كۈزدە بوۋاقلارنىڭ ئىچ سۈرۈشىگە دىققەت قىلىڭ
 كۈزدە بوۋاقلاردا ئىچ سۈرۈش كۆپ كۆرۈلىدۇ . مۇخبىرنىڭ ئۈرۈمچى شەھەرلىك دوستلۇق دوختۇرخانىسى بالىلار كېسەللىكلىرى بۆلۈمىدىكى مەرپۇغە ھەسەندىن ئىگىلىشىچە ،يېقىندا دوختۇرخانىغا ئېلىپ كېلىنگەن بالىلارنىڭ % 60 تىن كۆپرەكى ئىچى سۈرەپ كەتكەنىكەن . كۈزدە ئالتە ئايلىقتىن ئىككى ياشقىچە بولغان بوۋاقلاردا ئىچ سۈرۈش كۆپ كۆرۈلىدىكەن . دەسلەپكى مەزگىلدە يېگەن نەرسىلەرنى قۇسۇۋېتىدىغان ئەھۋال كۆرۈلىدىكەن . ئۇنىڭدىن باشقا ، سۈيدۈكى ئازلاش ، تېرىسى قۇرغاقلىشىش ، چوڭ تەرەت قېتىم سانى كۆپيىپ ، مىقدارى ئېشىپ ، سۇيۇلۇپ كېتىدىكەن . بۇنداق ئەھۋالدا سۇ تولۇقلاش ، قىزىپ قالسا قىزىتمىنى ۋاقتىدا قايتۇرۇش كېرەك ئىكەن . بۇنىڭ ئالدىنى ئېلىش ئۈچۈن يېمەكلىك تازىلىقىغا قاتتىق دىققەت قىلىش ، بوۋاقنى ئادەم توپلاشقان يەرگە ئاز ئاپىرىش ، ئۆينىڭ ھاۋاسىنى ئالماشتۇرۇپ تۇرۇش ، بوۋاقنىڭ ئىممۇنىتېت كۈچىنىڭ تۆۋەنلەپ كېتىشىنىڭ ئالدىنى ئېلىش كېرەك ئىكەن . « شىنجاڭ قانۇنچىلىق گېزىتى » دىن ئېلىندى
|
