ئالماشقان بوۋاقلار ( پوۋېست )

mehrim

	ۋىيەي شەنبە يەكشەنبىدە  يازمىسام دەپ يۈرەتتىڭىز قىنى بىر  پارچىمۇ يوقيا  تېمىنىڭ داۋامى  ھازىرغىچە  .

mehrim

	ماھىرە بىلەن جودا  قانداق ئىپلاس پىلانلارنى تۇزۋاتقاندۇ؟ بەك بىلگۈم كىلىپ كەتتى مېنىڭ .

mungdax

	ھۆرمەتلىك تەڭرىتاغ ئەپەندى ئىجادىيىتىڭىزگە زور ئۇتۇق تېلەيمەن. پوۋېسېتنىڭ تېمىسى بەكلا جايىدا قۇيۇلۇپتۇ، بۇنىمۇ بىر ئۇتۇق دىيىشكە بۇلىدۇ. ئاخىرىنى قاچان ئېلان قىلىسز؟ تىزراق بولسىڭىز بۇلاتتى.

تەڭرىتاغ

	كۆپچىلىكنىڭ تەقەززا بولىۋاتقانلىقىنى ئۇقىۋاتىمەن ، لېكىن ماڭىمۇ ئازراق ۋاقىت بېرىڭلار ، ئەسەرنى تېخىمۇ قىزىقارلىق قىلىپ يېزىپ چىقىشقا تىرىشىمەن .

