شۇ يەر ۋاقتى سائەت 16 ئەتراپىدا ، خۇ جىنتاۋ ئولتۇرغان مەخسۇس ئايروپىلان ۋاشىنگتوننىڭ ئاندرېۋس ھاۋا ئارمىيە بازىسىغا قوندى ، ئامېرىكىنىڭ مۇئاۋىن زۇڭتۇڭى بايدىن ئايرودرومغا چىقىپ رەئىس خۇ جىنتاۋنى كۈتۈۋالدى .
خۇ جىنتاۋ ئايرودرومدا سۆزلىگەن يازما نۇتقىدا مۇنۇلارنى كۆرسەتتى : جۇڭگو–ئامېرىكا ئىككى دۆلەتنىڭ ئارىلىقى ناھايىتى يىراق ، ئەمما بىپايان تىنچ ئوكيان ئىككى دۆلەت خەلقلىرى ئارىسىدىكى دوستلۇقنى ئايرىۋېتەلمەيدۇ . دىپلوماتىك مۇناسىۋەت ئورنىتىلغان 32 يىلدىن بۇيان ، ئىككى تەرەپنىڭ ئورتاق تىرىشچانلىقى نەتىجىسىدە ، جۇڭگو – ئامېرىكا مۇناسىۋىتى ئومۇمىي جەھەتتىن مۇقىم تەرەققىي قىلماقتا . ئىككى دۆلەتنىڭ كەڭ ساھەلەردىكى ھەمكارلىقىدا زور نەتىجىلەرنى قولغا كەلتۈرۈپ ، ئاسىيا شۇنداقلا دۇنيانىڭ تىنچ ، مۇقىم ، تېز تەرەققىياتىنى ئىلگىرى سۈرۈشتە مۇھىم رول ئوينىدى .
خۇ جىنتاۋ : ‹‹ نۆۋەتتە ، خەلقئارا ۋەزىيەتتە ناھايىتى مۇرەككەپ ئۆزگىرىشلەر يۈز بېرىۋاتىدۇ . جۇڭگو – ئامېرىكا ئىككى دۆلەتنىڭ ئورتاق مەنپەئەتى كېڭەيدى ، زېممىسىگە ئالىدىغان ۋەزىپىسىمۇ ئېغىرلاشتى ، ئىككى تەرەپ ھەمكارلىقىنىڭ كەلگۈسى ئىستىقبالى پارلاق ›› دەپ كۆرسەتتى . ئۇ يەنە : ‹‹ بۇ قېتىمقى زىيارىتىمنىڭ مەقسىتى ئۆزئارا ئىشىنىش ۋە دوستلۇقنى كۈچەيتىپ ، ھەمكارلىقنى چوڭقۇرلاشتۇرۇپ ، 21 – ئەسىردە ئىجابىي ھەمكارلىق ئومۇميۈزلۈك ئالغا سىلجىتىلغان جۇڭگو - ئامېرىكا مۇناسىۋىتىنىڭ داۋاملىق تەرەققىي قىلىشىنى ئىلگىرى سۈرۈشتىن ئىبارەت ›› دېدى . ئۇ يەنە زۇڭتۇڭ ئوباما بىلەن بىرلىكتە جۇڭگو – ئامېرىكا مۇناسىۋىتى ۋە ئورتاق كۆڭۈل بۆلىدىغان خەلقئارا ۋە رايون مەسىلىلىرىدە تېخىمۇ چوڭقۇر پىكىر ئالماشتۇرۇپ ، ئامېرىكىنىڭ ھەر قايسى ساھەلىرىدىكى دوستلار بىلەن كەڭ دائىرىدە ئۇچرىشىپ ، ئىككى دۆلەت خەلقلىرى ئارىسىدىكى چۈشىنىش ۋە دوستلۇقنى ئىلگىرى سۈرۈشنى ئۈمىد قىلىدىغانلىقىنى بىلدۈردى .
خۇ جىنتاۋ يەنە مۇنۇلارنى كۆرسەتتى : ‹‹ جۇڭگو – ئامېرىكا مۇناسىۋىتىنىڭ ساغلام ، مۇقىم تەرەققىياتى ئىككى دۆلەت خەلقلىرىنىڭ تۈپ مەنپەئەتىگە ئۇيغۇن ھەمدە دۇنيانىڭ تىنچلىقى بىلەن تەرەققىياتىغىمۇ پايدىلىق . جۇڭگو تەرەپ ، ئامېرىكا بىلەن بىرلىكتە ئۆزئارا ھۆرمەت قىلىش ، ئۆزئارا مەنپەئەت يەتكۈزۈش ئاساسىدا جۇڭگو – ئامېرىكا مۇناسىۋىتىنى پائال تەرەققىي قىلدۇرۇشنى ، ھەر قايسى دۆلەتلەر بىلەن بىرلىكتە تىنچ ، ئورتاق گۈللەنگەن ، ئىناق دۇنيا قۇرۇپ چىقىشنى خالايدۇ ›› .
ۋاڭ چىشەن ، لىڭ جىخۇا ، ۋاڭ لۇنىڭ ، دەي گوبىڭ قاتارلىقلار رەئىس خۇ جىنتاۋغا ھەمراھ بولۇپ ۋاشىنگتونغا يېتىپ كەلدى .
جۇڭگونىڭ ئامېرىكىدا تۇرۇشلۇق باش ئەلچىسى جاڭ يېسۈيمۇ ئايرودرومغا چىقىپ قارشى ئالدى .
شۇ كۈنى كەچتە خۇ جىنتاۋ زۇڭتۇڭ ئوباما ئۆتكۈزگەن كەچلىك زىياپەتكە قاتناشتى .
