CBA : شىنجاڭ كوماندىسى شاللىنىپ كەتتى

2015-يىلى 2-ئاينىڭ 1-كۈنى، بۇ يىللىق پەسىللىك مۇسابىقىنىڭ ئەڭ ئاخىرقى ئايلانما مۇسابىقىسىدە شىنجاڭ كوماندىسى 129:103 نومۇر پەرقى بىلەن فوشەن كوماندىسىنى يەڭدى، بىراق بۇ مەيدان غەلىبە شىنجاڭ كوماندىسىغا ھېچقانداق نەپ ئېلىپ كېلەلمىدى، مۇنداقراق قىلىپ ئېيتقاندا بۈگۈنكى مۇسابىقە ماھىيەتتە شىنجاڭ كوماندىسى بىلەن دۇڭگۇەن كوماندىسىنىڭ ئارىسىدىكى سەككىز كۈچلۈككە كىرىشنىڭ ئەڭ ئاخىرقى بىر بېلىتىنى تالىشىش جېڭى ئىدى، ئەپسۇس شىنجاڭ كوماندىسى گەرچە مۇسابىقىدە يەڭگەن بولسىمۇ بىراق سەككىز كۈچلۈككە كىرىش شەرتى «بۇ مەيدان مۇسابىقىدە غەلىبىنى قولغا كەلتۈرۈپلا قالماي يەنە رىقابەتچىسىنىڭمۇ بۈگۈن مۇسابىقىسىدە مەغلۇب بولۇشى» بولغانلىقتىن ناھايىتى ئەپسۇس شاللىنىپ كېتىشكە دۇچ كەلدى.

 

رىقابەتچىسى دۇڭگۇەن تەرەپتىكى مۇسابىقىدە بولسا دۇڭگۇەن كوماندىسى 112:104 نومۇر پەرقى بىلەن بېيجىڭ كوماندىسىنى يېڭىپ سەككىز كۈچلۈككە كىرىشنىڭ ئەڭ ئاخىرقى بېلىتىنى قولغا كەلتۈردى.

 

شىنجاڭ تەرەپتە بىراچ 35 نومۇرغا، 15 قېتىم گاردىن قايتقان توپقا ئېرىشتى، قىرانبەگ 26 نومۇرغا ئېرىشتى، ليۇ ۋېي 24 نومۇرغا، 9 قېتىم گاردىن قايتقان توپقا ئېرىشتى، تاڭ جىڭدۇڭ 21 نومۇرغا، جوۋچى 12 نومۇرغا، شىرئەلىجان 6 نومۇرغا ئېرىشتى. شىنجاڭ كوماندىسىغا شاللىنىپ كېتىشتىن باشقا يەنە بىر پېشكەلىك كەلدى، شۇنداقلا مۇسابىقە ئاخىرلىشىقا ئازلا قالغاندا شىرئەلىجان مۇداپىئە قىلىش جەريانىدا قارشى تەرەپنىڭ توپچىسى بىلەن سوقۇلۇشۇپ كېتىپ تىز قىسمى يارىلىنىپ مەيداندىن چۈشۈشكە مەجبۇر بولدى.

 

فوشەن تەرەپتە جوش 50 نومۇرغا ئېرىشتى، 5 قېتىم ياردەمچى پاس بەردى، كېلفۇسۇف 15 نومۇرغا، رېن جۈنۋېي 13 نومۇرغا، جۈن مىڭشىن 12 نومۇرغا، زۇڭ زەن 11 نومۇرغا ئېرىشتى.