ئالماشقان بوۋاقلار ( پوۋېست )

ساباھەت

	ئىجادىيىتىڭىزگە ئۇتۇق تىلەيمەن!

تەڭرىتاغ

	داۋامى ...    بىر شەنبە كۈنى سانىيە كۇرستىن چۈشۈپ ، ئۆز ئادىتى بويىچە سىنىپتا دەرس تەييارلاپ ئولتۇراتتى ، ئۇ كىتابقا شۇنچىلىك بېرىلىپ كەتكەچكىمىكىن ، سىنىپتا ئۆزىدىن باشقا ھېچقانداق كىشىنىڭ قالمىغانلىقىنى سەزمەيلا قالدى ، بۇ ۋاقىت خېلى كەچ كىرىپ قالغان چاغ بولۇپ ، سىنىپ ئىچىدىكى چىراق ياندۇرۇلغانىدى ، توساتتىن چىراق ئۆچۈپ ، بىر قارا گەۋدە قولى بىلەن سانىيەنىڭ ئاغزىنى چىڭ قاماللىدى .     سانىيەنىڭ يۈرىكى جىغ قىلىپ قالدى ، ئۇ دەرھال قوللىرى بىلەن بۇ بىر جۈپ كۈچلۈك قولنىڭ ئېسەنجىسىدىن قۇتۇلۇش ئۈچۈن يۇلقۇناتتى ، شۇنچە كۈچەپ ۋارقىرىسىمۇ ئاۋازى چىقمايۋاتاتتى . تۇيۇقسىز ھېلىقى بىر جۈپ قول سانىيەنى قويۇۋەتتى .     -ھا ھا ھا ، قورقۇپ ئۆلۈپ بەرمەڭ مېنىڭ ئالدىمدا ، ھا ھا ھا ...     سانىيە دەرھال كەينىگە قارىدى ، قاراڭغۇدا ئالدىدىكى ئادەمنىڭ كىم ئىكەنلىكىنى پەرقلەندۈرەلمىگەنىدى .     - چىراقنى ياق ، دېدى سانىيەنىڭ ئالدىدا تۇرغان قارا كۆلەڭگە .     شۇ ھامان چىراق يېقىلدى ، چاچلىرىنى رەتلىك تارىغان ، ئاق يۈزلۈك ، ئۇچىسىغا قارا خۇرۇم چاپان كەيگەن سانىيە بىلەن تەڭ دېمەتلىك بىر ئوغۇل سانىيەنىڭ ئالدىدا ھىجىيىپ تۇراتتى . ئۇنىڭ ئارقىسىدا يەنە ئىككەيلەن قوللىرىنى قوشتۇرغىنىچە ئۇنىڭغا قاراپ تۇراتتى .       - سەن كىم ؟ نېمىشقا بۇنداق قىلىسەن ؟ - دەپ ۋارقىرىدى سانىيە .     - مەن كىم ؟ - ھېلىقى خۇرۇم چاپان ئارقىسىدىكىلەرگە سوئال نەزىرى بىلەن قارىدى ، مەنمۇ ئۆزۈمنىڭ كىم ئىكەنلىكىنى بىلەلمىدىمغۇ ؟ - ھا ھا ھا ...     ئۇنىڭ ئارقىسىدىكى ئىككەيلەنمۇ ئۇنىڭغا ئەگىشىپ كۈلۈشكە باشلىدى .     سانىيە بۇلار بىلەن گەپ تالىشىپ ئولتۇرۇشنىڭ ھاجىتى يوقلۇقىنى بىلىپ ، كىتاب - دەپتەرلىرىنى يىغىشتۇرۇپ ، سىرتقا قاراپ ماڭدى .     - بېرىپ ئالدىنى توسامدۇق ؟ - دېدى ھېلىقى خۇرۇم چاپاننىڭ كەينىدە تۇرغان بىرەيلەن ...     - ياق ، بولدى ، بەك ئۈركىتىپ قويۇشقا بولمايدۇ ، بۈگۈن مۇشۇنچىلىك بولسۇن ...    سانىيە قەدىمىنى ئىتتىكلىتىپ يۈگۈرگىنىچە سىرتقا چىقتى ، ئەتراپنى قاراڭغۇلۇق باسقان بولۇپ ، كوچا چىراقلىرى يولنى يورۇتۇپ تۇراتتى ، ئۇ شىنجاڭ ئۇنۋېرسىتېتى ئالدىدىكى بېكەتتىن ئاپتوبۇسقا چىقىپ ، مەكتىپىگە قاراپ ماڭدى . گەرچە ئاپتوبۇسقا چىقىۋېلىپ كۆڭلى خېلى تىنغاندەك بولسىمۇ ، بىراق پۇت - قوللىرى ئىختىيارسىز تىتىرەيتتى ، خۇددى ھېلىقى خۇرۇم چاپان ئۇنىڭ ئارقىسىدىن كېلىۋاتقاندەكلا تۇيۇلۇپ ، ئۇنى بىر خىل ئەندىشىگە سالاتتى ، خېلى تېز مېڭىۋاتقان ئاپتوبۇسنىڭ سۈرئىتىمۇ ئۇنىڭغا ناھايىتى ئاستا مېڭىۋاتقاندەك تۇيۇلاتتى ، ئاپتوبۇس ئاخىرى تىببىي ئۇنۋېرسىتېتنىڭ ئالدىدا توختىدى . سانىيە ئۇھ دېگىنىچە قەدەملىرىنى ئىتتىكلىتىپ ياتىقى تەرەپكە يۈرۈپ كەتتى ...     ئەمدى گەپنى ھېلىقى خۇرۇم چاپاندىن ئاڭلايلى : بۇ خۇرۇم چاپانلىق يىگىتنىڭ ئىسمى غەيرەت بولۇپ ، ئۆزى ناھايىتى ئۇرۇشقاق بولغاچقا باشقىلار ئۇنى غەيرەت جودا دەپ ئاتايتتى ، تولۇق ئوتتۇرا مەكتەپنى پۈتتۈرگەندىن كېيىن ئۇ ئالىي مەكتەپكە ئۆتەلمىدى ، بىراق دادىسى يول مېڭىپ يۈرۈپ ئۇنى شىنجاڭ ئۇنۋېرسىتېتىغا ئورۇنلاشتۇردى ، ئالىي مەكتەپكە كىرگەندىن كېيىن ، ئۇ ئۆزىنىڭ قانات - قۇيرۇقىنىڭ تېخىمۇ يىتىلگەنلىكىنى ھېس قىلىپ ، ئويۇن - تاماشىغا بۆلەكچىلا بېرىلىپ كەتتى ، ھەتتا ئارقىسىغا بىر نەچچەيلەننى سېلىۋېلىپ ، كۆزىگە سىغمىغاننىڭ ئەدىپىنى بېرىپ ، چاتاق چىقىرىپلا يۈردى ، ساقچىخانىدىن بىر نەچچە قېتىم تۇتۇلغان بولسىمۇ يەنىلا شۇ ھېلىقى باشلىق دادىسى يول مېڭىپ يۈرۈپ ئۇنى ساقچىخانىدىن ئېلىپ چىققانىدى .     مەلۇم بىر شەنبە كۈنى غەيرەت جودا ئارقىسىغا ئىككەيلەننى سېلىپ مەكتەپ سىرتىدا تاماق يىدى ۋە مەكتەپكە قايتتى ، ئۈچىنچى دوختۇرخانا ئالدىغا كەلگەندە ئۇنىڭ كۆزى تۇيۇقسىز كۇرسقا تىل ئۆگىنىش ئۈچۈن ماڭغان سانىيەگە چۈشتى .     - ھەي بالىلار قاراڭلار ، ئاۋۇ << تۇمۇچۇق >> قانداقراقكەن ؟     - غەيرەت كۆزۈڭ مال تونۇيدۇ جۇمۇ .     - سىلەرچە مەن بۇ << تۇمۇچۇق >> نى نەچچىلىك ۋاقىتتا كەلتۈرۈپ بولارمەن ؟     - ئۈچ ئايدا .     - ئۈچ ئاي ؟ سەن مېنى نىمە كۆرۈۋاتىسەن ؟ مۇشۇنچىلىك كىچىككىنە ئىشقا ئۈچ ئاي ۋاقىت كېتەمدا ؟ قاراپ تۇر ، بىر ئاينىڭ ئىچىدە كەلتۈرۈۋالىمەن ...     ئۇلار شۇنداق دېيىشكىنىچە سانىيەنىڭ كەينىدىن مېڭىپ سانىيە ئوقۇۋاتقان كۇرسنىڭ ئورنىنى كۆرۈۋالدى ، ۋە بىر - بىرىگە مەنىلىك قارىشىپ قويۇپ مەكتەپكە قايتتى .     سانىيە كىچىكىدىنلا ناھايىتى ئوماق ، چىرايلىق ، ئەخلاقلىق قىز بولۇپ چوڭ بولدى . ئۇنىڭ گۈزەل چىرايى كۆرگەنلا كىشىنى جەلپ قىلاتتى ، مۇشۇ چاققىچە ئۇ نۇرغۇنلىغان ئۇنىڭ ئارقىسىغا كىرىۋېلىپ مۇھەببەت تەكلىپى قويغان يىگىتلەرنىڭ تەكلىپىنى چىرايلىقچە رەت قىلىپ ، ئوقۇشىنى داۋاملاشتۇرىۋاتاتتى ، ئۇنىڭ نەزىرىدە ئەمدىلا ئالىي مەكتەپكە قەدەم باسقان بىر ئوقۇغۇچى ئۈچۈن ئېيتقاندا ئوقۇش ھەممىدىن مۇھىم ئورۇندا تۇراتتى .     مەلۇم بىر شەنبە كۈنى غەيرەت ئىككى ئاغىنىسى بىلەن سانىيەنىڭ كېلىشىنى كۈتۈپ بېكەتتە سانىيەنى ساقلىدى ، ئالاھەزەل 15 مېنۇتلاردىن كېيىن 1 - يول ئاپتۇبۇسىدىن بىرى كېلىپ سانىيە ئاپتوبۇستىن چۈشتى ، غەيرەت ئۆزىنىڭ مۇشۇ تۇرقى بىلەن چوقۇم سانىيەنىڭ دىققىتىنى تارتىمەن دېگەن مەقسەتتە سانىيەنىڭ ئۆتەر يولىدا تۇرۇۋالدى ، بىراق سانىيە پۈتۈن ئەس خىيالى بىلەن ئىنگىلىزچە تېكىست يادلاپ ماڭغاچقا غەيرەتكە قاراپمۇ قويماي ئۆتۈپ كەتتى ، بۇنى كۆرۈپ غەيرەتنىڭ ئاغىنىلىرى ئۇنى تازا مازاق قىلدى ، ئەزەلدىن بۇنداق ئۇياتچىلىققا قالمىغان غەيرەت جودا ئاچچىقىدا غەزەبتىن تىترەپ كەتتى ، سانىيەنىڭ ئارقىسىدىن يۈگىرەپ بېرىپ ئۇنى راسا بىر ئۇرغۇسى ، چوڭ كوچىغا چېچىدىن تارتىپ سۆرەپ ئاچىقىپ ، سەت گەپلەر بىلەن پۇخادىن چىققۇچە ھاقارەتلىگۈسى كەلدى ، لېكىن ئۇنداق قىلسا سانىيەنى كەلتۈرۈلمەيدىغانلىقىنى ھېس قىلىپ نىيىتىدىن ياندى .     غەيرەت جودا ئاغىنىلىرى بىلەن سانىيەنىڭ دەرستىن چۈشۈشىنى ساقلىدى ، دەرس توشۇپ باشقىلار بىر - بىرلەپ قايتىشقا باشلىغان بولسىمۇ سانىيەنىڭ قارىسى كۆرۈنمەيتتى ، ئاخىرى ئۇلارنىڭ تاقىتى تاق بولۇپ ، سىنىپقا چىقتى ، سىنىپتا سانىيە يالغۇز ئۆگۈنۈش قىلىۋاتاتتى ، بۇنى كۆرگەن غەيرەت جودا بايىقى بولغان ئىشلارنى قايتىدىن ئەسلەپ سانىيەنى بىر چۆچۈتۈپ قويماقچى بولدى ۋە ئاغىنىلىرى بىلەن سانىيەنى قورقۇتۇش ئويۇنىنى ئويناپ چىققانىدى .     سانىيە مەكتەپكە قايتىپ كەلگەندىن كېيىنمۇ يۈرىكى جايىغا چۈشمىدى ، كۆز ئالدىغا بايىقى ئىشلار كېلىۋاتاتتى ، ئۇنىڭ ئاتا - ئانىسىمۇ سانىيە ئوقۇشقا مېڭىش ئالدىدا سانىيەگە نەسىھەت قىلىپ :    - قىزىم ، ئاڭلىساق ئۈرۈمچىنى بەك قالايمىقان دەيدۇ ، شۇڭا سىرتلارغا چىققاندا بەكرەك دىققەت قىلىڭ ، بولسا دوستلىرىڭىز بىلەن بىللە چىقىڭ ، مەكتەپكە بەك كەچ قالماڭ ... دەپ ئېيتقانىدى .     سانىيە ئاتا - ئانىسىنىڭ سۆزلىرىنى ئېسىگە ئېلىپ شۇنداقلا ئۆزىنىڭ قاپ يۈرەكلىك قىلغانلىقىنى ئويلاپ يۈرىكى جىغغىدە قىلىپ قالدى ، ئۇنىڭ نەزەرىدە ئۈرۈمچىمۇ سانىيەنىڭ يۇرتىدەك ، مەھەللىسىدىكى مەكتىپىدەك شۇنچىلىك خاتىرجەم ۋە تېنچ ئىدى ، سانىيە تولۇق ئوتتۇرا مەكتەپنىڭ ئۈچىنچى يىللىقىدا ئوقۇۋاتقاندا ھەمىشە سىنىپتا قېلىپ ئۆگىنىش قىلاتتى ، بەزىدە كەچ قالسىمۇ ھېچقانداق خەتەر چىقمايتتى ، چوڭلارمۇ سانىيەدىن ئەنسىرەپ كەتمەيتتى ، بىراق سانىيە بۈگۈندىن باشلاپ ئۆزىنىڭ بەكرەك دىققەت قىلمىسا بولمايدىغانلىقىنى ، ئۈرۈمچىنىڭ ئۆز يۇرتىغا ئوخشىمايدىغانلىقىنى ھېس قىلغانىدى .     سانىيەنى يەنە قانداق ئىشلار كۈتۈپ تۇرىۋاتىدۇ ؟ غەيرەت جودا بىلەن بولغان مۇناسىۋىتى قانداق بولىدۇ ؟ يەنە قانداق ئىشلار يۈز بېرىدۇ ؟ داۋامى داۋاملىق ھۇزۇرۇڭلاردا بولغۇسى ...