تەڭرىتاغ

	داۋامى ...     ماھىرە ھە دېگىنىچە تېلېفوننى قويۇۋەتتى ، ئۇ بۈگۈن كەچ بولىدىغان ئىشلارنى ئويلاپ بىر تەرەپتىن سەل ھودۇقسا ، يەنە بىر تەرەپتىن ئۆزى تارتقان دەردلەرنىڭ ئازراق بولسىمۇ يەڭگىللەيدىغانلىقىنى ئويلاپ كۆڭلى تەسەللىي تاپماقتا ئىدى ... ئۇ شۇ خىياللارنى قىلىپ بولدىدە سانىيەنىڭ ياتىقى تەرەپكە قاراپ يۈرۈپ كەتتى .     ئۇ ئالدى بىلەن رەنانى ئىندەككە كەلتۈرمىسە بولمايدىغانلىقىنى ھېس قىلىپ يەتتى ۋە رەنانىڭ ياتىقىغا كىردى ، ئۇ ياتاققا كىرگەندە رەنا يوتقاندىن چىقماي ئۇخلاۋاتاتتى .     - ئاداش ، ھېلىغىچە ئۇخلاۋاتامسەن ؟     رەنا ئېرىنچەكلىك بىلەن كۆزىنى ئاچتى .     - ھەئە ئاداش ، ئاخشام كامىللار بىلەن بىللە دىباغا بېرىپ ئوينىغان ، شۇڭا بۈگۈن قوپماي ئۇخلىدىمغۇ ...    - ھەي ، تېز تۇر ، بۈگۈن كەچ غەيرەت ئۆزى سورۇن تەييارلاپتىكەن ، مەن ، سەن ۋە سانىيە ئۈچەيلەننى مېھمان قىلىدىكەن .    - راستما ؟ رەنانىڭ خامۇش كۆزلىرى يوغان ئېچىلدى .    - ھەئە ، ئورنۇڭدىن تۇرە ، سانىيەگە بۇ خەۋەرنى دەيلى .    - ئاداش ، غەيرەت ئىلگىرى بىز ئىككەيلەننىلا چاقىراتتى ، بۇ قېتىم ھەجەپ سانىيەنىمۇ چاقىرىپ قاپتۇغۇ ؟؟    - ھەئە ، شۇ غەيرەتنىڭ بىر دوستى باركەنتۇق ، ھېلىغىچە مۇھەببىتى يوقكەن ، شۇڭا ئۇنىڭ دوستىنى سانىيەگە تونۇشتۇرۇپ قويغۇسى باركەن ...    - ھەئە ، - رەنا يەنە ئۇخلاش ئۈچۈن تەمشەلدى .    - قوپە ئاداش ، ئۆزۈڭمۇ بىلىسەن ، سانىيە ئۆزى سەل جاھىل دېگىنە ، شۇڭا سەنمۇ ھە - پە دېيىشىپ بەرمىسەڭ ئۇ ئۇنىماي تۇرۇۋالامىكىن .    - ئۇنىمىسا بارمايلا قويسۇن بولدى ، ئۇنىڭسىز سورۇن قىززىمامتى ؟    - بولە جېنىم ئاداش ، غەيرەتكە چوقۇم ئېلىپ بارىمەن دەپ ۋەدە بېرىپ قويۇپتىكەنمەن ، ياردەم قىلغىنە ئۇنداق قىلماي ...     رەنا كۆزلىرىنى يىرتىپ ئېچىپ ئورنىدىن تۇردى ۋە ماھىرە بىلەن بىرلىكتە سانىيەنىڭ ياتىقىغا قاراپ ماڭدى . ئۇلار سانىيەنىڭ ياتىقىغا كىرگەندە سانىيە ئۆگۈنۈش قىلىپ ئولتۇراتتى .     - ۋاي ئاداش ، بۈگۈن دەم ئېلىش كۈنى بولسىمۇ ئارام ئالماي ئۆگۈنۈش قىلىپ كېتىپسىلىغۇ ؟ - ماھىرە مەنسىتمىگەندەك سۆز باشلىدى .    - مەۋسۇم ئاخىرىغا يېقىنلىشىپ قالدى ئەمەسمۇ ، شۇڭا تەكرار قىلىۋاتاتتىم ، - سانىيە بېشىنى كۆتۈرمەيلا جاۋاب بەردى .    - ئاداش بۈگۈن بولدى قىل ، ماھىرەچۇ قارا ، بۈگۈن كەچ بىزنى ئوينىتىپ كېلىدىكەن ، - دېدى رەنا نايناقشىپ تۇرۇپ .    - بولدى سىلەر بېرىۋېرىڭلار ، مەن بارماي ئۆگىنىش قىلاي .    - سانىيە ، بىز دوستقۇ ؟ - ماھىرە سۆز باشلىدى ، ھېلىمۇ خېلى بولدى ، سەن بىز بىلەن پەقەت كۇرسقا بىللە بېرىپلا قايتىسەن ، باشقا ۋاقىتلاردا بىزگە ئارىلاشمايسەن ، لېكىن بىز سېنى دوست دەپ يۈرۈيمىز ، ئەمدى بۈگۈن بىللە ئويناپ كېلەيلى دېسەكمۇ ماقۇل بولمامسەن ؟ - ماھىرە سەل قاتتىق تېگىشكە باشلىدى .   - خاپا بولمىغىن ، مەن شۇ ئۆگىنىشىمنى قىلاي دېگەن ، ئۇنىڭ ئۈستىگە كەچتە ئادەتتە مەكتەپ سىرتىغا چىقىشنى بەك ياقتۇرۇپ كەتمەيمەن ، كېيىنچە پۇرسەت بولسا بىللە ئويناپ كېلەمىز ، ياخشى كۆڭلۈڭگە رەھمەت .    - ئاداش بىللە بارايلىچۇ ؟ - رەنا سانىيەگە يالۋۇرغان قىياپەتتە ...    - ئاداش مېنى مەجبۇرلىماڭلار ، مەن راستلا بارالمايمەن .    ئىشنىڭ ئەپلەشمەيۋاتقانلىقىنى كۆرگەن ماھىرە سۆز ئاچتى :    - بولدى قىلە ئاداش ، بىز تېخى سانىيەنى بىز بىلەن دوست دەپ يۈرۈپتۇق ، لېكىن سانىيە بىز بىلەن ئارىلىشىشنى خالىمايدىكەن ، يۈرە بولدى ، چىقىپ كېتەيلى ، - ماھىرە شۇنداق دېگىنىچە سىرتقا قاراپ ماڭدى ، رەنامۇ ئۇنىڭغا ئەگەشتى ، ماھىرە كۆڭلىدە سانىيەنى ئۇنىڭ ئارقىسىدىن چىقىدۇ دەپ ئويلىغانىدى ، ئەمەلىيەتتە سانىيە ئۇلارنىڭ ئارقىسىدىن چىقمىدى .     ماھىرە بىلەن رەنا چىقىپ كەتكەندىن كېيىن ، سانىيەنىڭ كاللىسى ئېلىشىپ كەتتى ، كىتابقا شۇنچە قاراپ ئولتۇرغان بولسىمۇ ، كاللىسىغا ھېچنىمە چۈشمىدى ، دەل شۇ چاغدا سانىيەنىڭ ياتاقدىشى گۈلنۇر سۆز ئاچتى :    - ئاداش ، بايا سەل ئاشۇرۇۋەتتىڭمۇ قانداق ؟    - قانداق دەيسەن ؟ - دېدى سانىيە .    - ئۇلار ياخشى كۆڭلى بىلەن سېنى بىللە ئويناپ كېلىشكە چاقىرىپ كىرسە ، سەن ئۇلارنى رەت قىلىۋەتتىڭ ئەمەسمۇ ؟    - جېنىم ئاداش ، لېكىن مېنىڭ كەچتە سىرتقا چىققۇم ، ئۇلار بىلەن بىللە ئويناپ كەلگۈم قەتئىيلا يوق .    -مەن بىلىمەن ، لېكىن مەكتەپتە ھەممىمىز بىر - بىرىمىز بىلەن ئارىلىشىپ ، ھەمكارلىىشپ ، ئۆز - ئارا ياردەملىشىپ ئوقۇيمىز ئەمەسمۇ ؟ ئۇنىڭ ئۈستىگە ئەتىدىن - كەچكىچە ئۆگىنىش قىلغاندىن سىرتلارغا چىقىپ ئانچە - مۇنچە كاللاڭنى ئېچىپ كەلگىنىڭمۇ ياخشى ئەمەسمۇ ؟ ئەڭ مۇھىمى ماھىرە بىلەن رەنا سەندىن خاپىلاپ قالدىغۇ دەيمەن ؟     