شىنخۇا تورى قاھىرە 14 ــ فېۋرال تېلېگراممىسى : مىسىر ئاخبارات ۋاستىلىرىنىڭ 14 ــ فېۋرالدىكى خەۋىرىگە قارىغاندا ، مىسىر ئىچكى ئىشلار مىنىستىرلىقىنىڭ ئىستاتىستېكا سانلىق مەلۇماتىدا ، 25 ــ يانۋاردىن باشلاپ مىسىردا زور كۆلەمدىكى ئېتىراز بىلدۈرۈش ھەرىكىتى ئېلىپ بېرىلغان بولۇپ ، ئېتىراز بىلدۈرۈش ۋە قالايمىقانچىلىقتا 32 ساقچى قازا قىلغان ، 1079 ساقچى ۋە ئەسكەر يارىلانغان .
ئېتىراز بىلدۈرۈش ھەرىكىتىدە يەنە 99 ساقچى ئىدارىسى ۋە ئالتە تۈرمە بۇزغۇنچىلىققا ئۇچرىغان بولۇپ ، مىسىر پۇقرالىرىنىڭ ئۆلۈش ــ يارىلىنىش ئەھۋالى ئېلان قىلىنمىغان .
مىسىر قوراللىق قىسمى ئەڭ ئالىي كومىتېتى 14 ــ فېۋرال بايانات ئېلان قىلىپ ، ئىشچىلار ئۇيۇشمىسى رەھبەرلىرىدىن ئىش تاشلاش ۋە جىم ئولتۇرىۋېلىشتەك قارشىلىق ھەرىكەتلىرىنى توختىتىشىنى تەلەپ قىلغان .
14 ــ فېۋرال چۈشتىن بۇرۇن ، مىسىر ھەربىي ئارمىيەسى پايتەخت قاھىرەنىڭ شەھەر مەركىزىدىكى ئازادلىق مەيدانىدا تازىلاش ئېلىپ بارماقچى بولغاندا ، مەيداندىن ئايرىلىشنى خالىمىغان ئېتىرازچىلار بىلەن توقۇنۇشۇپ قالغان . بۇنىڭدىن باشقا نەچچە يۈز ساقچى ئازادلىق مەيدانى قاتارلىق جايلاردا نامايىش قىلىپ ، خىزمەت شارائىتىنى ياخشىلاپ بېرىشنى تەلەپ قىلغان . مىسىردىكى بىر قىسىم ساھەلەردە ئىش تاشلاش داۋاملىشىۋاتقان بولۇپ ، 16 ــ فېۋرال ئەسلىگە كەلتۈرۈلىدىغان مىسىر پايچەك بازىرىنىڭ ئەسلىگە كەلتۈرۈلۈش ۋاقتى يەنە كەينىگە چېكىندۈرۈلگەن .
25 ــ يانۋاردىن بۇيان ، مىسىردا ئۇدا زور كۆلەمدىكى ئېتىراز بىلدۈرۈش ھەرىكىتى يۈز بەرگەن بولۇپ ، ئېتىرازچىلار مۇبارەكنىڭ تەختتىن چۈشىشىنى تەلەپ قىلغان . 11 ــ فېۋرال مۇبارەك زۇڭتۇڭلۇق ۋەزىپىسىدىن ئىستىپا بەرگەن بولۇپ ، ھوقۇقىنى ھەربىي تەرەپكە ئۆتكۈزۈپ بەرگەن .
