ھەر زامان ۋە جەمئىيەتنىڭ سالاھىيىتى، روناقى ئۇنىڭ ئىلىمگە بولغان مۇناسىۋىتى بىلەن ئۆلچىنىدۇ. ئەجدادلىرىمىز ھەم ئىلگىرى ئۆزلىرى ئىتىقاد قىلغان دىنلارنىڭ كۆرسەتمىلىرىگە ئەمەل قىلىپ، ئىلمۇ ئىرفانغا ئىنتىلگەن، مەرىپەتكە تەلپۈنگەن دەۋرلەردە قوللىرى ئۇزۇن، تىللىرى ئۆتكۈر، مەرتىبە – ماقاملىرى بەلەن بولغان. ئەكسىچە، ئىلىم – پەندىن يۈز ئۆرۈپ، نادانلىق ۋە جاھالەت پاتقاقلىرىغا پېتىشقىنىدا بولسا قوللىرىدىن نۇسرەت، سەلتەنەت كەتكەن، تىللىرى تۇتۇلۇپ ، باشلىرى چۈشكەن، ئۆزلىرى خارلىق ۋە زارلىقتا قېلىشقان.
ئوتتۇرا ئەسىرلەردە، مەركىزىي ئاسىيا مۇسۇلمان خەلقلىرىدىن مەھمۇد كاشغەرى، يۈسۈپ خاس ھاجىب، ئىمام بۇخارىي، فارابىي، ئىبن سىنا، تېرمىزى، بىروني، ئىبنى رۇشىد كەبىي ئۇلۇغ ئالىم – ئۆلىمالار يېتىشىپ چىققان. كاشغەر، بۇخارا ، باغداد كەبىي شەھەرلەر جاھانغا مەشھۇر مەدەنىيەت مەركەزلىرىگە، ئىلىم – مەرىپەتنىڭ بۈيۈك ئوچاقلىرىغا ئايلانغان ئىدى. ئېنىقسىز مەلۇماتلاردا كۆرسىتىلىشىچە، ئوتتۇرا ئەسىردە مۇسۇلمان ئالىمىدە ئىلىم – پەننىڭ تۈرلۈك ساھەلىرى بويىچە 86 مىڭدىن ئارتۇق يىرىك ئالىم يېتىشىپ چىققان. مۇسۇلمانلار مەتبەچىلىكتە غەرىبلىكلەردىن يۈز يىللاپ ئارقىدا قېلىشقىنىغا قارىماي، كىتابقا بولغان مۇھەببەتتە ئۇلاردىن ئۈستۈن تۇرۇشقان. ياركەنت، كاشغەر، خىۋە، باغداد، قاھىرەدىكى كۇتۇبخانىلارنىڭ ھەر بىرىدە مىليۇنلاپ كىتابلار ساقلانغان. ھۆكۈمدارلار ، ئەمىرلەر، يۇرتنىڭ دۆلەتمەن كىشىلىرى ئىلىم – پەنگە ھامىيىلىق قىلىشتا، مەكتەپ – مەدرىس بىنا قىلىشتا، تالىب – ئوقۇغۇچىلارغا ياردەم بېرىشتە ئۆز – ئارا مۇسابىقىلەشكەن. غەرب ئىلىمدارلىرى ياۋرۇپا مەدەنىيىتىنىڭ ئەينى چاغدىكى ئىسلام مەدەنىيەت بۇلىقىدىن سۇ ئىچكەنلىكلىرىنى، ئەندۇلۇسىيە ( ئىسپانىيە ) ئارقىلىق تارقالغان ئىلمنىڭ ياۋرۇپانى يۈكسەك تەرەققىيات چوققىسىغا ئېلىپ چىققانلىقىنى ھازىرغىچە يېزىپ كېلىشمەكتە. دەرھەقىقەت، زامانىۋىي ئىلىملارنىڭ ئۇل تاشىنى قويۇشتەك شەرەپلىك ۋەزىپە مۇسۇلمانلارغا ئەڭ تېگىشلىك ئىدى.
