يۆتەل توختىتىش دورىلىرىنى قالايمىقان ئىچمەسلىك كېرەك

يۆتەل كۆپ كۆرۈلىدىغان كىلىنىكىلىق ئالامەت بولۇپ، نېرۋا رېفلېكس يايى تەرىپىدىن ئورۇنلىنىدىغان، كۆپ ھاللاردا بەدەنگە پايدىلىق بولغان بىر خىل مۇرەككەپ فىزىيولوگىيەلىك جەريان.ئادەتتە، نەپەسلىنىش يولىغا يىغىلىپ قالغان بەلغەم ياكى نەپەسلىنىش يولىغا كىرگەن نەرسىلەر يۆتىلىش ئارقىلىق بەدەن سىرتىغا چىقىرىلىپ، نەپەس يولىنىڭ بۇزغۇنچىلىققا ئۇچرىشىنىڭ ئالدى ئېلىنىدۇ. ئەمما بەزىلەر ئۆزى ياكى بالىلاردا يۆتىلىش كۆرۈلسە، دەرھال يۆتەل توختىتىش دورىسىغا مۇراجىئەت قىلىدۇ، بۇنداق قىلىش توغرا ئەمەس، بۇنىڭدا يۆتەل توختىغان بىلەن نەپەسلىنىش يولىغا يىغىلىپ قالغان باكتېرىيە، ۋىرۇس قاتارلىق كېسەل پەيدا قىلغۇچىلار نەپەسلىنىش يولىدا يىغىلىپ قېلىپ، ۋاقتىدا بەدەن سىرتىغا چىقىرىۋېتىلمەي، كېسەل ئەھۋالىنى ئېغىرلاشتۇرۇۋېتىدۇ. شۇڭا يۆتەل توختىتىش دورىلىرىنى قالايمىقان ئىچمەسلىك كېرەك. ئايرىم ئەھۋاللاردا، مەسىلەن: يۇتقۇنچاق يەللىكى قاتارلىق كېسەللەردە كىشى قۇرۇق يۆتىلىدۇ.
بۇنداق ئەھۋالدا يۆتەل توختىتىش دورىلىرىنى ئىچسە بولىدۇ، چۈنكى بۇنداق يۆتەل بىز يۇقىرىدا تىلغا ئالغان يۆتەلگە ئوخشاش زىيانلىق تەركىبلەرنى بەدەن سىرتىغا چىقىرىۋېتىش مەقسىتىدىكى يۆتەل بولماستىن، بەلكى يۇتقۇنچاقنىڭ غىدىقلىنىشى سەۋەبىدىن بولغان يۆتەلدۇر. قۇرۇق يۆتەل توختىتىلمىسا، نەپەس يولى توقۇلمىلىرى بۇزغۇنچىلىققا ئۇچرايدۇ. شۇڭا يۆتەل ئېغىر بولسا، دوختۇرنىڭ مەسلىھەتىنى ئېلىپ، دورىنى توغرا ئىچىش كېرەك.