تەڭرىتاغ

	داۋامى :     سانىيە ئاتا - ئانىسىنىڭ سۆزلىرىنى ئېسىگە ئېلىپ شۇنداقلا ئۆزىنىڭ قاپ يۈرەكلىك قىلغانلىقىنى ئويلاپ يۈرىكى جىغغىدە قىلىپ قالدى ، ئۇنىڭ نەزەرىدە ئۈرۈمچىمۇ سانىيەنىڭ يۇرتىدەك ، مەھەللىسىدىكى مەكتىپىدەك شۇنچىلىك خاتىرجەم ۋە تېنچ ئىدى ، سانىيە تولۇق ئوتتۇرا مەكتەپنىڭ ئۈچىنچى يىللىقىدا ئوقۇۋاتقاندا ھەمىشە سىنىپتا قېلىپ ئۆگىنىش قىلاتتى ، بەزىدە كەچ قالسىمۇ ھېچقانداق خەتەر چىقمايتتى ، چوڭلارمۇ سانىيەدىن ئەنسىرەپ كەتمەيتتى ، بىراق سانىيە بۈگۈندىن باشلاپ ئۆزىنىڭ بەكرەك دىققەت قىلمىسا بولمايدىغانلىقىنى ، ئۈرۈمچىنىڭ ئۆز يۇرتىغا ئوخشىمايدىغانلىقىنى ھېس قىلغانىدى .     ئاشۇ شەنبىدىن باشلاپ سانىيە كۇرسقا بېرىپ كېلىشتە ئالاھىدە دىققەت قىلىدىغان بولدى ، ئۇ سىنىپىدىكى ماھىرە ، رەنالارنىڭمۇ ئۆزى بىلەن بىر كۇرستا ئوقۇيدىغانلىقىنى بىلسىمۇ لېكىن ئۇ قىزلارغا ئارىلىشىشنى تازا لايىق كۆرمىگەنىدى ئۇنىڭ ئۈستىگە ماھىرە بىلەن رەنانىڭ كۇرسقا رەسمىي ھالدا بىلىم ئۆگىنىش ۋە ياكى قىزىقىپلا قاتناشقانلىقىنى بىلگىلى بولمايتتى ، بىراق شۇ ئىشتىن كېيىن ، سانىيە ئۇلار بىلەن بىللە بىرىپ ، بىللە قايتىدىغان بولدى . ئامال قانچە ؟ ئۇنىڭ بىلىمگە بولغان قىزىقىش ۋە ھەۋىسى ئۇنى مۇشۇنداق قىلىشقا مەجبۇر قىلغانىدى .     بۇ ئىككى شەھەرلىك قىز سانىيەنىڭ نېمە مەقسەتتە ئۆزىگە قوشۇلغانلىقىنى بىلەلمىگەن بولسىمۇ بىراق يەنىلا سانىيەنى چەتكە قاقمىدى ، ئۇلار سانىيەنىڭ گۈزەل رۇخسارىغا ھەۋەس قىلىشاتتى ، گەرچە ئىچ - ئىچىدىن ھەسەت قىلسىمۇ ، بىراق يەنىلا كاللىسىدا ئاللىقانداق مەقسەتلەرنى پۈكۈپ ، ئۇنىڭ بىلەن تېزلا چىقىشىپ كەتتى ، ئۇلار بۇ چىرايلىق قىزنىڭ ھامان ئەسقاتىدىغانلىقىغا ئىشىنەتتى .     ھېلىقى ئىش يۈز بېرىپ كېيىنكى ھەپتىسى بۇ ئۈچ قىز بىللە كۇرسقا ماڭدى ، ئاپتوبۇس بېكەتكە كېلىپ توختىشىغا بۇ ئۈچ قىز خۇشال - خۇرام پاراڭلىشىپ ئاپتوبۇستىن چۈشتى ، توساتتىن سانىيەنىڭ كۆزى ئۇدۇلدىكى دوقمۇشتا تاماكا چېكىپ تۇرغان خۇرۇم چاپانغا چۈشتى ۋە يۈرەكلىرى ئەنسىز سوقۇپ كەتتى . سانىيە قىزلارنىڭ ھەمراھلىقىدا سىنىپقا كىرىپ كەتتى ، غەيرەت ئۇلارنىڭ سىنىپقا كىرىپ كەتكەنلىكىنى كۆرۈپ ئالدىنقى ھەپتە بىللە سىنىپقا كىرگەن ئىككى ئاغىنىسىگە تېلېفۇن قىلدى .     - تېز كېلىڭلار ، ھېلىقى << تۇمۇچۇق >> بۈگۈن ئۈچ بولۇپ كەپتۇ ، خېلى بولىدىغان نېمىلەركەن ، مۇمكىن بولسا بۈگۈن كەچتە ئەپلەيمىز ...     غەيرەت تېلېفۇننى قويۇۋېتىپ ، بىر خىل يامان غەرەزدە كۇرس بىناسى تەرەپكە قاراپ قويدى . شۇ كۈنى سانىيەنىڭ كاللىسىغا دەرس چۈشمىدى ، ئۇنىڭ خىيالىغا ھېلىقى خۇرۇم چاپاننىڭ ھىجىيىپ تۇرغان ھالىتى كىرىۋالغانىدى ، ئۇ يەنە ئۆزىدىن ئەنسىرەپ قالدى ھەمدە تېزراق ياتاققا قايتىشنى ئويلايتتى ...     قوڭغۇراقنىڭ چېلىنىش ئاۋازىدىن ئۇ چۆچۈپ ئەسلىگە كەلدى ، بۈگۈنلۈك دەرس ئاياغلاشقانىدى ، رەنا بىلەن ماھىرە نەرسە - كېرەكلىرىنى يىغىشتۇرۇپ سىرتقا قاراپ ماڭدى ، سانىيەمۇ تېزدىن كىتابلىرىنى يىغىشتۇرۇپ ئۇلارغا ئەگەشتى . ئىككى قىز بولسا ھېچنىمىدىن بىخەۋەر ئۆز پارىڭى بىلەن مېڭىۋاتاتتى ، سانىيە بولسا ئۇياق - بۇياققا تەشۋىش بىلەن قارايتتى ، ئۇ قەيەردىندۇر بىر يەردىن ھېلىقى خۇرۇم چاپاننىڭ چىقىپ قېلىشىدىن ئەنسىرەيتتى ، ھە نېمە بولسا قىزلار ئوڭۇشلۇق ئاپتوبۇسقا چىقىۋالدى ، ئاپتوبۇستا ئادەم كۆپ بولۇپ ، بۇ ئۈچ قىز ئاپتوبۇسنىڭ كەينىدىرەك تۇردى ، سانىيەنىڭ يۈرىكى ھازىرغىچە جىددىي سوقۇشتىن توختىمىغان بولۇپ ، كاللىسىغا ھەر خىل خىياللار كېلىۋېلىپ باراتتى .     