزچىل يۈكسەك ئەھمىيەت بېرىپ كەلدى، ئولىمپىك تەنھەرىكىتىنىڭ ئىجتىمائىي تەرەققىياتتىكى مۇھىم رولىغا ئەھمىيەت بەردى. يېقىنقى يىللاردىن بۇيان، جۇڭگو ئىلگىرى-كېيىن بولۇپ بېيجىڭ ئولىمپىك تەنھەرىكەت مۇسابىقىسى، نەنجىڭ ياشلار ئولىمپىك تەنھەرىكەت مۇسابىقىسى قاتارلىق مۇسابىقىلەرنى مۇۋەپپەقىيەتلىك ئۆتكۈزۈپ، جۇڭگو خەلقىنىڭ ئولىمپىك تەنھەرىكىتىگە بولغان قىزغىن ھېسسىياتىنى قوزغاتتى.

شى جىنپىڭ تەكىتلەپ مۇنداق دېدى: ئولىمپىك تەنھەرىكىتى ۋە قىشلىق تەنھەرىكەت تۈرلىرىنىڭ جۇڭگودىكى تەرەققىياتىغا تۈرتكە بولۇش ئۈچۈن، بېيجىڭ بىلەن جاڭجياكو شەھىرى 2022-يىلى 24-نۆۋەتلىك قىشلىق ئولىمپىك تەنھەرىكەت مۇسابىقىسىنى ئۆتكۈزۈشكە ئىلتىماس سۇندى. جۇڭگو ھۆكۈمىتى بۇنىغا يۈكسەك ئەھمىيەت بېرىدۇ. بېيجىڭنىڭ قىشلىق ئولىمپىك تەنھەرىكەت مۇسابىقىسىنى ئۆتكۈزۈشى خەلقئارا ئولىمپىك تەنھەرىكىتىنىڭ تەرەققىياتىغا قوشقان زور تۆھپىسى بولۇپ ھېسابلىنىدۇ.