بالىڭىزغا ۋاقتىدا ۋاكسىنا ئەملىتىپ تۇرامسىز؟ گۈلمىرە مۇھەممەد ، رەھىمە ئادىل مۇتەخەسسىسلەرنىڭ كۆرسىتىشىچە، بالىلارغا ۋاقتىدا ۋاكسىنا ئەملىتىش يۇقۇملۇق كېسەللەرنىڭ ئالدىنى ئېلىشتىكى ئەڭ تېجەشلىك، ئەڭ ئۈنۈملۈك، ئەڭ قولايلىق ئۇسۇل ھېسابلىنىدىكەن. بالىلارغا نېمە ئۈچۈن ۋاكسىنا ئەملىنىدۇ؟ ۋاكسىنا ئەملىگەندىن كېيىن نېمىلەرگە دىققەت قىلىش كېرەك؟ بىز بۇ توغرىسىدا ئۈرۈمچى شەھەرلىك ئانا – بالىلارنىڭ ساقلىقىنى ساقلاش دوختۇرخانىسىنىڭ دوختۇرى ھۆرسىماننى زىيارەت قىلدۇق. ئۇ مۇنداق دېدى: بالىلارغا ۋاقتىدا ۋاكسىنا ئەملىتىش بالىلارنىڭ ئىممۇنىتېت ئىقتىدارىنى ئاشۇرىدىغان مۇھىم تەدبىر، ئۇ بالىلارنى ئۆسمۈرلۈك مەزگىلىدە ئاسان يۇقىدىغان يۇقۇملۇق كېسەلگە گىرىپتار بولۇشتىن ساقلايدۇ. نۇرغۇن ئاتا – ئانا بالىلىرىغا ‹‹بالىلارغا ۋاكسىنا ئەملەش كىنىشكىسى›› بويىچە ۋاكسىنا ئەملەشكە سەل قارايدۇ. ۋاكسىنىنى يۇقۇملۇق كېسەللەر تارقىلىشتىن ئىلگىرى ئەملەتكەندە ئاندىن رولى بولىدۇ. بولۇپمۇ بوۋاقلار تۇغۇلۇپ 24 سائەت ئىچىدە ئەملىتىدىغان كالمىت گۋېرنى ۋاكسىنىسى ۋە B تىپلىق جىگەر كېسىلى ۋاكسىنىسىنى ئەملىتىش ئىنتايىن مۇھىم. ۋاكسىنىلار ئىچىدىكى بىرىنچى تۈردىكى ۋاكسىنىلار، ئاساسلىقى، يەتتە ياشتىن تۆۋەن بالىلارغا ھەقسىز ئەملىتىدىغان ۋاكسىنىلارنى، ئىككىنچى تۈردىكى ۋاكسىنىلار پىلانلىق ئەملەنگەندىن سىرت، بالىنىڭ سالامەتلىك ئەھۋالىغا ئاساسەن ئۆز ئىختىيارلىقى بىلەن ھەقلىق ئەملىنىدىغان ۋاكسىنىلارنى كۆرسىتىدۇ. ئاتا – ئانىلار بالىلىرىغا ۋاكسىنا ئەملەتكەندىن كېيىن، شۇ جايدا يېرىم سائەت كۆزىتىپ ئەكس تەسىر كۆرۈلمىگەندە، ئاندىن بالىنى ئېلىپ كەتسە بولىدۇ. بىر قىسىم بالىلاردا كۆرۈلىدىغان ۋاكسىنا ئەملىگەن جاي ئىششىپ قېلىش ۋە ئاغرىش، 38.5 گىرادۇستىن تۆۋەن قىزىش قاتارلىق ئەھۋاللار نورمال بولۇپ، بۇنداق چاغدا بالىغا كۆپرەك قايناق سۇ بېرىپ ئارام ئالدۇرۇشقا دىققەت قىلىش كېرەك. ئەگەر ۋاكسىنا ئەملەنگەن جايدا يۇقۇملىنىش، يىرىڭلىق ئىششىش، سۇلۇق ئىششىش، شۈك بولۇپ قېلىش قاتارلىق ئەھۋاللار كۆرۈلسە دەرھال دوختۇرغا كۆرسىتىش كېرەك. شىنجاڭ گىزىتىدىن ئېلىندى. تەھىرلىگۇچى:admin
|