تۇيۇقسىز سانىيەنىڭ قۇلىقىغا رەنا بىلەن ماھىرەنىڭ ئۆز ئارا پىچىرلاشقان ئاۋازى ئاڭلاندى :    - ئاداش ، ئەجەپ كېلىشكەن بالىكەن ، قارىغىنە ...    - ھەئە ، مۇھەببىتى بارمىدۇ ؟ ...     سانىيە ئۇلارنىڭ گېپىنى ئاڭلاپ ئىختىيارسىز ئوڭ يېنىغا قارىدى ، دەل شۇچاغدا ئۇنىڭ كۆزى ئۇنىڭ يېنىدا تۇرغان ھېلىقى خۇرۇم چاپان بىلەن ئۇچرىشىپ قالدى ، سانىيە دەرھال كۆزىنى ئىتتىك قاچۇردى ، يۈرىكى قارت قىلىپ تېخىمۇ ئەنسىز سېلىشقا باشلىدى . ئۇ ھەقىقەتەن بەك قورقۇپ كەتكەنىدى . ئاپتوبۇس تىببىي ئۇنۋېرسىتېتنىڭ ئالدىغا كېلىپ توختىدى ، ئۈچ قىز ئاپتوبۇستىن چۈشۈپ ، مەكتەپ ئىچىگە قاراپ ماڭدى ، سانىيە ئالدىرايتتى ، لېكىن مەكتەپ دەرۋازىسى بىلەن ياتاقنىڭ ئارىلىقى خېلى بولغاچقا ئۆزى يالغۇز مېڭىشتىن قورقتى ، كەينىگە قاراشتىن تېخىمۇ قورقاتتى . شۇ چاغدا رەنا بىلەن ماھىرە پاراڭلاشتى .     - ئاداش ، قارىغىنە ، ھېلىقى بالا كەينىمىزدىن كېلىۋاتىدۇ .     - ئۇ بالا مۇشۇ مەكتەپتە ئوقۇمدىغاندۇ ؟ مەن ھەجەپ كۆرمەپتىكەنمەن .     - شۇنى دېمەمسەن ، مۇشۇ مەكتەپتە ئوقۇيدىغان بولسا ماڭىلا قويۇپ بېرە بولدى .     ئىككى قىز شۇنداق دېيىشكىنىچە قاقاھلىشىپ كۈلۈشۈپ كەتتى ، سانىيە ئۇلارنىڭ گېپىنى ئاڭلاپ چىرايى تاتىرىپ كەتتى . مۇشۇ يەرگىچە ئەگىشىپ كەپتۇدە ،- دەپ ئويلىدى ئۇ .     غەيرەت جودا بىلەن ئۇنىڭ ئىككى ئاغىنىسى قىزلارنىڭ كەينىدىن ئەگەشكەنىدى . تۇيۇقسىز يان تەرەپتىن بىرىنىڭ ۋارقىرىغان ئاۋازى ئاڭلاندى :     - ھوي جودا ، بۇياققا ئۆتۈپ قاپسەنغۇ ؟ - غەيرەت بۇ ئاۋازنى ئاڭلىغاندىن كېيىن ئاۋاز كەلگەن تەرەپكە قارىدى .    - ۋاي ۋۇي ، كىمكىن دەپتىمەن تېخى ، ساقالكەنسەنغۇ ؟ قانداق ئەھۋالىڭ ئاداش ، يوقاپلا كەتتىڭ .    - ماۋۇ گەپنى ، ئۆزۈڭ يوقاپ كەتتىڭ ، بۇياقلارغا ئۆتۈپ قاپسەنغۇ ؟ - گەپ سورىدى ساقال .     - ۋاي ئاداش ، گېپىنى قىلما ، سەندىن يوشۇرمايمەن ، بىر قىزنى دەپ كەلدىم ، ئاۋۇ قىزلارنى كۆردۈڭمۇ ؟     - ھەئە ، كۆردۈم ، شىنجاڭ داشۆدە قىز بالا قالمىغاندەك بىزنىڭ مەكتەپتىكى قىزلارغا قانات سۆرەپ يۈرگىنىڭنى قارىمامدىغان ، ھا ھا ھا ...     - ھا ھا ھا ، دەپ قاپسەن ، توشقانمۇ ئۇۋىسى ئەتراپىدىكى ئوت - چۆپنى يېمەيدۇ ئەمەسمۇ ؟     ھەممەيلەن پاراققىدە كۈلۈشۈپ كەتتى ، ئارقىدىن ساقال سۆز باشلىدى :     - دېگىنە ئاداش ، مەن ياردەم قىلىدىغان يەرلەرمۇ بارمۇ يا ؟     - ئەلۋەتتىدە ، ئاۋۇ قىزلارنى تونۇيدىغاندەك قىلامسەن ؟     - كۆرگەن ، بىراق ئىسمىنى تازا ئۇقۇپ كەتمەيمەن ، مەن بىلەن پارالىل سىنىپتا ئوقۇيدۇ . قانداق ، تونۇشتۇرۇپ قويامدىم ؟     - بۇنىمۇ سوراش كېتەمدۇ ؟ ئەلۋەتتە شۇنداق قىلىسەندە .     - ھا ھا ھا ، مەن ئويلىشىپ باقاي ھە .     - قارا سېنى ، بولدى جۈرە ، مەن مېھمان قىلىمەن بۈگۈن سېنى ، ئارقىدىن ئىشىمنى توغرىلايسەن ،- دېدى غەيرەت .     - ھە ئەمسە بولىدۇ ، بۈگۈن راسا بىر ئىچىشەيلى !     جودا بىلەن ساقال قالغان ئىككەيلەننىڭ ھەمراھلىقىدا مەكتەپ سىرتىدىكى ئايرىمخانىغا قاراپ يۈرۈپ كەتتى ...    داۋامى بار ، داۋاملىق دىققەت قىلغايسىلەر .

