قوغۇن تەركىبىدە قەنت ، ئاقسىل ، كالتسىي ، فوسفور ۋە ھەر خىل ۋىتامىنلار مول . قوغۇن ئېتى ، ئۇرۇقى ، شاپىقى قاتارلىقلار ئۇيغۇر تېبابىتىدە دورا ئورنىدا ئىشلىتىلىدۇ .
   قوغۇننىڭ ياخشى پىشقىنىنىڭ تەبئىيىتى مۆتىدىل ، ئىككىنچى دەرىجىدە ھۆل كېلىدۇ . ئادەمنىڭ ئىچىنى بوشىتىپ ، سۇسىزلىنىشنىڭ ئالدىنى ئېلىش ، بۆرەك ، دوۋسۇندىكى تاشنى چۈشۈرۈش ، توسالغۇلارنى ئېچىش ، ھەزىم قىلىشنى ياخشىلاش خۇسۇسىيەتلىرىگە ئىگە .
 
   قوغۇننىڭ ئېتىنى كۆزگە چاپسا ، ئىششىقنى ياندۇرۇپ ، كۆز ئاغرىقىغا شىپا قىلىدۇ . سودا بىلەن مەلھەم قىلىپ جايلىق ئورۇنغا چاپسا ، تېرىدىكى داغلارنى يوقىتىدۇ .
   قوغۇن ئۇرۇقىنىڭ تەبىئىتى بىرىنچى دەرىجىدە ئىسسىق  ، ئىككىنچى دەرىجىدە ھۆل بولۇپ ، جىگەردىكى توسالغۇلارنى ئېچىش ، سۈيدۈكنى راۋانلاشتۇرۇش ، بۆرەك ، دوۋسۇن ، ئۈچەيلەرنى تازىلاش ، مىجەزنى تەڭشەش ، باھنى قۇۋۋەتلەش رولىغا ئىگە .
   قوغۇن ئۇرۇقىنى ئىستېمال قىلىپ بەرسە ، ئىسسىقتىن بولغان يۆتەل ، كۆكرەك ئاغرىقى ، گال يىرىكلىشىش ، سۈيدۈك ئاغرىتىپ كېلىش قاتارلىقلارغا شىپا بولىدۇ . ئۈچەيدىكى جاراھەت ، ئېغىز پۇراش ، سوقۇر ئۈچەي ياللۇغىغا مەنپەئەت قىلىدۇ .
   جۇڭگو تېبابىتىدە قوغۇننىڭ ئېتىدە قەنت ، ئاقسىل بولۇپ ، ئۇسسۇزلۇقنى باسىدۇ ، ئىسسىقنىڭ ئالدىنى ئېلىپ ، سۈيدۈك راۋانلاشتۇرىدۇ ، ئېغىز، بۇرۇنلاردىكى جاراھەتلەرگە شىپا بولىدۇ ، داۋاملىق يەپ بەرسە ، ئىسسىق ئۆتۈپ قېلىشتىن كېلىپ چىققان ھۇشسىزلىنىشنىڭ ئالدىنى ئالىدۇ ، ئىسسىقتىن بولغان تولغاق ، يىرىڭلىق تولغاق قاتارلىقلارغا مەنپەئەت قىلىدۇ ، دەپ كۆرسىتىلگەن .