جۇڭگو ئاخبارات تورى، 22-ئاپرېل تېلىگراممىسى: چەت ئەل ئاخبارات ۋاستىلىرىنىڭ خەۋىرىگە قارىغاندا، سەئۇدى ئەرەبىستان يەمەنگە قاراتقان ھاۋا ھۇجۇمىنى توختىتىدىغانلىقىنى شۇ يەر ۋاقتى 21-ئاپرېل جاكارلىغان، ئامېرىكا ئاق ساراي كەينىدىنلا بۇنىڭغا قارىتا ئىپادە بىلدۈرۈپ، سەئۇدى ئەرەبىستاننىڭ بۇ قارارىنى قوللايدىغانلىقىنى، شۇنداقلا يەمەن رايونى كىرىزىسىنى تېزدىن ھەل قىلىش ئۈچۈن سۆھبەت ئېلىپ بېرىشىنى ئىلگىرى سۈرىدىغانلىقىنى ئېيتقان.
ئامېرىكا دۆلەت بىخەتەرلىك كومېتىتىنىڭ باياناتچىسى: ئامېرىكا ھۆكۈمىتى سەئۇدى ئەرەبىستان ھۆكۈمىتى باشچىلىقىدىكى ئىتتىپاقداش ئارمىيەنىڭ يەمەنگە قاراتقان ھاۋا ھۇجۇمىنى توختىتىش قارارىنى قوللايدۇ، دېدى. ئۇ يەنە ئامېرىكىنىڭ داۋاملىق تۈردە يەمەننى بىرلەشكەن دۆلەتلەر تەشكىلاتى باشچىلىقىدىكى سىياسىي جەھەتتىن ياراشتۇرۇش ۋە ئىنسانپەرۋەرلىك ياردىمى بىلەن تەمىنلەيدىغانلىقىنى ئېيتقان.
سەئۇدى ئەرەبىستان ھۆكۈمىتى باشچىلىقىدىكى نۇرغۇن دۆلەتلەر ئارمىيەسى ئۆزلىرىنىڭ يەمەنگە قاراتقان تۆت ھەپتىلىك ھاۋا ھۇجۇمىنى توختىتىدىغانلىقىنى جاكارلىغان ھەمدە يەمەندىكى خۇسەي قوراللىق كۈچلىرىنىڭ ئاللىقاچان يوقىتىلغانلىقىنى، كېيىنكى قەدەمدە يەمەن ۋەزىيىتىنىڭ ئاساسلىقى سىياسىي جەھەتتىن ھەل قىلىش باسقۇچىغا كىرىدىغانلىقىنى ئېيتقان.
يەمەننىڭ شىئە مەزھىپىدىكى خۇسەي قوراللىقلىرى بۇلتۇر 9-ئايدا سانائانى كونترول قىلىۋالغان، بۇ يىل 1-ئايدىن بۇيان يەمەن زۇڭتۇڭ مۇھاپىزەتچى قىسمى بىلەن توقۇنۇشۇپ زۇڭتۇڭ مەھكىمىسىنى ئىگىۋالغان، كەينىدىن يەمەن زۇڭتۇڭى ھادى ۋە ئىچكى كابېنت ئەزالىرىنى نەزەربەند قىلىۋالغان. كېيىن ھادى قېچىپ چىقىپ يەمەننىڭ جەنۇبىدىكى ئادېنغا بارغان، ئارقىدىن سەئۇدى ئەرەبىستانغا قېچىپ كېتىشكە مەجبۇر بولغان.
سەئۇدى ئەرەبىستان قاتارلىق دۆلەتلەر 23-مارتتىن باشلاپ خۇسەي قوراللىقلىرىغا قارىتا « كەسكىن ھۇجۇم » ناملىق ھاۋا ھۇجۇمىنى قوزغىغان. 1-ئاپرېل ب د ت خەۋپسىزلىك كېڭىشى قارار ماقۇللاپ يەمەننىڭ بىرلىكى، ئىگىلىك ھوقۇقى، مۇستەقىللىقى ۋە زېمىن پۇتۈنلىكىنى قوللاپ، مۇناسىۋەتلىك ھەر قايسى تەرەپلەرنى ئۇرۇش توختىتىش توغرىسىدا دەرھال بىردەكلىك ھاسىل قىلىشقا مۇراجىئەت قىلىپ، يەمەندىكى ھەر قايسى تەرەپلەردىن سۆھبەت ئۆتكۈزۈش ئارقىلىق ئىختىلاپنى تىنچ ھەل قىلىشنى تەلەپ قىلغان .
دۇنيا سەھىيە تەشكىلاتىنىڭ سانلىق مەلۇماتىدا مۇنداق كۆرسىتىلدى: يەمەندە بۇلتۇر 3-ئايدىن بۇ يىل 17-ئاپرېلغىچە يۈز بەرگەن داۋالغۇشتا 944 ئادەم قازا قىلغان، 3487 ئادەم يارىلانغان. نۇرغۇن ئادەم دوختۇرخانىلاردا داۋالىنىشقا ئامالسىز قالغانلىقىن ئۈچۈن قازا قىلغانلارنىڭ سانى تېخىمۇ كۆپىيىپ كەتكەن.