moljar

	ئاخىرى قاچان  يېزىلىدۇ، ئاخىرىنى ساقلاۋېرىپ يىل ئالمىشىدىغان بولدىدە...

mehrim

	پۈتۈن خىياللىرىم ئاۋۇ بوۋاقتا قالغانتى  ،ئەمدى سانىيە خاندا قالدىغۇ . داۋامىنى  تىزراق .

تەڭرىتاغ

	داۋامى ...     جودا بىلەن ساقال قالغان ئىككەيلەننىڭ ھەمراھلىقىدا مەكتەپ سىرتىدىكى ئايرىمخانىغا قاراپ يۈرۈپ كەتتى ...     شۇ كۈندىن باشلاپ ساقال سانىيە بىلەن تونۇشۇپ ، ئاغىنىسى جوداغا بىر ياخشىلىق قىلىپ قويۇش مەقسىتىنى كۆڭلىگە پۈكتى . ئۇنىڭ ئىسمى ئەكرەم بولۇپ ، تولۇقسىز ئوتتۇرا ئوقۇۋاتقان چېغىدىلا يۈزىنى بۇرۇت - ساقال بېسىپ كىتىپ ، باشقىلار ئۇنىڭغا ساقال دەپ لەقەم قويۇۋالغانىدى . ساقالنىڭمۇ جوداغا ئوخشاشلا تىببىي ئۇنۋېرسىتېت ئەتراپىدا خېلى تەسىرى بار ئىدى . لېكىن ساقال پۇتبول ئويناشقا ئالامەت ھېرىسمەن ئىدى ، قىزلار بىلەن ئۇنچە بەك خۇشى يوق ئىدى . ئۇمۇ پۇتبولنى بەك ئوينىۋېتىپ ئالىي مەكتەپكە ئۆتەلمىدى ، بىراق ئۇنىڭ دادىسىمۇ باشلىق بولغاچقا تىببىي ئۇنۋېرسىتېتنىڭ چاقىرىق قەغىزىمۇ تېزلا ئۇنىڭ قولىغا تەگدى . ساقال ئالىي مەكتەپكە چىققاندىن كېيىن يەنىلا پۇتبول ئويناپ يۈردى ھەتتا نۇرغۇن ۋاقىتلاردا دەرسكە كىرمەي پۇتبول ئوينايتتى ، جودا بىلەن كۆرۈشكەندىن كېيىن ، ئۇ پۇتبول ئوينايدىغان ۋاقتىنى ئازايتىپ ، سانىيە بىلەن قانداق تونۇشۇش مەقسىتىدە باش قاتۇرۇشقا باشلىدى . گەرچە ساقال سانىيە بىلەن پاراللىل ئوقىسىمۇ بىراق سانىيە بىلەن تونۇشۇش قىيىنغا چۈشۈۋاتاتتى .       بىر نەچچە كۈندىن كېيىن ، ساقال ناھايىتى ئېرەنچەكلىك بىلەن سىنىپقا چىقتى ، بۇ دەرسنى بىر نەچچە سىنىپ ئوقۇغۇچىلىرى بىرلىكتە ئاڭلايدىغان بولغاچقا ، سىنىپ ئىچى ئوقۇغۇچىلار بىلەن لىق توشقانىدى . ساقال ئەڭ كەينىدىكى بوش ئورۇندىن بىرنى تېپىپ ئولتۇردىدە بېشىنى قويۇپلا ئۇخلاشقا باشلىدى . ئالاھەزەل يېرىم سائەتلەردىن كېيىن ساقالنىڭ قۇلىقىغا ناھايىتى يېقىملىق بىر ئاۋاز ئاڭلاندى ، ساقال ھەجەپ يېقىملىق ئاۋازكىنە دېگەن مەقسەتتە بېشىنى كۆتۈردى ، ئەسلىدە سىنىپنىڭ بىرىنچى پارتىسىدا ئولتۇرغان بىر قىز ئوقۇتقۇچىنىڭ سوئالىغا جاۋاب بېرىۋاتقان بولۇپ ، ئاۋازىنىڭ يېقىملىقلىقى ، جاۋابىنىڭ قايىل قىلارلىقلىقى ساقالنىڭ دىققىتىنى قوزغىغان ئىدى ، ساقال ئۇ قىزنى كۆرۈپ بىرىگە ئوخشاتتى لېكىن كەينىدىن دەماللىققا كىم ئىكەنلىكىنى بىلەلمىدى ، چۈنكى ئۇ بۇنداق دەرسلەرگە بەك ئاز قاتنىشاتتى ، سىنىپىدا نەچچە ئوقۇغۇچى بار ، نېمە دەرسلەر ئۆتۈلىدۇ ، ھېچنىمىنى بىلمەيتتى . دەرس توشقاندىن كېيىن ئوقۇغۇچىلار سىرتقا قاراپ ماڭدى ، ساقالنىڭ كۆزى بولسا ھېلىقى قىز بالىدا ئىدى ، ھېلىقى قىز ئارقىسىغا ئۆرۈلۈپ سىرتقا قاراپ مېڭىشىغا ساقال بۇ قىزنىڭ سانىيە ئىكەنلىكىنى بىلدى ، ئۇ ئىلگىرى سانىيەنى بىر نەچچە قېتىم كۆرگەن بولسىمۇ بىراق سانىيەگە ئۇنچە بەك دىققەت قىلىپ كەتمىگەنىدى ، بىراق بۈگۈن سانىيەنى كۆرۈپ ھەيرانلا قالدى ، سانىيە شۇ كۈنى تېخىمۇ ئوماق ۋە چىرايلىق بولۇپ كەتكەنىدى ، ئۇنىڭ ئەپچىلگىنە قىلىپ ئۆرۈپ ئالدىغا چۈشۈرۈۋالغان ئۆرۈم چاچلىرى ، كىشىنى مەھلىيا قىلىدىغان بىر جۈپ قاپقارا كۆزلىرى ، جىنەستىدەك لەۋلىرى ئۇنى تېخىمۇ گۈزەل كۆرسىتەتتى ، گەرچە ئۇنىڭ بېشىغا چىگىۋالغان ياغلىقى ساقالنىڭ كۆزىگە ئۇنچە بەك سىغمىغان بولسىمۇ بىراق يەنىلا ئۇنى جەلىپ قىلغانىدى .     ماۋۇ جودا ھۆل خىشقا دەسسىمەيتتى ، نېماندا بىزنىڭ مەكتەپكە كېلىپ قىزبالا ئىزدەپ يۈرىيدىكىن دېسەم ئەسلىدە مۇنداقكەندە ، - ساقال شۇلارنى خىيال قىلغىنىچە سىنىپتىن ئايرىلدى .     ئىككىنچى كۈنى ساقال ناھايىتى ئەتىگەن تۇرۇپ كەتتى ، ئۇ چاچلىرىنى پاكىز يۇيۇپ ، ئۆسۈپ كەتكەن ساقال - بۇرۇتلىرىنى پاكپاكىزە ئېلىپ ، ئۆزىنى بىر قۇر تۈزەشتۈردى دە دەرس باشلىنىشتىن يېرىم سائەت بۇرۇن سىنىپقا چىقىپ كەتتى ، ياتاقداشلىرى ئۇنىڭغا ھەيرانلا قالغانىدى .     ساقال سىنىپقا كىرىپلا بىرىنچى پارتىغا نەزەر تاشلىدى ، بىرىنچى پارتىدا سانىيە ۋە ئۇنىڭ ياتاقدىشى ئولتۇرغانىدى ، ساقالنىڭ كۆزلىرى چاقناپ ، يۈرەكلىرى ئويناپ كەتتى ۋە بىرىنچى پارتىغا بېرىپ سانىيەدىن سورىدى :    - بۇ يەردە ئولتۇرسام بولامدۇ ؟    سانىيە بولىدىغانلىقىنى ئېيتىپ بېشىنى لىڭشىتتى .     ساقال دەرھال سانىيەنىڭ يېنىدا ئولتۇردى ۋە كۆزىنىڭ قۇيرۇقىدا قارىدى ، سانىيە ساقالغا دىققەتمۇ قىلماستىن باش كۆتۈرمەستىن ئۆگىنىش قىلىۋاتاتتى ، ساقال قانداق سۆز ئېچىشنى ئۇقماي قالدى ، ئۇيان ئويلاپ ، بۇيان ئويلاپ ئاخىرى كىتابتىن بىر يەرنى ئېچىپلا سانىيەدىن سورىدى :    - خاپا بولماي بۇ يەرنى چۈشەندۈرۈپ بەرسىڭىز .    - سانىيە ساقال ئاچقان يەرنى كۆرۈپ ھەيرانلىق نەزىرى بىلەن ساقالغا قارىدى :    - بۇ يەرگە تېخى كەلمىدۇق ، سىز ئالدىن ئۆگۈنۈۋاتقانمۇ ؟    ساقال ھودۇقۇپ كەتتى ۋە ھەئە دەپلا بېشىنى لىڭشىتىپ گەپ قىلالمىدى . ئۇ ئۆزىنىڭ بىرىنچى قەدەمدىلا مەغلۇپ بولغانلىقىنى ئويلاپ پاتىڭىغىچە قىزىرىپ كەتتى ، ئادەتتە ئۇ ئۆزى تونۇيدىغان قىزلار بىلەن پاراڭلاشسا ئۇنچە بەك تارتىنىپ كەتمەيتتى ، لېكىن بۈگۈن نېمىشقىدۇر سانىيەگە گەپ ئېچىش تەس كېلىۋاتاتتى .     مۇشۇنداق ئىككىلىنىشلەردىن كېيىن ساقال يۈرەكلىك بىلەن سۆز باشلىدى :     - ئىسمىڭىز نېمە راست ؟     - سانىيە .     - سىز كۈندە سىنىپقا بالدۇر كىرەمسىز ؟     - ھەئە ، - سانىيە ساقالنىڭ گېپىگە قىسقىلا جاۋاب بېرىۋاتاتتى .     - مېنىڭ ئىسمىم ئەكرەم .     سانىيە گەپ قىلماي كىتابقا قاراپ ئولتۇرۇۋالدى .     ئەكرەم يەنە گەپ ئاچتى :     - تېلېفۇن نومۇرىڭىز بارمۇ ؟     - كەچۈرۈڭ ، مېنىڭ تېلېفونۇم يوق .    - ئەمسە ياتاقنىڭ باردۇ ؟     - دەپ بېرەلمەيمەن .     - نېمىشقا ؟     - مەن سىز بىلەن تونۇشمىسام .     بۇ چاغدا ساقال تېخىمۇ ھاياجانلىنىپ ، سوئالىنى داۋاملاشتۇردى .     - مانا بۈگۈن تونۇشتۇققۇ ؟    ئەكرەمنىڭ بۇ گېپى جاۋابسىز قالدى ، سانىيە بۇنداق ئوغۇللارنى ياقتۇرمايتتى ئۇنىڭ ئۈستىگە تۇنجى قېتىم كۆرۈشۈپلا تېلېفۇن نومۇرىنى دەپ بېرىشنىڭ ئۆزىمۇ ياخشى ئىش ئەمەس ئىدى ...     داۋامىنى داۋاملىق يوللايمەن ...

oglan

	ئەسسالام ئەلەيكۇم،تەڭرىتاغ ئەپەندى مەن سىزنىڭ بۇ ئەسىرىڭىزنى،باشتىن باشلاپ تۇلۇپ ئۇقۇپ كىلۋاتمەن. بۇ ئەسەرنىڭ ناھايتى ياخشى يىزىلىپتۇ...لىكىن ماۋۇ قىسمىدا ساقالنىڭ ئىسمى، ئاخىرقى تەرەپتە ئەسقەرگە ئۆزگۇرۇپ كەتتىمۇ ؟  مېنىڭ ئىسمىم ئەكرەم .     سانىيە گەپ قىلماي كىتابقا قاراپ ئولتۇرۇۋالدى .     ئەسقەر يەنە گەپ ئاچتى ..... مۇشۇ يەرنى دىمەكچى تەھىرللەپ قويسىڭىز .پىرسۇناژلار ئالمىشىپ كەتسە چۇشەنگىلى بۇلمايدىكەن. رەخمەت !!!!!

