ئالماشقان بوۋاقلار
پوۋېست
يامغۇرلۇق كېچە ، چۈشتىن كېيىندىن باشلاپ ياغقان سىم - سىم يامغۇر ھازىرغىچە توختىمىغان ئىدى . ئالىمئاخۇن ئايالىنى ھارۋىغا سالغىنىچە ئۇزۇن ۋە تار كەتكەن سەھرا يولىدا ئىشەكنىڭ دۈمبىسىگە راسا قامچىلايتتى .
- بولە ھۇ ھارام ، يە دېسە تازا يەيسەن ، ئەمدى ماڭالمايسىنا !
ئىشەك ئۆز دۈمبىسىگە تەگكەن قامچىنىڭ دەستىدىن تازا يۈگۈرۈشكە باشلىدى ، بىراق ئالىمئاخۇنغا بولسا ئېشەكنىڭ سۈرئىتى يەنىلا ئاستىدەك ، زادى ماڭمايۋاتقاندەك قىلاتتى ، ئايالى غۇنچەم بولسا قورسىقىنى تۇتقىنىچە تۈگۈلۈپلا قالغانىدى .
- خوتۇن ، چىداشلىق بەرگىن ، ئاز قالدى ، ھازىرلا يېتىپ بارىمىز ، - ئالىمئاخۇن شۇنداق دېگىنىچە ئىشەكنىڭ دۈمبىسىگە يەنە بىر نەچچىنى سېلىۋەتتى ، ھارۋا يەنىلا شۇ ئۇزۇن يولدىن چىقىپ كېتەلمەي بىر خىل تېزلىكتە ئالغا ئىلگىرلەۋاتاتتى ...
***
ئەسقەر يامغۇر ياغقاچقىمىكىن ئىشتىن بالدۇر قايتىپ كەلدى ، ئۆيگە كىرىپلا ئايالى گۈلباھارغا ئادەتتىكىچە سالام قىلىپ قويۇپلا تېلېۋىزورنى ئېچىپ پۇتبول مۇسابىقىسى كۆرۈشكە باشلىدى ، گۈلباھار ھامىلدار تۇرۇپمۇ ئېرىنىڭ ئۆزىگە بۇنداق مۇئامىلە قىلىشىغا ئۇنچە بەك ئېرەن قىلىپمۇ كەتمىدى ، ئاشخانا ئۆيگە كىرىپ ، قىززىق بىر چەينەك چاي دەملىدى ۋە نان بىلەن چاينى ئەسقەرنىڭ ئالدىغا قويۇپ قويۇپ ، ياتاق ئۆيىگە كىرىپ كىتاب ئوقۇشقا باشلىدى . ئەسقەر ئايالىغا قاراپ ئالايدى ۋە يەنە مۇسابىقە ئىچىگە كىرىپلا كەتتى .
تۇيۇقسىز ياتاق ئۆيدىن گۈلباھارنىڭ ئاۋازى ئاڭلاندى .
- ئەسقەر ، قورسىقىم ئاغرىۋاتىدۇ ، چىدىيالمايۋاتىمەن . بۇنى ئاڭلىغان ئەسقەر دەرھال گۈلباھارنىڭ يېنىغا كىردى ۋە ئۇنىڭغا ياردەملىشىپ چاپانلىرىنى كەيگۈزۈپ دوختۇرخانىغا ئېلىپ ماڭدى .
يامغۇرلۇق كېچە ، ئەسقەر ئايالىنى ماشىنىغا ئولتۇرغۇزدىدە ، ماشىنىنى ھەيدەپ ئۇچقاندەك دوختۇرخانا تەرەپكە يۈرۈپ كەتتى .
***
غىچ !!! ئەسقەر ماشىنىنىڭ تورمۇزىنى تۇيۇقسىز تۇتتى ، ئەگەر ئۇ دەل ۋاقتىدا تورمۇزنى دەسسىمىگەن بولسا قاتناش ۋەقەسى كېلىپ چىقاتتى ، ئايالى گۈلباھار بولسا ياندىكى ئورۇندۇقتا قورسىقىنى چىڭ قاماللىغىنىچە ئولتۇراتتى ، ئەسقەر قاتتىق غەزەپلەندىدە دەرھال ماشىنىدىن چۈشۈپ ۋارقىرىدى .