كېيىنچە، ئىلىمسىزلىك، جاھالەتنىڭ بالا – كۈلپىتى ئۆزىنى ئۇزاق كۈتتۈرمىدى. يېقىنقى دەۋرىدىكى ئەجدادلار خوجا – ئىشانلارنىڭ ئەپسۇنلىرىغا مەستخۇش بولۇپ ، ئىلىم – مەرىپەتتىن يىراقلاشتى. قاچان ئىلىمدىن يۈز ئۆرۈشكەن بولسا، شۇندىن باشلاپ زالىملارنىڭ ئىستىبىداتىغا ئۇچراشتى، ئىتىقادلىرىغا زاۋال يەتتى. مەنىۋىيەتلىرى قۇرۇپ قاقشال بولدى، ئەخلاقلىرى بۇلغاندى.
ئەنە شۇ جاھىلىيەت زامانىدا، ئۆزلىرىنى ئەلنىڭ ھامىيلىرى دەپ ئاتىۋېلىشقان ھۆكۈمدارلار خەلقنى مەرىپەت نۇرىدىن مەھرۇم ، زامانىۋىي پەننىي ئىلىملەردىن پۈتۈنلەي يىراق تۇتتى. شۇنىڭ ئۈچۈن خەلقتە ئويغىنىش ، پىكرى ئېچىلىش بولمىدى. يېقىنقى ئەسىرلەردىكى مەرىپەتسىزلىك، جاھىللىق سەۋەبلىك ئىلىمسىز، مەرىفەتسىز خان – خوجىلار ئەلنىڭ چىراغى – يولباشچىسى بولغان ئۆلىمالارنى ئۆز بۇيۇنتۇرقىلىرى ئاستىغا ئېلىپ، سوفىلىق يولىنى ئۆز شەيتانات يوللىرىغا تەدبىق ئېتىشتى.
كۈنىمىزدىكى ئۇيغۇر جەمئىيىتىگە نەزەر سالغىنىمىزدا، ئۇنى بىر خىل << ئىلىمسىزلىك تورى >> قاپلاپ ئالغانلىقىنى ئىلغا قىلىمىز. ئادەملەرنىڭ جاھىللىقى شۇ دەرىجىگە بارغانكى، دۇنياۋىي ئىلىملار بىلەن ئاخىرەتلىك ئىلىملار ئوتتۇرىسىغا سېپىل سوقۇلۇپ، ئۇلار بىر – بىرىگە قارشى قويۇلدى. دىن ئالىمى زامان ئىلىمىنى ئۆگىنىشنى ئار بىلىپ، ئۇنىڭغا بىپەرۋا بولدى. ئەكسىنچە، دۇنيا ئالىمى ئىتىقادسىزلىقنى ‹‹ چىن ئىلىم ›› ھېسابلاپ قاتتىق ئاداشتى. زامانغا لايىق بولمىغان دىتسىزلىق كىشىلىرىمىزنى ھەر جايدا خار ، ماڭار يولىنى تار قىلىپ قويدى. ئىمان بىلەن كۇفرى، ھەق بىلەن باتىل، ياخشىلىق بىلەن يامانلىق ئوتتۇرىسىدا مۇرەسسەسىز كۈرەش بولغىنى كەبى، مەرىپەت ۋە جاھالەت ئوتتۇرىسىدىكى ئېلىشىش ھېلىھەم داۋام ئەتمەكتە.
ئايرىم پەن مۇتەخەسسىسلىرى، پەننىي زىيالىيلار ماددىغا زىيادە ئەقىدە باغلاپ، تۆرەلمەك ۋە قايتا تىرىلمەككە ناقايىل تۇرۇشماقتا. ئۇلارنىڭ ئارىسىدىن دىن ئىلمىنى ئۆگىنىشنى << قالاقلىق >> سانايدىغان، ئەقىدە – ئىتىقادلىق كىشىلەرنى << خوراپىي >> ، << مەدەنىيەتسىز >> چاغلايدىغانلار ھەم يەتكۈچە تېپىلىدۇ. ئەقىدە- ئىتىقادسىز كىشىلەر ئۆزلىرىنى مەدەنىيەت، تەرەققىيات، يىڭىلىق، زامانىۋىيلىقنىڭ ‹‹ ھەقدار ۋەكىلى ›› دەپ تەنتەنە قىلىشقىنىچە، بىخۇدلۇقتا قايناپ تاشماقتا.