تەڭرىتاغ

	oglan يوللىغان ۋاقتى  2011-11-29 20:07 ئەسسالام ئەلەيكۇم،تەڭرىتاغ ئەپەندى مەن سىزنىڭ بۇ ئەسى ... ئەسكەرتكىنىڭىزگە رەھمەت ، بىخەستەنلىك قىلىپ ئىسىمنى ئالماشتۇرۇپ قويۇپتىمەن ، داۋاملىق يازىمەن ، ۋەقەلىك تېخى ئارقىدا ...

mehrim

	- خاپا بولماي بۇ يەرنى چۈشەندۈرۈپ بەرسىڭىز .    - سانىيە ساقال ئاچقان يەرنى كۆرۈپ ھەيرانلىق نەزىرى بىلەن ساقالغا قارىدى :    - بۇ يەرگە تېخى كەلمىدۇق ، سىز ئالدىن ئۆگۈنۈۋاتقانمۇ ؟ بۇ قۇرلارنى ئوقۇپ  بەكمۇ كۈلگۈم كىلىپ كەتتى  بەكمۇ ئوسال ئەھۋالغا چۈشۈپمۇ يەنە بىزەڭلىك قىلىپ يۈرگىنىنى توۋا .

تەڭرىتاغ

	داۋامى ...    ئەكرەمنىڭ بۇ گېپى جاۋابسىز قالدى ، سانىيە بۇنداق ئوغۇللارنى ياقتۇرمايتتى ئۇنىڭ ئۈستىگە تۇنجى قېتىم كۆرۈشۈپلا تېلېفۇن نومۇرىنى دەپ بېرىشنىڭ ئۆزىمۇ ياخشى ئىش ئەمەس ئىدى .     شۇ كۈندىن باشلاپ ساقالنىڭ تۇرمۇشىدا كۆپ ئۆزگىرىش بولدى ، دەرسكە قىززىقمايدىغان ساقال بىر نەچچە سىنىپ ئوقۇغۇچىلىرى بىرلىكتە ئاڭلايدىغان دەرسلەرنىڭ بىرىنىمۇ قالدۇرماي ، سىنىپنىڭ بىرىنچى پارتىسىدا يەنى سانىيەنىڭ يېنىدا ئولتۇرۇپ ئاڭلايدىغان بولغانىدى ، ئۇ يەنە تەنتەربىيەدە تاللىغان پۇتبول دەرسىنى ئوقۇتقۇچىلارغا يالۋۇرۇپ يۈرۈپ سانىيە تاللىغان پەي توپ دەرسىگە ئالماشتۇردى ، پەي توپ دەرسىدە قىزلار ناھايىتى كۆپ بولۇپ ، ساقال دەسلەپ ئوڭايسىزلىنىپ قالدى ، ئۇنىڭ كۆڭلىدە پەي توپ دەرسىگە قاتناشقان ئوغۇللار يارىماس ، ئاجىز ئوغۇللار ھېسابلىناتتى ، لېكىن سانىيە بىلەن ئازراق بولسىمۇ بىللە بولۇش ، سانىيەنى كۆپرەك كۆرۈۋېلىش ئىستىكى ئۇنىڭ بۇ خىيالىدىن غالىپ كەلدى . مۇشۇ ئىشلار بىلەن بىر ھەپتە ئۆتۈپ كەتتى ، تۇيۇقسىز بىر كۈنى جودادىن تېلېفۇن كەلدى :    - ئاداش ، ئىشلارنى توغرىلاۋاتقانسەن ؟ قانداق بولدى تونۇشالىدىڭمۇ ؟    - ۋاي ئاداش ، گېپىنى قىلما ، يېقىندىن بۇيان بەك ئالدىراش بولۇپ كېتىپ ۋاقىت چىقىرالمىدىم دېگىنە ، ئەمما خاتىرجەم بول ، چوقۇم ساڭا ياخشى جاۋاب بېرىمەن ، - ساقال يالغان ئېيتىۋاتاتتى ، ئۇ ئۆزىنىڭ قاچانلاردىن يالغانچى بولۇپ قالغىنىنى بىلمەيتتى ، گەرچە ئۆزى شوخ ، ئۇششۇق ، ئۆكتەم بولسىمۇ ، بىراق يالغان گەپ قىلمايتتى ، قانداقلا ئىش بولسۇن راست گەپ قىلاتتى ، بۈگۈن ساقال يالغان ئېيتىپ ، ئاغىنىسى جودانى ئالدىغانىدى .     - ئەمىسە ساڭا تاپشۇردۇم ئاداش ، تېلېفونۇڭنى كۈتىمەن .     - چاتاق يوق ، ئىشنى پۈتتۈرۈپلا ساڭا تېلېفۇن قىلىمەن ، - ساقال تېلېفۇننى قويۇۋېتىپ ، بېشىنى قاتتىق بىر سىلكىدى ، - توۋا ، مەن نېمە بولدۇم ؟ ھەجەپ بىر جوداغا يالغان ئېيتىۋاتىمىنا ؟ مەن سانىيەنى ياخشى كۆرۈپ قالمىغاندىمەن ؟     ئۇ ئۆز - ئۆزىگە سوئال قوياتتى ، لېكىن قانائەتلەنگۈدەك جاۋاب تاپالمايتتى ، سانىيەنى كۆرمىسە چىدىمايدىغانلىقى راست ، بىراق بۇ ھەقىقىي ياخشى كۆرۈش ھېسابلىنامدۇ ؟ ئىلگىرىكى شوخ ، سىنىپقا كىرمەيدىغان ، ئەتىگەندىن - كەچكىچە پۇتبول ئويناپ ، كەچتە ئۇخلىغاندىمۇ پۇتبول چۈشەيدىغان ساقالنىڭ پۇتبول چۈشىنىڭ ئورنىغا سانىيە ئالماشقانىدى ، ئۇ كەچلىرى ئۇخلىسا سانىيەنى چۈشەيتتى ، بارغانسېرى خىيالچان ، ئويچان بولۇپ كېتىۋاتاتتى . گەرچە ئۇ بىر نەچچە سائەتلىك دەرسنى سىنىپنىڭ ئالدىدا ئولتۇرۇپ ئاڭلاۋاتقان بولسىمۇ بىراق كاللىسىغا ھېچنىمە چۈشمىگەنىدى ، كاللىسىدا پەقەت سانىيەلا بار ئىدى .     ساقال بىر كۈنى سانىيەنىڭ ھەر كۈنى سەھەر تۇرۇپ ، مەكتەپ مەيدانىغا چىقىپ ئىنگىلىزچە تېكىست يادلايدىغانلىقىدەك مۇھىم ئۇچۇردىن خەۋەردار بولدىدە ، ئۆيىدىن قاتناپ ئوقۇشنى توختىتىپ ، دەرسلەر بەك ئېغىركەن ، مەكتەپ ياتىقىدا يېتىپ ئۆگىنىش قىلىمەن دېگەننى باھانە قىلىپ ياتاققا بىراقلا كۆچۈپ بېرىۋالدى . ئۇ يەنە ياتىقىدىكى سەھەر تۇرىدىغان ئوقۇغۇچىلارغا ئۆزىنى سائەت 5 بىلەن ئويغىتىۋېتىشنى قاتتىق جېكىلەپ ، ئويغىتىپ قويمىسا كۆرگۈلۈكىنى كۆرسىتىدىغانلىقىنىمۇ ئەسكەرتىپ قويدى .     