7 - نويابىر دېھقانلار كالېندارى بويىچە 24 مەۋسۇمنىڭ بىرى بولغان <<باش قىش>> بولۇپ، شۇنىڭدىن كېيىن ھاۋا تەدرىجىي سوۋۇيدۇ. مۇتەخەسسىسلەر: كۈز ۋە قىش زۇكام كۆپ كۆرۈلىدىغان مەزگىل، زۇكامنىڭ ئالدىنى ئېلىش ئۈچۈن، تۆۋەندىكىدەك ئالتە خىل ئۇسۇلنى قوللانسا بولىدۇ، دېيىشتى.
بىرىنچى، ئىممۇنىتېت كۈچىنى ئاشۇرۇش كېرەك. زۇكامنىڭ ئالدىنى ئېلىشتا ئەڭ مۇھىمى چېنىقىشنى، ئوزۇقلىنىشنى كۈچەيتىپ، مۇۋاپىق، تەرتىپلىك خىزمەت ۋە دەم ئېلىش ئادىتىنى يېتىلدۈرۈش كېرەك. بۇنىڭدىن باشقا، سوغۇق سۇدا يۈز يۇيۇش ۋە بۇرۇن چايقاشنى داۋاملاشتۇرۇپ، بۇرۇن يېپىشقاق پەردىسىنىڭ سوغۇق ھاۋاغا ماسلىشىش ئىقتىدارىنى كۈچەيتىش كېرەك.
ئىككىنچى، ھاۋانىڭ ساپلىقىنى ساقلاش كېرەك. ئۆي ئىچىدە پائالىيەت قىلىدىغانلار ئۆي ئىچىگە كۈن نۇرىنىڭ بىۋاسىتە چۈشۈشى ۋە ھاۋانىڭ ئالمىشىپ تۇرۇشىغا ئەھمىيەت بېرىشى، ئۆي ئىچىنىڭ تېمپېراتۇرىسىنى مۇۋاپىق ساقلىشى، ئۆي ئىچى بىلەن سىرتنىڭ تېمپېراتۇرا پەرقىنىڭ بەك چوڭ بولۇپ كەتمەسلىكىگە كاپالەتلىك قىلىشى كېرەك. دېرىزىلەرنى دائىم ئېچىپ ھاۋا ئالماشتۇرۇپ تۇرۇش، كارىۋات بېشىغا پۇرىقى چىقىپ تۇرىدىغان يالپۇز مېيى قويۇپ قويۇش كېرەك.
ئۈچىنچى، يۇقۇم مەنبەسىدىن ئۆزىنى چەتكە ئېلىش كېرەك. ئاممىۋى سورۇنلارغا ئاز بېرىپ، يۇقۇملىنىش پۇرسىتىنى ئازايتىش كېرەك. تارقىلىشچان زۇكام يامرىغان مەزگىلدە، كىنوخانا، سودا ساراي قاتارلىق ئادەم كۆپ ئاممىۋى سورۇنلارغا بېرىشتىن ئىمكانقەدەر ساقلىنىش كېرەك. قاچا - قۇچا، لۆڭگە قاتارلىق كۈندىلىك تۇرمۇش بۇيۇملىرىنى ئورتاق ئىشلەتمەسلىك كېرەك.
تۆتىنچى، تازىلىققا دىققەت قىلىش كېرەك. قول بىلەن قولنىڭ ئۇچرىشىشى زۇكامنىڭ تارقىلىشىنىڭ مۇھىم يولى. زۇكام ۋىرۇسى قولياغلىقتا بىر سائەت، قولدا ئىككى سائەتكىچە ئۆلمەيدۇ. زۇكام بولغانلار بۇرۇننى سۈرتكەندە ۋىرۇس قولغا يۆتكىلىدۇ، ئاندىن يەنە بىر قول ھەم قول بىلەن تۇتقان يەرلەردە ۋىرۇس پەيدا بولىدۇ. مەسىلەن، باشقىلار بىلەن قول ئېلىشىپ كۆرۈشكەن، ئىشىك تۇتقۇچى، تېلېفون تۇرۇپكىسى تۇتقاندا شۇ ئورۇنلاردا ۋىرۇس پەيدا بولىدۇ. شۇڭا، قولنى دائىم سوپۇن بىلەن يۇيۇپ تۇرۇش، قولنى يۇيۇشتىن ئاۋۋال بۇرۇن ياكى كۆزنى تۇتماسلىق كېرەك.
بەشىنچى، تارقىلىشچان زۇكام ۋاكسىنىسى ئەملىتىش كېرەك. تارقىلىشچان زۇكام ۋاكسىنىسى ئەملەتكەندە، ۋاكسىنا ئەملەنگەن كىشى بىر يىل ئىچىدە ئوخشاش تۈردىكى تارقىلىشچان زۇكام ۋىرۇسى بىلەن يۇقۇملانمايدۇ.
ئالتىنچى، جۇڭگو تېبابىتى ئۆسۈملۈك دورىلىرى، مەسىلەن، گۈل چېيى، قارا شېكەر، زەنجىۋىل، چىلان قايناتمىسى ۋە مۇچ قايناتمىسى ئىچىش، پۇتنىڭ ئاستىغا دورا چاپلاش، بۇرۇنغا ئىچىدىغان سودا تېمىتىش، بۇرۇننى ھوردىتىش قاتارلىقلار ئارقىلىق داۋالاش كېرەك. بۇ ئۇسۇللارنى دوختۇرنىڭ مەسلىھەتى ياكى كۆرسەتمىسى بويىچە قوللانسا بولىدۇ.