بىلىش كېرەككى، ئەقىدە ئىنسان روھىيىتىنىڭ تۈۋرۈكى، ئىنسان ئېڭىنىڭ جەۋھىرى بولۇپ ھېسابلىنىدۇ. ئەقىدىسىز روھ ئەمەلىيەتتە چاھارپاي روھىدۇر. پەقەت ئەقىدىلىك ئادەملا يۈكسەك ئاڭ پەزىلىتى ئارقىلىق مەخلۇقاتلار سېپىدىن ئايرىلىپ چىققان ھەقىقىي ئىنساندۇر.
ئەينى پەيتتە كۆپىنچە دىندار قېرىنداشلىرىمىز ئىلىم بىلەن دوستلاشماي يۈرۈشىدۇ. زامانىۋىي ئىلىملارنى ئۆگىنىشنى گۇناھ سانايدىغان جاھىل ئىنسانلار ھازىر ھەم بار. جامائەتكە مەرىپەت تارقىتىشقا مەسئۇل مەسجىد ئىمامىنىڭ ‹‹ كلونلاش ›› ، ‹‹ فوند ›› ، ‹‹ تور ›› كەبىي زامانىۋىي ئىلىم – پەن ئاتالمىلىرىنى ئىشتكەنلىرىدە مەڭدەپ قېلىشلىرى ئەپسۇسلىنارلىق. بىلىم پارتىلىغان بۈگۈنكى كۈندىمۇ پەرزەنتلىرىنى ئوقۇتماسلىق، مەكتەپ قوينىدىن تارتىپ ئېلىش كويىدا يۈرگەن تالاي ئاتا – ئانىلارنىڭ بارلىقى ئىنتايىن ئېچىنارلىق…
ئەستىن چىقمىسۇنكى، تەڭرى پەقەت ئىلىم بىلەنلا قەۋملەرنى يۈكسەلدۈرىدۇ. ئىلىم كور قەلب كۆزىنى ئاچقۇچى، قاراڭغۇ زۇلمەتتە نۇر بېغىشلىغۇچى ۋە ئاجىز بەدەنگە كۈچ – قۇۋۋەت ئاتا قىلغۇچىدۇر. ئىلىم بىلەن بەندە ئالىي مەرتىبىلەرگە يېتىشىدۇ. كىم ئۆگىنىشكە ماھىر، شۇ كۆپكە قادىر.
بۈگۈنكى كۈندە ئىلىم ئېلىش ئۈچۈن ھېچقانداق توسالغۇ يوق. ئەكسىچە، شارائىت بار، ئىمكانىيەت بار. يۈزلەپ – مىڭلاپ ئالىي ئوقۇللار، تۈرلۈك كەسپلەر بويىچە تەربىيىلەش مەركەزلىرى ئوچۇق تۇرۇپتۇ. تۈرلۈك تىللاردا كىتاب – دەستۇرلار يەتكۈچە نەشىردىن چىقىۋاتىدۇ. جاھاندىكى جىمىكى ئىلىملارنىڭ جەمگاھى بولغان ئېنتېرنېت – تورغا چىقىش ئىمكانى بار.
ئەمما، بىزدە رىغبەت يوق، ئىخلاس سۇس، غەيرەت – ھەرىكەت كەمچىل. قانچىلاپ ۋاقتىمىزنى بىھۇدە ئەمەللەرگە ، نامەقبۇل ئولتۇرۇش – يىغىلىشلارغا، بولمىغۇر ئىش – پائالىيەتلەرگە سەرىپلەپ يۈرۈيمىزكى، بىراق ھەقىقىي ئىلىم ئېلىشقا، ھېچ بولمىسا ئەتراپمىزدا، دۇنيادا بولۇپ ئۆتىۋاتقان ئىش – ۋەقەلەر بىلەن تونۇشۇپ قويۇشقا ۋاقىت – ئىمكان تاپالمايمىز. شۇڭلاشقىمۇ، بىز 21 – ئەسىرگە كەتمەن بىلەن كاۋاپداننى كۆتۈرگەن ھالدا كىرىپ كەلدۇق. ھالبۇكى، ئېسىللىك، ئەزىزلىك مەرىپەتتە ئىدى.