ئەتىسى ساقال ياتاقداشلىرىنىڭ مەجبۇرىي ئويغىتىشى بىلەن ئورنىدىن ئېرەنچەكلىك بىلەن تۇردى ، ئۇ ئۆزىنى بىلگەندىن باشلاپ ئۆزىنىڭ بۇنداق سەھەر تۇرۇپ باققانلىقىنىمۇ ئەسلىيەلمەيتتى . ساقال تەنھەرىكەت كىيىملىرىنى كىيىپ ، مەكتەپ مەيدانىغا چىقتى . كەچكۈزنىڭ شامىلى سارغايغان يوپۇرماقلارنى يەرگە خازان قىلىپ تۆكمەكتە ئىدى ، ئاخشام ياغقان يامغۇردا مەيدان ئىچىدىكى بەزى جايلاردا يامغۇر سۈيى توپلاشقان بولۇپ ، ھاۋامۇ سوۋۇپ قالغانىدى . مەيدان ئىچىدە ئۆگىنىش قىلىۋاتقانلار ، چېنىقىۋاتقانلار ، پۇتبول ، ۋاسكىتبول ئويناۋاتقانلار بولۇپ ، گەرچە شۇنچە سەھەر بولسىمۇ مەكتەپ مەيدانى قاينام تاشقىنلىققا چۆمگەنىدى . ئەتىگەنلىك ساپ ھاۋا ، بۇ قىزغىن مەنزىرە ساقالنىڭ كەيپىياتىنى تېخىمۇ يۇقىرى كۆتۈرگەنىدى . ئۇ دەرھال مەيدان ئىچىدىن سانىيەنى ئىزدەشكە باشلىدى ، تۇيۇقسىز پۇتبول مەيدانىنىڭ بىر تەرىپىدە ئۇياقتىن - بۇياققا مېڭىپ تېكىست يادلاۋاتقان سانىيە ساقالنىڭ دىققىتىنى تارتتى ، ساقال چاندۇرماستىن قوللىرىنى ھەرىكەتلەندۈرگەچ سانىيەنىڭ يېنىغا قاراپ ماڭدى . ئۇ بۈگۈن ناھايىتى خۇشال ئىدى ، سانىيە بىلەن تېخىمۇ ياخشى تونۇشۇش پۇرسىتىگە ئىگە بولغانلىقىدىن قەلبى چەكسىز شادلانغانىدى . ئۇ سانىيەگە قاراپ كېتىۋېتىپ تۇيۇقسىز قارشى تەرەپتىن سانىيە تەرەپكە ئۇچۇپ كېلىۋاتقان توپنى كۆردى ، - ئاپلا چاتاق ، لېكىن ساقال قانچە قىلسىمۇ ئۈلگۈرەلمەيتتى . توپ ئۇچۇپ بېرىپ سانىيەنىڭ دۈمبە تەرىپىگە تەگدى ، يامغۇر سۈيىدە توپ ھۆل بولۇپ كەتكەن بولۇپ ، سانىيەنىڭ ئاق مايكىسى مەينەت بولۇپ كەتكەنىدى ، توپمۇ خېلى زەپ بىلەن ئۇرۇلغاچقىمىكىن سانىيە بېلىنى تۇتۇپ ئولتۇرۇپلا قالدى ، مەيداننىڭ ئۇ تەرىپىدە توپ ئويناۋاتقانلار ئاغزىنى تۇتۇپ كۈلۈشكىلى تۇرغانىدى ، ساقال بۇنى كۆرۈپ قاتتىق غەزەبلەندى :     - ھېي ، قايسىڭ تىپىشتىڭ ماۋۇ توپنى ؟ - ساقال يىراقتىن يۈگۈرۈپ كەلگەچ مەيداندىكىلەرگە قاتتىق ۋارقىرىدى .     - مەن تەپكەن ، ئەكرەم ئاكا ،- ئارىسىدىن سېرىق چاچ ، ئىگىز بويلۇق بىرەيلەن ئالدىغا چىقتى .     - ھۇ ئاناڭنى ، پۇتبول تېپىمەن دېگۈچە سىيىپ كىرىپ ئۇخلىساڭچۇ ؟ توپنى قالايمىقان تېپىۋېتىپ ، يەنە كەچۈرۈم سورىماي تۇرسىنا ...     - شۇ مەن بارغۇچە سىز كېلىپ قالدىڭىز .     - ھېي ، مەن بىلەن گەپ تالىشۋاتامسەن ؟ - ساقال يۈگۈرۈپ بارغىنىچە ھېلىقى ئىگىز بوينىڭ كاچىتىغا بىرنى سالدى .    - مانا بارىمەن ، ھېلىقى ئىگىز بويلۇق دەرھال يۈگۈرۈپ بېرىپ سانىيەدىن كەچۈرۈم سورىدى .     - مېنى كەچۈرۈڭ ، خاتا تېپىپ سالدىم ، سىزنىڭ ئەكرەم ئاكامنىڭ مۇھەببىتى ئىكەنلىكىڭىزنى بىلمەيدىكەنمەن .    - مەن ئۇنىڭ مۇھەببىتى ئەمەس ،- سانىيە بۇ گەپنى ئاڭلاپ چۆچۈپ كەتكەنىدى .     - ھېي ئاناڭنى ، مەن نەدە ئۇنى مېنىڭ مۇھەببىتىم دېدىم ، - ساقال يەنە ئۇرۇش ئۈچۈن قولىنى ئىگىز كۆتۈردى . ھېلىقى ئىگىز بويلۇق دەرھال ئۆزىنى چەتكە ئالدى ، دەل شۇ چاغدا سانىيە بېرىپ ساقالنىڭ قولىنى تۇتۇۋالدى :     - بولدى ئۇرماڭ ، ناماقۇل بولغانكىن بولدى .     - يوقال ، - دېدى ساقال ھېلىقى ئىگىز بويلۇققا قاراپ ، - بۇنىڭدىن كېيىن كۆرۈپ قالماي سېنى ...     ئۇ شۇنداق دېگىنىچە سانىيەگە قاراپ :     - سىزگە بىرەر  ئىش بولمىغاندۇ ؟ - دېدى .     - ھېچ ئىش يوق ، كىيىمىم مەينەت بولۇپ كېتىپتۇ ، مەن ياتاققا كىرىپ كىيىم ئالماشتۇرۇپ چىقاي ، رەھمەت سىزگە ، - سانىيە شۇنداق دېگىنىچە ياتاق تەرەپكە قاراپ ماڭدى . ساقال گەرچە سانىيە بىلەن ئۇزاقراق پاراڭلىشالمىغانلىقى توغرۇلۇق ئەپسۇسلانسىمۇ لېكىن ھېلىقى ئىگىز بويلۇقنىڭ مۇھەببىتى ئىكەنلىكىنى ئۇقماپتىمەن دېگەن گېپىنى ئاڭلاپ ئىچ - ئىچىدىن خۇشال بولغانىدى . سانىيەنىڭ كىرىپ كەتكەنلىكىنى كۆرگەن ساقالنىڭ توپ تەپكۈسى كەلگەن بولسىمۇ ، بىراق ئەتىگەنلىك دەرستە سانىيە بىلەن بىرلىكتە دەرس ئاڭلايدىغانلىقىنى ئويلاپ ، ياتاققا كىرىپ تەييارلىق قىلىش ئۈچۈن ياتاق تەرەپكە قاراپ يۈرۈپ كەتتى .     