- ھەي ، سەھرالىق تومپاي ، ئۆلگۈڭ كەلدىمۇ سېنىڭ ، مۇشۇ ئىشەك ھارۋىسى ماڭىدىغان يولما ؟؟ ئالدىراش مېڭىپ قالدىم ، بولمىغان بولسا ئەدىپىڭنى تازا بېرەتتىم ، ئۇ شۇ گەپلەرنى دەپ بولۇپ ماشىنىغا چىقتى ۋە ئالدىراش يۈرۈپ كەتتى .
ماشىنا قوزغىلىپ بولۇپ ، خېلى بىر ۋاقىتتىن كېيىن ئالىمئاخۇن ئەسلى ھوشىنى يىغدى ۋە ھارۋىدىن چۈشۈپ ئىشەكنى تازا ساۋىدى .
- ھۇ ھارام ، يۈگۈرەيدىغان چاغدا يۈگۈرمەيسەن ، تازا ماشىنا كەلگەندە يۈگۈرەۋاتىسىنا ، مېنى ئۆلسۇن دېگەنمىتىڭ ؟ ھېلىمۇ خۇداغا شۈكرى ، يەيدىغان رىزقىم بار ئىكەن ، - ئۇ شۇلارنى دەپ بولۇپ ھارۋا ئىچىدە ياتقان غۇنچەمگە قاراپ :
- خوتۇن ، بىرەر ئىش بولمىغانسەن ، دوختۇرخانىغا ئاز قالدۇق ، سەل چىدىغىن ، دېدىدە لىككىدە سەكرەپ ھارۋىغا چىقتى ۋە ئىشەكنىڭ بېشىنى دوختۇرخانا تەرەپكە بۇراپ ، ئىشەككە يەنە قامچا سالدى .
ئەسقەر ئايالىنى تۇغۇت بۆلۈمىگە ئېلىپ كىرىپ كەتكەندىن كېيىن ، سىرتقا چىقىپ تاماكا چەككەچ ئويغا چۆكتى . بۇ قېتىم يەنە قىز تۇغۇلارمۇ ؟ ئالدىنقى بالاممۇ قىز تۇغۇلدى ، ئەگەر بۇ قېتىم قىز تۇغۇلسا ، ئاھ ! مېنىڭ جەمەتىمنىڭ نەسلى شۇنىڭ بىلەن قۇرۇپ كېتەرمۇ ؟؟
ئەسقەر ئۆيدە بىر بالا بولۇپ ، باشلانغۇچ ، ئوتتۇرا مەكتەپلەرنى ئەلا نەتىجە بىلەن پۈتتۈرۈپ ، ئالىي مەكتەپكە قوبۇل قىلىندى ، ئالىي مەكتەپتىمۇ ئۆزىنىڭ ئىلگىرىكى ئۆگىنىش ئاساسىغا تايىنىپ ، مەكتەپ بويىچە بىرىنچى بولۇپ ئوقىدى ، ئوقۇش پۈتتۈرگەندىن كېيىن ئۇ ئۈرۈمچىدىكى ئەۋزەل خىزمەت شارائىتىدىن ۋاز كېچىپ ، جەنۇبتىكى يىراق بىر يېزىغا بېرىپ ئىشلەشنى ، شۇ يەردە چېنىقىپ ئۆزىنى تاۋلاشنى قارار قىلدى ، مۇنداقچە قىلىپ ئېيتقاندا ئۇ ئۈرۈمچىنى پەقەت ياقتۇرمايتتى ، گۈزەل سەھرا ، مۇنبەت ئېتىزلارنى ، قويلار ، كالىلار ئوتلاۋاتقان كەڭ يايلاقلارنى ، سەھرانىڭ ساپ ھاۋاسىنى ياخشى كۆرەتتى . شۇنىڭ بىلەن ئۇ سەھراغا قايتتى . ئاساسىي قاتلامدا خىزمەت قىلدى ، ئارقىدىن ئۇزاق ئۆتمەي شۇ يەرلىك ئوقۇتقۇچى قىز گۈلباھار بىلەن مۇھەببەتلىشىپ توي قىلىپ مۇرادىغا يەتتى . ئەسقەر خىزمىتى جاپالىق بولسىمۇ ئۆزىنىڭ كۆڭلىدىكىدەك بولغانلىقى شۇنداقلا نۇرغۇن ئىشلاردىن مۇستەسنا بولغانلىقى ، كۆڭۈلدىكىدەك ئائىلە قۇرغانلىقى ئۈچۈن خۇشال بولۇپ يۈرگەن كۈنلەرنىڭ بىرىدە دادىسىنىڭ سەكراتقا چۈشۈپ قالغانلىق خەۋىرى كەلدى ، ئەسقەر دەرھال تەييارلىق قىلىپ يۇرتىغا قاراپ يولغا چىقتى ، يۇرتىغا بېرىپلا دادىسىنىڭ ئەھۋالىنىڭ ناچار ئىكەنلىكىنى بىلىپ قەلبى چەكسىز ئازابلاندى . شۇ كۈنلەرنىڭ بىرى ئەسقەرنىڭ دادىسى ئەسقەرنى يېنىغا چاقىرىپ پاراڭلاشتى :
- ئوغلۇم ، قارىغاندا مەن ئۇزاق ياشىيالمايدىغان ئوخشايمەن ، مەن ساڭا دەپ قوياي ، سەن ئۆزۈڭ يالغۇز بىرلا پەرزەنت ، شۇڭا ئائىلىمىزنىڭ چىرىقىنى ئۆچۈرۈپ قويمىغىن ...
ئارىدىن ئۇزاق ئۆتمەي ئەسقەرنىڭ دادىسى ئالەمدىن ئۆتتى ، ئەسقەر ناھايىتى ئازابلاندى ، بىراق شۇنىڭدىن باشلاپ ئەسقەرنىڭ قەلبىگە دادىسىنىڭ ھېلىقى گەپلىرى ئورناپ كەتتى .
بىر مەزگىل ئۆتكەندىن كېيىن ئەسقەرنىڭ ئايالى گۈلباھار يەڭگىدى ، بىراق بالا ئەسقەرنىڭ ئويلىغىنىدەك ئوغۇل بولماستىن بەلكى قىز ئىدى ، ئامال قانچە ؟ شۇنىڭ بىلەن ئەسقەرنىڭ ئايالى گۈلباھارغا بولغان پوزىتسىيەسىدىمۇ ئۆزگىرىش بولۇشقا باشلىدى ، ئائىلە بىلەن كارى بولماي پۈتۈن ۋۇجۇدى بىلەن خىزمەتكە كىرىشىپ كەتتى ، قىزىنى ئازدىن ئاز ئەركىلىتەتتى ، بىرەر يەرلەرگە ئاپېرىپ ئوينىتىدىغان ئىشلار بولسىمۇ گۈلباھار ئۆزى ئاپىراتتى ، ئەسقەر بولسا خىزمىتىم ئالدىراش دېگەننى باھانە قىلىپ ئۇنداق جايلارغا بارمايتتى ...
دەل شۇلارنى خىيال قىلىپ تۇرغىنىدا بايا تىللىغان ئالىمئاخۇن دوختۇرخانا ھويلىسىغا يىتىپ كىردى دە دەرھال ئايالىنى يۆلەپ ھارۋىدىن چۈشۈردى ۋە دوختۇرخانا ئىچىگە كىرىپ كەتتى . ئەسقەر ئۇلارنى كۆرۈپ :
- ئەسلىدە بۇ تومپاينىڭ ئايالىمۇ ئېغىر ئاياغكەندە دېگەنلەرنى ئويلىدى .
ۋاقىت ئاستا - ئاستا ئۆتمەكتە ، ئىككى دادا تىت - تىت بولغىنىچە ئاياللىرىنىڭ ساق - سالامەت يەڭگىشىنى كۈتمەكتە ئىدى ، تۇيۇقسىز ئوپېراتسىيە بۆلۈمىدىن بىر سېستىرا چىقىپ :
- گۈلباھارنىڭ يولدىشى قايسىڭلار ؟ - دېدى .
- مەن ، - دەپ جاۋاب بەردى ئەسقەر .
- باش دوختۇر سىزنى چاقىرۋاتىدۇ ، - ئارقامدىن مېڭىڭ . ئەسقەر زادى نېمىش بولغىنىنى ئاڭقىرالمايلا قالدى ۋە سېستىرانىڭ كەينىدىن ئەگەشتى . سېستىرا قىز ئەسقەرنى باش دوختۇرنىڭ يېنىغا باشلاپ كىردى ، باش دوختۇر ئەسقەرنى كۆرۈپ ۋارقىرىۋەتتى :
- ئەسقەر !
ئەسقەر دەماللىققا نېمە دېيىشىنى بىلەلمەي قالدى ، ھېلىقى دوختۇر يۈزىدىكى ماسكىسىنى ئېلىۋېتىپ كۈلۈمسىرەپ تۇرۇپ :
- ئەمدىغۇ مېنى تونىغانسەن ؟ - دېدى .