ھەممە ئەسىرلەردە بولغىنىدەك، ئۆتكەن ئەسىرنىڭ باشلىرىدىمۇ ئوچۇق كۆزلۈك زىيالىيلىرىمىز جاھالەتنى قارىلاپ، خەلقنى ئىلىم – مەرىپەتكە جارلاپ چارچاشمىغان ئىدى. مەرىپەتپەرۋەر شائىر (يولباشچى)، دىنىي ئۆلىما ئابدۇقادىر داموللا : « بۇ دەۋر ئىلىم مەرىپەت دەۋرىدۇر ، جاھالەت ۋە نادانلىق دەۋرى ئەمەستۇر . » دەپ جار سالغان ۋە ئۇشبۇ يولدا جان تەسەددۇق قىلغان ئىدى. ئارقىدىنلا يېقىنقى زامان مائارىپ سەركىسى مەمەتئېلى تەۋپىق ئەپەندى:
‹‹ ئوقىدى- ئاشتى باشقىلار بىزدىن، ئەي قەدىردانلار،
كۆرگەچكە ئۇلارنىڭ ئىجتىھاتىنى قاينار ۋىجدانلار.
ھاۋادا لاچىندەك جەۋلان قىلۇر باشقا مىللەتلەر،
قالدۇق بىز ئۇلاردىن بەكمۇ ئارقىدا، ئويلا ئۈممەتلەر. ››
دەپ چوقان سالغان ئىدى. بۇ جۇشقۇن چاقىرىق – چوقانلار كۈنىمىزدىكى ئۇيغۇر جەمئىيىتى ئۈچۈن ھېلىھەم ئۆز قىممىتىنى يوقاتقىنى يوق.
مەنبە: يۈكسەل بلوگى ، يازما : ئىلىمسىزلىك تورى
—
ياركەنت، كاشغەر، خىۋە، باغداد، قاھىرەدىكى كۇتۇبخانىلارنىڭ ھەر بىرىدە مىليۇنلاپ كىتابلار ساقلانغان
—
يۈكسەل قارىم،بۇ گىپىڭىزنىڭ مەنبەسى بارمىكىن؟
ياركەنىت، كاشىغەر دىگەن بىزنىڭ يەكەن، قەشقەرلەرنى كۆرسىتەمدۇ يا؟ بۇ ئىككى يەردە مىليۇنلاپ ئەمەس بىرەر يۈز مىڭ كىتاپ ساقلانغان بىرەر كۈتۈپخانا بولغانلىغىدىن گۇمانلىنىمەن.
دىيارىمىزدىكى تارىخى ماتىرىياللار ۋە يازما مەتبەئەلەر چەت ئەل مىسسىيونېرلىرى تەرپىدىن كۆپلەپ ئېلىپ كېتىلگەن ۋە ئۆز قولىمىز بىلەن تارىخى ماتىرىياللىرىمىزنى يەنچىگىنىمىز تۈپەيلى ھازىر بىزدە سىزگە ئىسپات كەلتۈرگۈدەك ھال يوق. شۇڭا سىزنىڭ گۇمانلىنىشىڭىز بەرھەق … ئەمما چەت ئەل كۈتۈپخانىلىرىدا يەنىلا مىڭلىغان تارىخى يازمىلىرىمىز ساقلانماقتا ( مەسىلەن شىۋىتسىيە خان جەمەتى كۈتۈپخانىسى ). مېنىڭچە مۇشۇلارنىڭ ئۆزىمۇ بىزنىڭ گۇمانىمىزغا جاۋاب بولالايدۇ !
ياركەنت دىگەن يەكەن ئەمەس، بەلكى ھازىرقى قازىقىستان تەۋەلىكىدىكى شەھەر بولۇشى مۇمكىن.
كاشغەرنىڭ بۈگۈنكى قەشقەرنى كۆرسىتىدىغانلىقى ئۆز – ئۆزىدىن مەلۇمدۇر. بۇ سۆزىمىزگە بوۋىمىز مەھمۇد كاشغەرىنىڭ نام – شەرىپى دەلىلدۇر.
