بۇندىن ئىلگىرى تارقالغان خەۋەرلەردە گۇگېل شىركىتىنىڭ بۇندىن كېيىن Nexus تۈرىدىكى مەھسۇلاتلارنى تەتقىق قىلىشنى توختىتىدىغانلىقى تىلغا ئېلىنغان بولسىمۇ، بىراق، ھازىرقى ئەھۋالدىن قارىغاندا، گۇگېل ھېچبولمىغاندا مۇشۇ بىر يىل ئىچىدە يەنە Nexus تۈردىكى يېڭى مەھسۇلاتىنى ئېلان قىلىدىغان ئوخشايدۇ. تۈنۈگۈن، ئاندىرويىد گۇرۇپپىسىنىڭ تىۋىتتېردىكى ئورگان بىلوگىدا شەكلىNexus 5 گە ئوخشاپ قالىدىغان «سىرلىق» بىر يانفوننىڭ رەسىمى ئاشكارىلانغان، كىشىلەر بۇ يانفوننى گۇگېلنىڭ كېيىنكى ئەۋلاد يانفونى Nexus6 بولۇشى مۇمكىن دەپ قىياس قىلىشقان.
رەسىمدىن قارىغاندا، Nexus6 نىڭ رەسىمى Nexus 5 بىلەن ئىنتايىن ئوخشىشىپ قالىدىغان بولۇپ، پەرقلىنىدىغان يېرى، ئۇنىڭ تۆت تەرىپى يۇمىلاق لايىھەلەنگەن، يان گىرۋىكى تېخىمۇ نېپىز چىقىرىلغان، بۇندىن ئىلگىرى خەۋەرلەردە، بۇ يانفونغا 5.2 دىيۇملۇق ئېكران ئىشلىتىلىدىغانلىقى تىلغا ئېلىنغان، بىراق، ئۇنىڭغا 2K لىق ئېكران ئىشلىتىلەمدۇ-يوق بۇنىسى نامەلۇم ئىكەن.
چەتئەلدىكى Android Geeks تور بېكىتى گۇگېل Nexus6 يانفونىغا Krait 450 قۇرۇلمىسىدىكى گاۋتوڭ 805 تىپلىق تۆت يادرولۇق بىر تەرەپ قىلغۇچ، Adreno 420 لىق رەسىم بىر تەرەپ قىلغۇچ، 3GB لىق ئىچكى ساقلىغۇچ، 16GB/32GB لىق ئاساس ساقلىغۇچ سەپلىنىدىغانلىقىنى پەرەز قىلغان. بىراق، بۇ يانفوننىڭ كامېرا ئېنىقلىقى ھەققىدە ھازىرچە ئېنىق ئۇچۇر يوق.
گۇگېل شىركىتى مۇشۇ ئاينىڭ 25-كۈنى ئاچىدىغان I/O چوڭ يىغىنىدا، Nexus6 يانفونىنىڭ ئوتتۇرىغا چىقىش ئېھتىماللىقى بەك كىچىك بولسىمۇ، بىراق، گۇگېل ھېچبولمىغاندا بۇ يانفونغا ئالاقىدار ئۇچۇرلارنى ئاشكارىلىشى مۇمكىن، ئۇندىن باشقا، گۇگېل Nexus يانفونلىرى ئەزەلدىن كۈز پەسلىدە ئېلان قىلىنىپ كەلگەن بولغاچقا، Nexus6 يانفونىمۇ بۇ يىل 4-پەسىلدە ئېلان قىلىنىشى مۇمكىن.