ساقال ياتاققا كىرىپ چېچىنى قايتىدىن يۇيدى ، ساقال - بۇرۇتلىرىنى پاكپاكىز ئالدى ، ئالدىنقى ھەپتە تۇغۇلغان كۈنىدە ئۆيىدىكىلىرى ئېلىپ بەرگەن كاستيۇم - بۇرۇلكىنى كەيدى ۋە چاچلىرىنى رەتلىك تارىغاندىن كېيىن ، سىنىپقا قاراپ يول ئالدى . ساقالنىڭ بۈگۈن تۇنجى قېتىم كاستيۇم - بۇرۇلكا كېيىشى بولۇپ ، ئىلگىرى ئاتا - ئانىسى كەي دەپمۇ كەيگۈزەلمىگەن ساقال مانا بۈگۈن باشقىچە روھلىنىپ ، ئۆز ئىختىيارى بىلەن كەيگەنىدى ، يۈرۈش - تۇرۇشقا ئەھمىيەت بەرمەيدىغان ، كەچكىچە توپ ئويناپ ، بەدىنىدىن تەر پۇراپ تۇرىدىغان ساقالدىن ھازىر ئەتىر پۇرايتتى ، كاستيۇم - بۇرۇلكىسىغا ماسلاشتۇرۇپ كەيگەن قارا رەڭلىك خۇرۇم ئايىقىنى سىنىپقا كىرگۈچە بولغان يولدا نەچچە قېتىم سۈرتۈپ چىقتى ، ئۇ بۈگۈن ناھايىتى خۇشال بولۇپ ، قويۇق قاشلىرى ئاستىدىكى قاپقارا كۆزلىرى چاقناپ تۇراتتى .     ئۇ سىنىپقا كىرگىنىدە سانىيە ئاللىبۇرۇن ئەسلىدىكى ئورنىغا بېرىپ ئولتۇرۇپ بولغان بولۇپ ، ساقال ئۇنىڭ يېنىغا بېرىپ ئولتۇردى ، ساقالنىڭ بۈگۈن ئۆزگىچە كىيىۋالغانلىقىنى كۆرگەن سىنىپتىكىلەر ئۇ توغرۇلۇق خىلمۇ - خىل پاراڭلارنى قىلىشقا باشلىغانىدى :    - قاراڭلار ، ئاۋۇ ساقالنى ، بۈگۈن تويغا بارىدىغاندەك قېتىۋاپتۇ ...    - ھەئە ، شۇنى دېمەمسەن ، ئۇنىڭ بۇنداق كەيگىنىنى تۇنجى قېتىم كۆرۈشۈم ...     - سانىيەنى كەلتۈرۋاتقان گەپ ، شۇنىمۇ ئۇقمىدىڭلارمۇ ؟     بۈگۈنكى سىنىپ ئىچىدىكى قىززىق تېما ساقال ئۈستىدە بولغانىدى ، ئالىي مەكتەپ ھاياتى شۇنداق ، ئەتىگەنلىك ئۆگۈنۈش ۋاقتىدا بەزىلەر ئۆگىنىش قىلسا بەزىلەر ئاخشام نەگە بېرىپ ئوينىغانلىقى ، توردىن ئالامەت بىر كىنو كۆرگەنلىكى ، خەلقئارادا قانداق ئىشلار بولۇۋاتقانلىقى ... ئىشقىلىپ جاھاندىكى ھەممە ئىشلاردىن ئېغىز ئېچىشىپ باقاتتى .     ساقال ئورنىدا ئولتۇرغاندىن كېيىن سانىيە بىلەن ئاددىيلا باش لىڭشىتىپ سالاملاشتى . دەرس باشلاندى ، سانىيە پۈتۈن زېھنى بىلەن دەرس ئاڭلاۋاتاتتى ، ساقالنىڭ دەرس بىلەن خۇشى بولمىغاچقا بېشىنى سانىيە تەرەپكە قاراپ پارتىغا قويۇۋېلىپ ، يالغاندىن ئۇخلىۋالغان بولىۋالدى ۋە سانىيەگە كۆزىنى يېرىم ئېچىپ قاراشقا باشلىدى .     - ھە ، ئەكرەم ، ئاخشام نەدىكى ئولتۇرۇشتىن سەھەردىلا كېلىپ دەرسكە قاتناشقاندەك ئولتۇرۇپ ئۇخلاپ كېتىپسەنغۇ ؟     مۇئەللىمنىڭ بۇ گېپىدىن ئەكرەم چۆچۈپ ئېسىگە كەلدى ، بىراق سىنىپ ئىچىدە پاراققىدە كۈلكە ئاۋازى كۆتۈرۈلگەنىدى .     - ياق مۇئەللىم ، - دەپ قىسقىغىنە جاۋاب بەردى ساقال .     - ئەمسە دىققەت قىلىپ ئاڭلىغىن .     مۇئەللىم سۆزىنى تۈگىتىپ دەرسىنى داۋاملاشتۇرۇشقا باشلىدى ، ساقال نەچچە سىنىپ بالىنىڭ ئالدىدا ئوسال بولغانلىقىدىن مۇئەللىمگە قاراپ دومسايدى ، شۇ چاغدا سانىيە ئۇنىڭغا بىر كىچىك باغاقچە سۇندى ، باغاقچىدا مۇنداق يېزىلغانىدى :    - ئەكرەم ، ئەتىگەنكى ئىشقا سىزگە كۆپ رەھمەت ئېيتىمەن .     ساقال خۇشاللىقىدىن دەرھال جاۋاب خەت يازدى .     - ھېچقىسى يوق ، ئۇدۇل كەپ قالدى شۇ ...     ساقال بىلەن سانىيە مۇشۇنداق قىلىپ بىر نەچچە قېتىم باغاقچە ئەۋەتىشتى . سانىيە كۆڭلىدە پەقەت ساقالغا رەھمەت ئېيتىپ قويۇشنىلا كۆڭلىگە پۈككەنىدى ، بىراق ساقال بۇ پۇرسەتنى چىڭ تۇتۇپ سانىيە بىلەن تېخىمۇ ئوبدان تونۇشىۋېلىش مەقسىتىدە ئىدى ، ئارقىدىن ئۇ يەنە قايتا بىر قېتىم سانىيەنىڭ ياتىقىنىڭ تېلېفۇن نومۇرىنى سورىدى ، بىراق سانىيە ساقالغا قايتا جاۋاب خەت يازمىدى .     شۇ كۈندىن باشلاپ ساقالدا ئۈمىد پەيدا بولدى ، ئۇ ھەمىشە سانىيەنى پايلاپلا يۈرەتتى ، ئەزەلدىن مەكتەپ ئاشخانىسىدىن تاماق يېمەيدىغان ساقال مەكتەپ ئاشخانسىدىن تاماق يەيدىغان ، كۈتۈپخانىغا بېرىپ ئۆگىنىش قىلىدىغان ، كەچتىكى مۇزاكىرىگە تولۇق قاتنىشىدىغان بولغانىدى...     ئەمدى گەپنى جودادىن ئاڭلايلى ، جودا سانىيەنى ھەر شەنبە - يەكشەنبە كۈنى بېكەتتە ساقلايتتى ، گەرچە ئۇ ھازىرقى سالاھىيىتى بىلەن سانىيە بىلەن تونۇشالىسىمۇ بىراق قاتتىق قوللۇق قىلىپ ئۇنىڭ بىلەن تونۇشۇشنىڭ ئەسقاتمايدىغانلىقىنى ھېس قىلىپ ، سانىيە ۋە ئۇنىڭ ئىككى دوستىنى يىراقتىن پايلاپ يۈرەتتى . يېرىم ئايدىن كۆپرەك ساقلاپ تاقىتى تاق بولغان جودا ئاخىرى چىداپ بولالماي ساقالغا قايتا تېلېفۇن قىلدى ...     داۋامىنى داۋاملىق يازىمەن ...