تارىخشۇناس بوۋىمىز، ئالىم مۇسا سايرامىي خۇددى مەھمۇد كاشغەرىي، يۈسۈپ خاس ھاجىپ، ئەلىشىر نەۋائىي ۋە مىرزا ھەيدەر كوراگان كاشغەرىيلارغا ئوخشاشلا دۇنياۋىي ئالىم بولۇپ، ئۇنىڭ ئونلىغان ژىرىك ئەسەرلىرىنىڭ جەۋھىرى سانىلىدىغان بۈيۈك ئەسىرى «تارىخى ھەمىدىي» نىڭ ياركەنت توغرىسىدىكى باياندا، داڭقلىق زىيارەتگاھ __ ئالتۇنلۇقۇم مازىرىنى ئالاھىدە تىلغا ئالغان . باياندا، ئالتۇنلۇقۇم مازىرىنىڭ ياركەنت سەئىدىيە خاندانلىقىنىڭ خانلىق مازىرى بولۇپ، ياركەنت سەئىدىيە خاندانلىقىنىڭ قۇرغۇچىسى سۇلتان سەئىدخاندىن تارتىپ تاكى ئىسمايىل خان ۋە مۇھەممەد ئەمىن خانلار زامانىغىچە بولغان خانلار ۋە ئەۋلادلارىنىڭ مۇشۇ يەرگە دەپنە قىلىنغانلىقىنى: «ئەينى ۋاقىتتا كىشىلەر خانلارنىڭ جەسىدى بار يەرلەرنى، بەلكى خانلارنىڭ جەسىدىنىمۇ ھۆرمەتلەپ ۋە ئىززەتلەپ ‹ئالتۇن› دەپ ئاتايدىكەن، ھەتتا خانلارنىڭ نەزىرى چۈشكەن ياكى قولىغا تېگىپ مۆھۈر باسقان يارلىق ۋە نىشانە خەتلەرنىمۇ ئۇلۇغلاپ ‹ئالتۇن نىشان› ، ‹ئالتۇن دەستەك› دەپ ئاتايدىكەن، شۇڭلاشقا بۇ مازارمۇ ‹ئالتۇن مازار› دېگەن نام بىلەن مەشھۇر بولغان بولسا كېرەك.» دېگەن مەلۇماتلار بىلەن ئىپادىلىگەن.بىز بۇ بايانلاردىن ياركەنت شەھرىنىڭ ئەسلىدە، 200 نەچچە يىل ھۆكۈم سۈرگەن ياركەنت سەئىدىيە خاندانلىقىنىڭ، شۇنداقلا بۇ يەتتە شەھەرنىڭ پايتەختى بولغان ئۇزۇن تارىخقا ئىگە مەشھۇر تارىخىي جاي ئىكەنلىكىنى، شۇنداقلا ئۇنىڭدىكى خان جەمەتى قەبرىستانلىقىنىڭ نېمە ئۈچۈن ‹ئالتۇن مازار› دەپ ئاتىلىدىغانلىقىنىڭ سەۋەبلىرىنى بىلىۋالىمىز.
ئوتتۇرا ئەسىر دۇنيا تارىخى ۋە ئىسلام تارىخىنى ئوقۇغان كىشىلەرگە سىر ئەمەسكى، ھەقىقەتەنمۇ ئەينى دەۋرىدە مۇسۇلمانلار دۇنياسى ئىنسانىيەت مەدەنىيەت تەرەققىياتنىڭ ئەڭ يۈكسەك پەللىسىدە ئىدى. ئۇلارغا بۇ خىل يۈكسەك ماقامنى ئۇلارنىڭ ئىلىمغا تۇتقان پوزىتسىيىسى ئاتا قىلغان ئىدى. 10 – ئەسىردە ياۋرۇپانىڭ بىر بۇلۇڭى ھېسابلانغان Córdoba ( ھازىرقى ئىسپانىيەدە )دا 700 دىن ئارتۇق مەسجىد، 70 دىن ئارتۇق كۇتۇبخانا بولغان. بۇلارنىڭ ئىچىكى ئەڭ چوڭ كۇتۇبخانىدا 600 مىڭ پارچىدىن ئارتۇق كىتاب ساقلانغان. پۈتكۈل ئەندۇلۇسىيە ( ھازىرقى ئىسپانىيەدىكى ئاپتونوم رايون ) دە ھەر يىلى 60 مىڭدىن ئارتۇق ئىلمىي ماقالە، شىئېر، تەزكىرىلەر نەشىر قىلىنغان. قاھىرەدىكى كۇتۇبخانىدا بولسا 2 مىليۇن پارچىدىن ئارتۇق كىتاب ساقلانغان. ھالبۇكى تېرىپول ( ھازىرقى لىۋاندا ) دىكى كۇتۇبخانىدا 3 مىليۇن پارچىدىن ئارتۇق كىتاب ساقلانغان.
ۋە يەنە شۇ مەنبەلەردە، ئەينى دەۋرلەردە مۇسۇلمانلار ئىجاد ئەتكەن ئىلمىي ئەسەرلەرنىڭ سانىنىڭ پۈتكۈل لاتىن ۋە گىرېك يزىقلىرىدا ئىجاد ئېتىلگەن ئەسەرلەرنىڭ يىغىندىسىدىنمۇ زور دەرىجىدە ھالقىپ كەتكەنلىكى قەيىت قىلىنغان. بىر ئۇرۇس تەتقىقاتچىسى ئەينى دەۋردە مۇسۇلمانلار بارلىققا كەلتۈرگەن ئىلمىي ئەسەرلەرنىڭ 5 مىليۇن پارچىدىن ئاشىدىغانلىقىنى، بۇنداق زور مىقداردىكى ئىلمىي ئەمگەكلەرنى پەقەت بۈگۈنكى باسما نەشىرىىيات دەۋرى بىلەن سېلىشتۇرۇش مۇمكىنلىكىنى كۆرسەتكەن.
يۇقىرىقى بايانلار ئۈچۈن دەلىل مەنبەلەر:
http://en.wikipedia.org/wiki/Islamic_Golden_Age
http://baike.baidu.com/view/3248880.htm
شۇنى ئالاھىدە قىستۇرۇپ ئۆتۈش ھاجەتكى، ئالىم ئابدۇشۈكۈر مۇھەممەدئىمىن ئەپەندىنىڭ ‹‹ ئۇيغۇر پەلسەپە تارىخى ›› دېگەن كىتابىدا كۆرسىتىشىچە، ئوتتۇرا ئەسىر مۇسۇلمانلىرى ياراتقان ئىلىمىي ئەمگەكلەرنىڭ خېلى كۆپ قىسمىنى ئوتتۇرا ئاسىيالىق ئالىملار ياراتقان، مەدەنىيەت ئويغۇنىشى تەدرىجىي غەربتىن شەرىققە ، يەنى مەركىزىي خەلىپىلىككە تەسىر كۆرسىتىۋاتقان ئوتتۇرا ئاسىيا رايونلىرىغا – سامانىلار، كېيىنچە قارا خانلار پايتەخىتلىرىگە يۆتكەلگەن. ئەينى دەۋرلەردە قاراخانلار باشكەنتى ھېسابلانغان كاشغەر ئوتتۇرا ئاسىيانىڭ سىياسىي ، ئىقتىسادىي ۋە مەدەنىي مەركىزىگە ئايلانغان. ئۇنىڭدا ‹‹ ساچىيە مەدرىسى ›› گە ئوخشاش داڭلىق مەدرىسلەر بولغان.
نا جۇڭ، دېگەن تۇنگان تەتقىقاتچى يازغان ‹‹ ئەرەب ئومۇمىي تارىخى ›› دېگەن كىتابنىڭ 1-توم 625-بېتىدە (خەنزۇچە) : ‹‹ نىزامۇلمۈلك سالدۇرغان نۇرغۇن مەكتەبلەر بىردەك دەپ ئاتالدى. بۇنىڭ ئىچىدە باغدادتىكى نىزامىيە مەدرىسى ھەممىدىن مەشھۇردۇر›› دەيدۇ. مەزكۇر كىتابنىڭ 236-بېتىدە يەنە مىلادى 1010-يىلى باغدادتا بەيتھېكمەت دارىلۇلۇمى (ئالىي بىلىم يۇرتى) قۇرۇلغانلىقى، سەل كېيىن قاھىرەدە دارىلۇلۇم قۇرۇلغانلىقى نەقىل كەلتۈرۈلىدۇ. مانا شۇلاردىن ئىلمىي يەكۈن چىقىرىشقا بولىدۇكى، ‹‹ جۇڭگونىڭ شىنجاڭ رايونىدىكى ئىسلام دىنى تارىخى ›› (خەنزۇچە) نىڭ 1-توم 117-بېتىدە خاتىرىلەنگەن تارىخىي پاكىتتا قاراخانىيلار ھۆكۈمرانى سۇلتان سۇتۇق بۇغراخان( مىلادى 910-يىل__ 955/956-يىل ) دەۋران سۈرگەن مەزگىللەردە كاشغەردە ساچىيە مەدرىسىنىڭ بارلىقى يېزىلىدۇ. مانا بۇ ئىسلام دۇنياسىدىكى ، يەنى ئىسلام مەدەنىيىتى تارىخىدىكى تۇنجى ئالىي بىلىم يۇرتى(ئۇنىۋېرسىتېت) بولۇشقا مۇناسىپ. ساچىيە مەدرىسى نىزامۇلمۈلكنىڭ مىلادى 1065-يىلى بىلەن 1094-يىلى ئارىلىقىدا سالدۇرغان باغدادتىكى نىزامىيە مەدرىسىدىن يۈزيىلدىن كۆپرەك بۇرۇندۇر ؛ ئەبۇ ئىسھاق ئىسفەرەئىي (مىلادى1027-يىلى ۋاپات بولغان ) سالدۇرغان مەدرىسلەردىنمۇ يېرىم يۈزيىلچە بۇرۇندۇر.
