تونۇش: بۇ ھەرخىل سەۋەبلەر تۈپەيلىدىن ئۈچەينىڭ نورمال پائالىيىتى قالايمىقانلىشىپ، چوڭ تەرەت قېتىمىنىڭ كۆپىيىشى ۋە تەرەت خاراكتېرىنىڭ ئۆزگىرىشى بىلەن ئىپادىلىنىدىغان، بالىلار بۆلۈمىدە ناھايىتى كۆپ كۆرۈلىدىغان مىزاج بۇزۇلۇش خاراكتېرلىك كېسەللىك.

پەرۋىش:

1. ئوزۇقلۇقنى تەرتىپكە سېلىش ۋە مۇۋاپىق ئوزۇقلاندۇرۇشقا ئەھمىيەت بېرىش لازىم. ئوزۇقلۇقنى تەرتىپكە سېلىش، پەرۋىش قىلىشتا، بىمارنى ئامال بار ئانا سۈتى بىلەن بېقىش لازىم. سۈتتىن ئايرىلغان بولسا قوشۇمچە يېمەكلىكلەرنى قوشۇپ بېرىش، قوشۇمچە يېمەكلىك قوشۇپ بەرگەندە ئاسان ھەزىم بولىدىغان، قۇۋۋەتلىك، سۇيۇق تاماقلارنى ئاز -ئازدىن پات -پات بېرىش، بىرلا ۋاقىتتا كۆپ قېتىم ئىستېمال قىلدۇرماسلىق، كېسەللىك ئەھۋالىنىڭ ياخشىلىنىشىغا قاراپ تەدرىجىي سۇيۇق تاماق بېرىشتىن قويۇق تاماق بېرىشكە يۈزلەندۈرۈش، سۇيۇقلۇق تولۇقلاش، بەدەننى قۇۋۋەتلەش مەقسىتىدە يېمەكلىكلەرنى تاللاپ بېرىش لازىم. يەنى، شوۋىگۈرۈچ، كۆكتات شورپىلىرى، بۇغداي ئۇمىچى، پىستە سېلىنغان چۆپ ئاش، ھەرخىل مېۋە -چېۋە شەربەتلىرى، يەنى ئانار شەربىتى، بېھى شەربىتى قاتارلىقلارنى قايناق سۇ بىلەن تەڭشەپ بېرىش كېرەك. ئوزۇقلۇقى ئۈچۈن قايناق سۇغا ئازراق تۇز ۋە شېكەر قوشۇپ، تۇز سۈيى تەييارلاپ داۋاملىق بېرىش لازىم. ئۇنىڭدىن باشقا ئەرقى گاۋزىبان بىلەن ئەرقى چۆپچىننى مۇۋاپىق مىقداردا بىرلەشتۈرۈپ ئىچۈرسە تېخىمۇ ياخشى بولىدۇ.

2. بەدەننىڭ قارشىلىق كۈچىنى ئاشۇرۇشقا ئەھمىيەت بېرىش لازىم. سىرتقى مۇھىتنىڭ ئۆزگىرىشىگە ماسلاشتۇرۇپ سوغۇق تېگىش ياكى ئىسسىق ئۆتۈپ كېتىشتىن ساقلىنىش، ھاۋالىق جايدا ئارام ئالدۇرۇش، روھىي جىددىيلىشىشتىن ساقلىنىش كېرەك.

3. يۇقۇملىنىشنى تىزگىنلەش مەقسىتىدە بالىلارنىڭ يېمەك -ئىچمەك تازىلىقى ۋە شەخسىي تازىلىقىغا ئالاھىدە ئەھمىيەت بېرىش، مەسىلەن: يېمەك- ئىچمەككە ئىشلىتىدىغان قاچا -قۇچىلارنىڭ تازىلىقى ۋە بالىنىڭ قول، ئېغىز تازىلىقى قاتارلىقلارنى ياخشى قىلىش لازىم.

4. كاسسا قىسمى پەرۋىشىنى ئالاھىدە ياخشى ئىشلەش لازىم. چوڭ تەرەتتىن كېيىن ئىسسىق سۇ بىلەن ۋاننا قىلىش ياكى كاۋاۋىچىن قايناتمىسىدا ئىلمان ھالەتتە ۋاننا قىلىش، مەقئەتكە ئىسسىق ئۆتكۈزۈش كېرەك. چۈنكى چوڭ تەرەت قېتىم سانى كۆپ بولغانلىقتىن، مەقئەت شىللىق پەردىسى غىدىقلىنىپ، يەرلىك ئورۇندا ياللۇغ پەيدا بولۇپ، ئېغىر بولغانلىرىدا مەقئەت قاناش ئەھۋالى كېلىپ چىقىدۇ. ئىسسىق ئۆتكۈزگەندە مەقئەتنىڭ قان ئايلىنىشى ياخشىلىنىپ، ئاغرىق پەسەيتىدۇ. زۆرۈر تېپىلغاندا مەقئەت ئەتراپىنى گۈل يېغى ياكى ياللۇغ قايتۇرۇش تەسىرى بولغان مەلھەملىرى بىلەن ياغلاپ قويۇش لازىم.

5. كېسەللىك ئەھۋالىنى ئىنچىكىلىك بىلەن كۆزىتىپ يۈز بېرىۋاتقان ئۆزگىرىشلەرنى دوختۇر ۋە تېۋىپقا ۋاقتىدا خەۋەر قىلىپ تۇرۇش، بولۇپمۇ تەرەتنىڭ رەڭگى، خاراكتېرى، شەكلىدىكى ئۆزگىرىشلىرىنى ئىنكاس قىلىش ئارقىلىق داۋالاشقا يېقىندىن ماسلىشىش لازىم.

پەرھىز: بىمار ھەددىدىن زىيادە غىدىقلىغۇچى، تەستە ھەزىم بولىدىغان، سۈپىتى ئۆزگەرگەن، زىيادە سوغۇق، زىيادە ئىسسىق يېمەك- ئىچمەكلەردىن، مايلىق يېمەكلىكلەر ۋە لازا- ئاچچىقسۇ، مايلىق گۆش، مايلىق سۈت پاراشوكلىرى، قورۇغان تاماق، بەك تاتلىق نەرسىلەردىن چەكلىنىدۇ.