سۆگەل ئادەتتە تېرە يۈزىدە كۆپرەك ئۇچىرايدىغان ئۆسمە كېسەللىكلىرىنىڭ بىر خىلى، ئۇ سۆگەل ۋىرۇسىدىن پەيدا بولىدۇ.سۆگەلنىڭ پەيدا بولۇشى بەدەندىكى ئىممۇنىتىتنىڭ رولى بىلەن مۇناسىۋەتلىك.ئىممۇنىتىتى بولۇپمۇ ھۈجەيرە تۆۋەن بولغان كىشىلەر سۆگەل بىلەن ئاسان يۇقۇملىنىدۇ.تېرە يۈزى زەخىملىنىشلەرمۇ سۆگەل ۋىرۇسى بىلەن يۇقۇملىنىشنى كەلتۈرۈپ چىقىرىدۇ.

سۆگەل چىققان ئورۇنغا قاراپ ئاددىي سۆگەل،ياپىلاق سۆگەل،ئۇچلۇق نەملەشكەن سۆگەل،تاپان سۆگىلى قاتارلىق بىر قانچە تۈرگە بۆلۈنىدۇ.يۇقۇمچان يۇمشاق سۆگەل ۋىرۇسى پەيدا قىلىدىغان يۇقۇمچان يۇمشاق سۆگەلمۇ بار.ئاددىي سۆگەل ۋە ياپىلاق سۆگەل كۆپىنچە يۈزدە ۋە قولدە پەيدا بولىدۇ.تاپان سۆگىلى تاپاندا بولىدۇ.ئۆتكۈر نەملەشكەن سۆگەل كۆپىنچە ئانۇس ئەتراپىدا،ئەۋرەت ئارىلىقىدا،قولتۇقتا، پۈت بارماقلىرىدا بولىدۇ.يۇقۇمچان يۇمشاق سۆگەل كۆكرەك قىسمىدا،پۇت-قولىدا،قاپاقلىرىدا بولىدۇ.سۆگەل پەيدا بولغاندا قول بىلەن تاتلىماسلىق ياكى ئۈستىنى كېسىپ بۇزماسلىق،ۋاقتىدا دوختۇرغا بېرىپ داۋالىتىش لازىم.ئاددىي سۆگەل ۋە تاپان سۆگىلىنى ئېرىتىلگەن ئازوت ئارقىلىق توڭلىتىش ئۇسۇلى بىلەن داۋالاشنىڭ ئۈنۈمى ئەڭ ياخشى.لازىر نۇرىدا كۆيدۈرۈپ داۋالاشقىمۇ بولىدۇ.ياپىلاق سۆگەلنى داۋالاشتا ۋىتامىن B12 ياكى ئوسما يىلتىزى ئوكۇلنى مۇسكۇلدىن ئوكۇل قىلىش،يەرلىك ئورۇنغا ئاۋرېئومىتسىن مېيىنى سۈرتۈش ياكى فلۇرىل(Fu-5) سۇيۇقلۇقىنى تەگكۈزۈش كېرەك.ئۆتكۈر نەملەشكەن سۆگەلنى داۋالاشتا سۆگەللىك ئورۇننى پاكىز تۇتۇش،سىرتىدىن فلۇرىل مېيىنى سۈرتۈش كېرەك ياكى ئېرىتىلگەن ئازوت بىلەن توڭلىتىپ داۋالاشقىمۇ بولىدۇ. يۇقۇمچان يۇمشاق سۆگەلنى ٪2.5لىك يود بىلەن دېزىنفېكسىيە قىلىپ،پاكىز يىڭنە بىلەن تېشىپ،ئىچىدىكى يۇمشاق سۆگەل تەنچىسىنى سىقىپ چىقىرىۋېتىپ،يود سۈرتۈش كېرەك.داۋالاش جەريانىدا ئىچ كىيىملەرنى قايناق سۇغا بېسىپ دېزىنفېكسىيە قىلىش ياكى دەزماللاپ كىيىش كېرەك.