دېمەك ، كاشغەر، ياركەنت ئۆز زامانىسىدا مەدەنىيەت مەركىزى بولۇش سۈپىتى بىلەن جاھانغا مەشھۇر مەدرىس ۋە كۇتۇبخانىلارغا ئىگە بولغان. مەزكۇر كۇتۇبخانىلاردا ناھايىتى زور مىقداردا كىتابلار ساقلانغانلىقى ئۆزىدىن مەلۇم .
خوش گېپىمىزگە قايتىپ كەلسەك، جېك نەقىل ئالغان ‹‹ مىليۇنلاپ ›› سۆزىنى يۇقارقى شەھەرلەردىكى كىتابلارنىڭ مىقدارىنى بىلدۈرىدىغان ئېنىق سانلىق ئۇچۇر سۈپىتىدە ئەمەس بەلكى ساقلانغان كىتاب مىقدارىنىڭ ناھايىتى زورلىقىنى بىلدۈرىدىغان ‹‹ ئەدەبىي سۈپەت سۆزى ›› سۈپىتىدە چۈشىنىشىڭلارنى ئۈمىد قىلىمەن.
مۇمكىن، بولسا يەر – جاي ناملىرى ، بەزى سان – سۈپەت سۆزلىرىدىن ئىبارەت يانداشما بايانلارغا زېھنىمىزنى چارچاتماي، تېمىدىكى ئاساسىي پىكىرگە قايتىپ كېلىپ، مۇنازىرىمىزنى داۋاملاشتۇرساق دېگەن ئۈمىدتىمەن.
بەلكىم قەدىم قەدىم زامانلاردا ساقلانغان بولىشى مۇمكىن، ئۇستازىم بۇرۇن دەيدىغان ، بىز تارىخىتا ئۈچ قېتىم كەم كۆلەملىك كىتاپ كۆيدۈردۈق دەپ ، بەلكىم شۇ ۋاقىتلاردا كۆيدۈرۈلگەن بولىشى مۇمكىن.
1. قارا خانىيلار خاندانلىقى قۇرۇلغان ۋاقىتتا.
2. سەئىدىيە خاندانلىقى مۇنقەرىز بۇلۇپ ، ھىدايىتوللا تەخىتكە چىققاندا.
3. مەدەنىيەت ئالامەت ئىنقىلابىدا.
ئەي پەقىر ئۇيغۇر ئويغان ئۇيقۇڭ يىتەر ،سەندە مال يوق ئەمدى كەتسە جان كىتەر .
يۈكسەل ئەپەندىن جېكنىڭ سورىغان سۇئالىدىن ئەگىپ ئۆتۈپ كەتتىمۇ نېمە؟
ئۇنىڭ ئۈستىگە يۈكسەل ئەپەندىمنىڭ نەقىل كەلتۈرگىنى ئېنىقسىز مەلۇمات ئىكەن. شۇنداق بولغاندىمۇ، ئوتتۇرا ئەسىردە يار كەنت، كاشغەردىكى كۇتۇپخانىلاردا مىليونلاپ كىتابلارنىڭ ساقلىنىشى ئەقىلگە سىغمايدۇ، ئادەمنىڭ گۇمانىنى قوزغايدۇ. ئەگەر راستىنىلا شۇنداق ساقلانغان بولسا، بۇنىڭ ماددىي ئىسپاتى تىلغان ئېلىنىشى كېرەك ئىدى. ئەگەر بۇ ھېسسىياتقا تاقاپ يېزىلغان بولسا، ۋاقتىدا ئۆزگەرتىپ قويسىمۇ يامان كەتمەيدۇ.
مۇمكىن، بولسا يەر – جاي ناملىرى ، بەزى سان – سۈپەت سۆزلىرىدىن ئىبارەت يانداشما بايانلارغا زېھنىمىزنى چارچاتماي، تېمىدىكى ئاساسىي پىكىرگە قايتىپ كېلىپ، مۇنازىرىمىزنى داۋاملاشتۇرساق دېگەن ئۈمىدتىمەن.
ھوي، يۈكسەل ئەپەندىم، ئەسلى تېمىغا قايتمايمىز ئەمەس، قايتىمىز، ئەمما سىلى دېگەن گەپلىرىگە ئىسپات تېپىپ بەرمىسىلە، يۈرەكلىك پىكىر قىلالمايمىز-دە! ئىلىمسىزلىك ھەققىدە ھەممىمىز بىر تاغار سۆزلىيەلەيمىز، ئەمما ئۇنى سۆزلەپلا بولدى قىلساق، ياكى «يۈكسەل ئەپەندىنىڭ تېمىسىغا رەھمەت» دەپ ھەشقاللا ئېيتساقمۇ بولىدۇ، ئەمما ئىلىم ئىزدىگۈچىلەرنىڭ بىر سەپىرى شەيئىلەرگە بىر خىل تەنقىدىي ۋە گۇمانىي نەزەر بىلەن قاراش بولغاچ، سىلىنى بۇ نۇقتىدىن ئەگىپ ئۆتۈپ كېتىشكە يول قويالمىدىم. ئەگەر سىلى بۇنى مەسىلە ئەمەس، دەپ مەقسەتكە كېلەيلى، دېسىلە، پېقىر سىلىدىن ئەپۇ سورايمەن.
ھەي سىز يەنىلە ‹‹سان›› غا ئېسىلۋالغىلى تۇرۇپسىزغۇ؟ يۈكسەل دەپتۇغۇ؟ بولمىسا ماۋۇ تېمىدىكى ‹مىليۇن› سۆزىنى ‹نۇرغۇن› غا ئۆزگەرتىپ قويسىلا بولاتتىكەن. شەخسى پىكرىم جۇمۇ، ئاچچىقىىڭىز كەلمىسۇن. بولسا ماقالىنىڭ مەزمۇنى توغۇرلۇق پاراڭ قىلايلى.
ئەسسالام پىكىرداشلار، ئالدى بىلەن زامانىمىزدىكى ئىلىمسىزلىك تورىنى بۇنچىلىك ھالدا رۇشەن تەسۋېرلەپ بەرگەن مەزكۈر يازمىنىڭ يازارى يۈكسەل ئەپەندىگە كۆپلەپ تەشەككۈرلەر بىلدۈرىمەن، بۇ يازما بىزلەر ئۈچۈن شۇنداقلا ھازىرقى زاماندا ياشاۋاتقان ھەر بىر ئۇيغۇر ئاتلىق كىشى ئۈچۈن بىر قەدەر قىممىتى يۇقىرى بولغان، بىزلەرنى ئۆزىمىز ئۈچۈن كەلگۈسىمىز ئۈچۈن ئويلىنىشقا دەۋەت قىلىدىغان يازما بوپتۇ، ئەمما كۆپچىلىك ئىنكاسلارنىڭ تېمىدىن بىراقلا چەتنەپ مەزكۈر يازما بىلەن قىلچىلىك ئالاقىسى بولمىغان نەرسىگە ئېسىلىۋالغانلىقىدىن بىر ئاز ئەجەبلىنىپ قالدىم، ئەلبەتتە بۇنى مەن ھەرگىزمۇ مۇھىم ئەمەس دېگىنىم ئەمەس، مېنىڭچە يۈكسەلنىڭ بۇ يەردە مىليۇنلاپ سۆزىنى ئىشلىتىشى پەقەتلا بىر سۈپەتتۇر خالاس، ئۇنىڭسىزمۇ ھەر قايسى مەنبەلەردە 8-ئەسىردىن 13-ئەسىرگىچە 500 يىل مابەينىدە پۈتكۈل ئىسلام دۇنياسىنىڭ ئەدەبىيات-سەنئەت، بىناكارلىق، نەققاشلىق ۋە جۇغراپىيە قاتارلىق ئىلىملەردە پۈتكۈل دۇنياغا تەسىر كۆرسەتكۈدەك دەرىجىدە يۈكسىلىشلەرنى قولغا كەلتