◆◆بەشتاش بالىلار مائارىپ تورى◆◆Http://Www.BaxTax.Cn◆◆维文专门教育教学资料，全册教案下载，全册课件下载，全册教科书下载，试卷，论文，儿歌，动画片，图片，教育信息网！◆◆

قوشماق ئاداش ۋە توپۇق ئويۇنى

شېرىپ خۇشتار

    قوشماق ئاداش ئويۇنى بىلەن توپۇق ئويۇنى خەلقىمىزدە دوستلۇق، ۋاپادارلىق، ساداقەتمەنلىكنىڭ سىمۋولى سۈپىتىدە داۋاملىشىپ كېلىۋاتقان ئەنئەنىۋى ئويۇنلاردۇر.

    قوشماق ئاداش ئويۇنى خەلقىمىز ئارىسىدا كەڭ ئومۇملاشقان بولۇپ، ئىككى ياشنىڭ ساداقىتىنى ئىپادىلەشنىڭ سىمۋولى قىلىنغان. ئويۇن ئۈچۈن ئۆرۈك ئۈچكىسىدىن جۈپ (قوشماق)چىققان مېغىز تاللىنىپ قوشماق ئوينىغۇچى ئىككى تەرەپ بىردىن يەيدۇ. يېيىش ۋاقتىدا، ۋاقىت بەلگىلەپ، بەلگىلەنگەن ۋاقتىدا كىم بالدۇر «ئەسسالامۇ ئەلەيكۇم، قوشماق ئاداش»دەۋالسا شۇ ئۇتقان بولىدۇ. ئوتتۇرغۇچى ۋەدىلەشكەن نەرسىنى ئۇتقۇچىغا بېرىدۇ. بۇ ئويۇن كۆرۈنۈشتە ئاددىي بولغىنى بىلەن ئىككى دوستنىڭ بىر ئۈچكە ئىچىگە سىغقان قوشماق مېغىزدەك ھىم دوستلۇقىنى ئىپادىلەيدۇ.

    توپۇق ئويۇنى شەرتى ئېغىر، مەسئۇلىيەتچانلىقى كۈچلۈك، مۇددىتى ئۇزاق، ئەر – ئايال، قېرى – ياشلار ئارىسىدا تەڭ ئومۇملاشقان ئويۇن. بۇ ئويۇنمۇ دوستلۇقنىڭ مۇستەھكەملىكىنى، ئۇزاق سىناقلاردىن ئۆتەلەيدىغان دوستلۇق بولۇشنى سىناش ئويۇنى. بۇ ئويۇن ئۈچۈن قوي ياكى ئۆچكىنىڭ توپۇقى لازىم. ئۇنىڭ ئالاھىدىلىكى مۇستەھكەم ئۇيۇللۇققا ئىگە. گۆش بىلەن توپۇق سۆڭىكى ئارىسىدىكى ئۇيۇللۇقنى پىچاق بىلەن ئاجرىتىشمۇ خېلى قىيىن. خەلقىمىز ئۆزلىرىنىڭ دوستلۇق غايىسىنى ئەنە شۇ گۆش بىلەن توپۇق سۆڭىكى ئارىسىدىكى ئۇيۇللۇققا سىمۋول قىلغان.

    توپۇق ئويۇنىنىڭ ئوينىلىشى: توپۇق ئوينىغۇچى ئىككى كىشى بىر يەردە تۇرغان بولسۇن ياكى يىراق يەردە بولسۇن، ئۆزلىرىنىڭ دوستلۇق سەمىمىيىتىنى بىلدۈرۈش ئۈچۈن، بىرى يەنە بىرىگە پاكىزلانغان توپۇقنى تېشىپ يىپ ئۆتكۈزۈپ بېرىدۇ. توپۇقنى قوبۇل قىلغان دوستى ئۇنى ھەمىشە يېنىدا ساقلايدۇ. توپۇق بەرگۈچى خالىغان مەزگىلدە توپۇقنى ئالغۇچىدىن توپۇقنى سورايدۇ، توپۇق ئالغۇچى توپۇقنى دەرھال چىقىرىپ بېرەلىسە ئۇتقان بولىدۇ. بۇ چاغدا توپۇق بەرگۈچى مەشرەپ بېرىپ دوستىنىڭ ساداقىتىگە رەھمەت ئېيتىدۇ. مۇبادا توپۇق ئالغۇچى دېگەن ۋاقتىدا توپۇقنى چىقىرىپ بېرەلمىسە ئۇتتۇرغان بولىدۇ.

    توپۇق ئويۇنى ئۆز ئارا دوستلۇق ۋە ساداقەتمەنلىكنى سىنايدىغان، ھوشيارلىقنى ئاشۇرىدىغان ئەنئەنىۋى ئويۇن بولۇپ، ھازىرغىچە داۋاملىشىپ كەلمەكتە.