ئەسقەر سىنچىلاپ قارىغاندىن كېيىن :
- سانىيە ؟ بۇ سەنمۇ ؟ - دەپ ۋارقىرىۋەتتى .
- ھەئە مەن ، قانداق ئەھۋالىڭ ، شۇنچە يىللار بوپتۇ ئالاقىلاشمىغىلى ، - دېدى سانىيە .
- شۇنداق سانىيە ، - دەپ سۆز باشلىدى ئەسقەر ، ئالىي مەكتەپنى پۈتتۈرگەندىن كېيىن زادى ئالاقىلىشپ باقماپتۇق ، قانداقلارچە بۇ يەرگە كېلىپ قالدىڭ ؟
- ھازىر بۇ گەپلەرنى دېيىشىدىغان ۋاقىت ئەمەس ، ئايالىڭ ۋە بالاڭنىڭ ئەھۋالى ئېغىر ، بالاڭ ئوغۇلكەن بىراق ئايالىڭ بالدۇر يەڭگىپ قويغاچقا تولۇق يىتىلىپ بولالماپتۇ ، شۇڭا بالاڭ تۇغۇلغاندىن كېيىن پروبىركا ئىچىدە باقمىساق بولمايدۇ ، شۇڭا باشقا پىكرىڭ بولمىسا بۇ يەرگە ئىمزا قويۇۋەتكىن ،- دېدى سانىيە .
- سانىيە ، - ئەسقەر ناھايىتى جىددىيلەشكەن ھالدا ، ئوغلۇمنى چوقۇم قۇتقۇزۇۋالغىن ، سەندىن ئۆتۈنۈپ قالاي ...
- بىز چوقۇم بارلىق تىرىشچانلىقىمىزنى كۆرسىتىمىز ، سەن خاتىرجەم بول .
ئەسقەر سانىيەنىڭ سۆزىنى ئاڭلاپ سەل خاتىرجەم بولدى ، ۋە ئىمزاسىنى قويۇۋەتتى .
- ھە ، ئەمدى چىقىپ بىزنىڭ خۇش خەۋىرىمىزنى ساقلا ، ھازىر يەنە بىر تۇغۇت بار ، شۇڭا دەرھال ئوپېراتسىيە ئۆيىگە قايتمىسام بولمايدۇ ، چىقىپ ساقلاپ تۇرغىن .
سانىيە شۇنداق دېگىنىچە كىرىپ كەتتى ، ئەسقەر يەنە ئوپېراتسىيە بۆلۈمى سىرتىدا ساقلاشقا باشلىدى ، ئەسقەر ئۆزىنىڭ يېنىدا ئولتۇرغان ھېلىقى سەھرالىق تومپاينىڭ ئۆزىدىن بەكرەك جىددىيلىشىپ كەتكەنلىكىنى كۆرۈپ ھەم بايىقى بولغان ئىشلارنى ئەسلەپ ئۇنىڭغا غەزەبلەندى ، ۋە سىرتقا چىقىپ تاماكا چىكىشكە باشلىدى .
ئالاھەزەل يېرىم سائەتلەردىن كېيىن ، سېستىرا قىز ئەسقەرنى يەنە بىر قېتىم چاقىردى . ئەسقەر سانىيەنىڭ ئىشخانىسىغا كىرىشىگە سانىيە جىددىي ھالدا :
- ئەسقەر ، مېنى كەچۈر ، ئوغلۇڭ ۋە ئايالىڭنىڭ ھاياتىنى ساقلاپ قالدۇق ، بىراق ئوغلۇڭ تولۇق يىتىلمەيلا تۇغۇلغان بولغاچقا ، مېيىپ بولۇپ قېلىش ئېھتىماللىقى بەكمۇ چوڭ ، شۇڭا ئىدىيە جەھەتتە تەييارلىق قىلىپ قويغىن .
ئەسقەرنىڭ كېيىنكى گەپلەرنى ئاڭلىغۇسى كەلمىدى ۋە كەينىگە بۇرۇلۇپ سىرتقا قاراپ ماڭدى . سانىيە ئۇنىڭ ھازىرقى كەيپىياتىنى چۈشەنگەچكە ، ئۇنىڭغا قايتا نەسىھەت قىلىشنى خالىمىدى ۋە ئالىمئاخۇننىڭ ئايالىنىڭ تۇغۇت ئوپېراتسىيەسىگە كىرىپ كەتتى .
ئەسقەر قاتتىق ئۈمىدسىزلەندى ، ئۇ ھازىر ئۆزىنىڭ نېمە قىلىشىنىمۇ بىلەلمىدى ، ئەمدى بارلىق ئۈمىد يوق بولغانىدى ، دادىسىنىڭ ۋەسىيىتىمۇ كۆپۈككە ئايلانغانىدى ، ئۇ ھازىر بىر ناھىيەنىڭ باشلىقى ، پىلانلىق تۇغۇتتا باشقىلارغا ئۈلگە بولمىسا بولمايدۇ ، ئەسلى تۇنجى بالىسى ئوغۇل تۇغۇلغان بولسا ، ئىككىنچى بالىنى ئالمايتتى ، مانا ئەمدى ئىككىنچى بالىسى گەرچە ئوغۇل تۇغۇلسىمۇ ئەمما مېيىپ بولۇپ قېلىش ئېھتىماللىقى چوڭ ئىدى ، ئەمدى زادى قانداق قىلىش كېرەك ؟؟
ئۇ بىر نەچچە باش تاماكىنى يېنىش - يېنىشلاپ چېكىۋەتتى ، ئامال قانچە ؟ رېئاللىققا تەن بەرمەي بولمايدۇ دە ، ئارقىدىن دوختۇرخانىغا قايتىپ كىرىپ ھېلىقى سەھرالىق تومپاينىڭ يېنىدا ئولتۇردى .
- ئادەم مۇشۇنداق چاغدا بەك جىددىيلىشىپ كېتىدۇ ھە ، دەپ سۆز باشلىدى ئالىمئاخۇن .
- ھەئە ، - ئەسقەرنىڭ ھېچقانداق سوئالغا جاۋاب بەرگۈسى يوق ئىدى .
- بۇ مېنىڭ ئايالىمنىڭ تۇنجى تۇغۇتى ، مەھەللىدىكىلەرنىڭ ھەممىسى ئايالىڭ ئوغۇل تۇغىدۇ دېيىشكەنىدى ، بىلمىدىم ، ئوغۇل تۇغامدۇ ياكى قىزمۇ ؟ بىراق ھەممىسى ئاللانىڭ بىزگە بەرگەن نېمىتى ئەمەسمۇ ؟- ھې ھې ھې ...
ئالىمئاخۇن مۇشۇ گەپلەرنى قىلىپ تۇرىشىغا تۇيۇقسىز ئەسقەرنىڭ كۆڭلى ۋاللىدە يورۇپ كەتتى ۋە ئۇدۇل سانىيەنىڭ ئىشخانىسى تەرەپكە قاراپ يۈگۈردى .
- ئەسقەر ، مېنىڭ ئوپېراتسىيەدە ئىكەنلىكىمنى بىلىپ تۇرۇپ چاقىرىپسەن ، زادى نېمە ئىشتى ؟ - دېدى سانىيە .
ئەسقەر ھاياجانلانغان ھالدا :
- ھېلىقى يەنە بىر تۇغۇت بوشاندىمۇ ؟
- ھازىر بوشاندى ، شۇڭا سېنىڭ يېنىڭغا چىقتىم .
- ئۇ ئايالنىڭ بالىسى ئوغۇلمىكەن ؟ قىزمىكەن ؟
- ئوغۇل .
- سانىيە ماڭا بىر ياردەم قىلغىن .
- قېنى ئېيتقىنە ، قولۇمدىن كەلسىلا سېنىڭدىن ئايىمايمەن .
- ئۇنداق بولسا ياخشى ، بولسا ئىككى بوۋاقنى ئالماشتۇرىۋەتسەك ، سېنىڭچە قانداق بولار ؟ مۇشۇ ئىشقا بىر ياردەم قىلساڭ بولاتتى ...
قالغىنىنى داۋاملىق يازىمەن ، بۇ يېڭى تۇغۇلغان بوۋاقلارنىڭ تەغدىرى قانداق بولىدۇ ؟ ئەسقەر بىلەن ئالىمئاخۇننىڭ بالىلىرى ئالماشتۇرىۋېتىلەمدۇ ؟؟؟ بۇ تېمىغا داۋاملىق دىققەت قىلىپ تۇرغايسىز . قىززىقى تېخى كەينىدە ...
يوللىغان ۋاقتى 2011-11-23 18:05:55
يوللىغان ۋاقتى 2011-11-23 21:42:59