سانىيە گۈلنۇرنىڭ سۆزىنى ئاڭلاپ ئويلىنىپ قالدى ، ئۇ ئۆزىنى بىلگەندىن تارتىپ تا ھازىرغىچە بىرەرى بىلەن تاكاللىشىپ باققان ، بىرەرىنى رەنجىتىپ قويغان ئادەم ئەمەستى ، لېكىن بۈگۈنكى ئىش سانىيەنىڭ كاللىسىغا كىرىۋېلىپ ، ئۇنى بىر قىسمىلا قىلىپ قويغانىدى .     ئۇ بىر ھازا ئويلاندىدە ئورنىدىن تۇرۇپ ماھىرەنىڭ ياتىقى تەرەپكە قاراپ ماڭدى .     ماھىرە ياتاققا قايتىپ چىققاندىن كېيىن سانىيەگە ئىچ - ئىچىدىن غەزەبلەندى ، لېكىن ئامال يوقتە ؟ ماھىرە سانىيەنىڭ بارمايدىغانلىقىنى غەيرەتكە بىلدۈرۈپ قويۇش ئۈچۈن قولىغا ئەمدى تېلېفوننى ئېلىشىغا سانىيە كىرىپ كەلدى .     - ئاداش ، بايا خاپا بولمىغىن ، بوپتۇ ، سىلەر بىلەن بارسام باراي .     - راستما ؟ - ماھىرە خۇشاللىقىدا سانىيەنىڭ ئىككى قولىدىن چىڭ تۇتۇپ تۇرۇپ .     - ھەئە ، لېكىن ئۇزۇن ئولتۇرمايمەن .     - رەھمەت سانىيە يۈزۈمنى قىلغىنىڭغا .     - ھېچقىسى يوق ، ئەمسە مەن چىقىپ كەتتىم ، ماڭار چېغىڭلاردا چاقىرىۋالاسىلەر .    ماھىرە تەكەللۇپ بىلەن سانىيەنى ئۇزۇتۇپ قويۇپ ، جوداغا تېلېفۇن قىلدى .    - ئىش پۈتتى .    - ھە ياخشى ، ئەمدى ئىككىنچى قەدەمنى ياخشى بېسىشقا تەييارلىق قىلغىن .    ئۇلار قىسقىغىنىلا پاراڭلاشتى ، ماھىرەنىڭ چىرايىدا يەنىلا بىر خىل ئەندىكىش ۋە خۇشاللىق ئەكس ئېتەتتى .     ماھىرە بىلەن رەنا چۈشتىن كېيىن تاماق يەپ بولغاندىن كېيىن ياتاققا كىرىۋېلىپ ، قايسى كىيىمنى كېيىدىغانلىقى توغرىسىدا مەسلىھەتلەشتى ، ئارقىدىن ئولتۇرۇپ نەچچە سائەتلىك گىرىمنى باشلىۋەتتى ، ئۇلار گىرىملىرىنى قىلىشىپ ئۆزىگە ياراشقاندا ، ئاللىبۇرۇن قاش قارايغان بولۇپ ، تەييارلىقلىرىنى تولۇق پۈتتۈرۈشكەن ئىككى قىز ئىگىز پاشىنىلىق ئاياغلىرىنىڭ ئاۋازىنى بولۇشىغا چىقىرىپ سانىيەنىڭ ياتىقى تەرەپكە قاراپ ماڭدى .     ئۇلار سانىيەنىڭ ياتىقىغا كىرگەندە سانىيە ئۆگىنىش قىلىپ ئولتۇرغان بولۇپ ، ئىككى قىز بۇنى كۆرۈپ سۆز باشلىدى :    - ۋاي ئاداش ، بولدى قىلغىن ، ئەمدى كۆرمە ، يۈرە ماڭىمىز .    -ھە ، توختاڭلار چاپىنىمنى كىيىۋالاي .    ئۈچ قىز ياتاقتىن چىقىپ پەلەمپەي تەرەپكە قاراپ ماڭدى . دەل شۇ چاغدا سانىيەلەرنىڭ ياتىقىدىكى تېلېفون ئەنسىز جىرىڭلاپ كەتتى . بىر ھازادىن كېيىن گۈلنۇر ياتاقتىن بېشىنى چىقىرىپ كېتىپ بارغان ئۈچ قىزغا قاراپ ۋارقىدىرى .    - سانىيە ، تېلېفون ...    - ھە مانا ، سانىيە يۈگۈرگىنىچە ياتاققا كىرىپ تېلېفوننى ئالدى .    - جېنىم بالام ، مەن ئاپاڭ .    - ھە ئاپا ، قانداق ئەھۋالىڭىز ، ياخشى تۇردىڭىزمۇ ؟ مەن تېخى ئەتە بىراقلا يېڭى يىلىڭىزنى مۇبارەكلەپ سىزگە تېلېفون قىلاي دېگەنىدىم ، مەن تېلېفون قىلغۇچە مانا ئۆزىڭىز قىپسىز .    - جېنىم بالام ، مەن ئەزەلدىن نامازشام ۋاقتىدا ئۇخلىمايتتىم ، بۈگۈن نېمە بولدى ، كۆزۈم ئۇيقۇغا بېرىپ مۈگدەپ قاپتىمەن ۋە كىچىككىنە چۈش كۆرۈپتىمەن ، چۈشۈمدە سەن ئىگىز بىر تاغنىڭ ئۈستىدە ئۆزۈڭ يالغۇر يۈرگۈدەكسەن ، يا تاغدىن چۈشەلمىگۈدەكسەن ، يا ئاۋازىڭنى چىقىرىپ ۋارقىرىيالمىغۇدەكسەن ، تۇيۇقسىز چۆچۈپ ئويغىنىپلا مەھەللىمىزدىكى تېلېفونخانىغا چىقىپ ساڭا تېلېفون قىلىۋاتىمەن ، سەن ئۆزۈڭ تېنچ - ئامان تۇرۇۋاتقانسەن ؟    - جېنىم ئاپا ، خاتىرجەم بولۇڭ ، مەن ناھايىتى ياخشى تۇرۇۋاتىمەن ، مېنىڭدىن ئەنسىرىمەڭ ، سىزنى قارا بېسىپ قاپتۇ ، ھى ھى ھى ...    - شۇنداق ئوخشايدۇ بالام ، لېكىن ئۆزۈڭگە بەك دىققەت قىلغىن ، كوچىغا چىقىپ قالساڭ سەدىقە بېرىۋەتكىن ، خۇدايىم سېنى ئۆز پاناھىدا ساقلىسۇن ، ئەمسە يەنە كۆرۈشەرمىز بالام ...    - خاتىرجەم بولۇڭ ئاپا ، مەن چوقۇم سىز دېگەندەك قىلىمەن ، ئەتە يېڭى يىل كۈنى سىزگە ، دادامغا قايتىدىن تېلېفون قىلاي ھە ، ئەمسە خوش ، ئاللاغا ئامانەت . - سانىيە شۇنداق دېگىنىچە تېلېفوننى قويدى ۋە تېلېفونغا چاقىرىپ قويغان گۈلنۇرغا رەھمەت دەپ قويۇپ سىرتقا قاراپ ماڭدى .     - بولە ئاداش ، ئادەمنى بەك ساقلاتتىڭ ،- دېدى ساقلاپ تاقىتى تاق بولغان رەنا .     - مانا ، مانا ، ئۆيدىن تېلېفون كەپتىكەن ، شۇڭا سەل ھايا بولۇپ قالدىم .     ئۈچ قىز ياتاقتىن چىقىپ مەكتەپ دەرۋازىسى تەرەپكە قاراپ ماڭدى ، ئەتراپنى قاراڭغۇلۇق باسقان بولۇپ ، ئاسماندا ئايمۇ كۆرۈنمەيتتى ، سانىيە كېتىۋېتىپ ئاپىسىنىڭ كۆرگەن چۈشىنى ئېسىگە ئېلىپ قالدى ، ئۇ گەرچە خۇراپىي ئىشلارغا ئۇنچە بەك ئىشىنىپ كەتمىسىمۇ لېكىن كۆڭلىگە ئازراق غەم چۈشۈپ قالغانىدى . دەل شۇ چاغدا ئۇنىڭ قىزلار بىلەن بارغۇسى قەتئىي كەلمىدى ، بىراق ئامال قانچە ؟ ئۆزى چۈشتىن بۇرۇن ئاتايىتەن ماھىرەنىڭ يېنىغا كىرىپ ماھىرەگە بارىدىغانلىقىنى ئېيتقان ئەمەسمۇ ؟ سانىيە ئاخىرى قىزلار بىلەن بىللە بېرىش ، ۋە يېرىم سائەتلەر ئولتۇرۇپ قايتىپ كېتىشنى كۆڭلىگە پۈكتى . قىزلار مەكتەپ دەرۋازىسىغا يېقىنلاشقاندا سانىيە تۇيۇقسىز :     - توختاپ تۇرۇڭلار ، پارچە پۇل بارمۇ ؟    - نېمە قىلىسەن ؟ - دەپ سورىدى ئىككى قىز تەڭلا .    - ئاپتوبۇسقا ئولتۇرىدىغان پارچە پۇل تەييارلىۋالماپتىكەنمەن ، ساقلاپ تۇرساڭلار پۇلۇمنى پارچىلىۋالاي ...    - ئوھۇش ، نېمە دەيدىكىن دەپتىمەن ، مۇشۇنداق كۈندىمۇ ئاپتوبۇسقا ئولتۇرامدۇق ؟ بولدى بۈگۈن سېنى ئۆزۈم ئاپىرىمەن دېگەندىكىن ، سېنى تاكسىغا سېلىپ ئاپىرىمەن . خاتىرجەم بولۇپ كەينىمىزدىن ماڭساڭلا بولدى .     سانىيە ئۇلارنىڭ گېپىنى ئاڭلاپ جىم بولدىدە قىزلارنىڭ كەينىدىن ئەگەشتى ، قىزلار مەكتەپ ئالدىغا چىقىپ تاكسىدىن بىرنى توسىدى ، ماھىرە ئالدىغا ، رەنا بىلەن سانىيە كەينىگە چىقتى ، ماھىرە شوپۇرغا دېدى :    - << بۈيۈك دۇنيا >> بەزمىخانىسىغا ھەيدەڭ .     سانىيە ماھىرەنىڭ سۆزىنى ئاڭلاپ سەل چۆچۈدى ، لېكىن ئىككى دوستىنىڭ بارلىقىنى ئويلاپ جىم بولدى ، يەنە كېلىپ بۇ ئۇنىڭ بىرىنچى قېتىم تاكسىغا ئولتۇرۇشى ئىدى ، مەكتەپكە يېڭى كەلگەن چاغلاردا ، ئۇ يوللاردا كېتىۋاتقان تاكسىلارنى كۆرۈپ ، شۇ تاكسىلارغا ئولتۇرغان كىشىلەرگە ھەۋەس قىلغان ۋە ئولتۇرۇپ باققۇسى كەلگەنىدى ، مانا بۈگۈن ئۇ تاكسىغا ئولتۇردى ، قەلبى شادلىققا تولغانىدى .     رەنا بولسا تاكسىدا ئولتۇرۇپ ئالىي مەكتەپ ھاياتىنىڭ بۇنچىلىك كۆڭۈللۈك ئىكەنلىكىگە ئىشەنگۈسى كەلمەيتتى ، تېخى تۆنۈگۈنلا كامىللار بىلەن ئويناپ كەلگەن رەنا بۈگۈن يەنە ئوينىغىلى چىققانلىقىدىن چەكسىز خۇشال ئىدى .     ماھىرە بولسا سائىتىگە پات - پات قاراپ قوياتتى ، گەرچە بۈگۈن ئوينىغىلى ماڭغان بولسىمۇ بىراق << بۈيۈك دۇنيا >> بەزمىخانىسىغا ئاز قالغانسېرى ئۇنىڭ يۈرىكى دۈپۈلدەپ سوقۇپ ، جىددىيلىشىپ كېتىۋاتاتتى ...     داۋامى ھۇزۇرۇڭلاردا بولىدۇ ...

nazila1017

	ئەسىرىڭىز بەك ياخشى چىقپتۇ، ئاخىرىنى تېزراق يازغان بولسىڭىز.   ھارمىغايسىز.

ھايات

	ئاخىرىنى ھە تېز-تېز...

bargiya

	ئەجەپ  جىددىيلىشىپ كېتىۋاتىمەن. ۋاقتىڭىزنىڭ قىسلىقىنى بىلىپ تۇرۇپ يەنىلا ئاخىرىغا قىزىققاچقا ئالدىرىتىشقا مەجبۇر بولۇۋاتىمىز

mehrim

	سانىيەنى قايسى قىسمەتلەر  كۈتۈپ تۇرۋاتقاندۇ ؟

ئەقىدە

	تېز!!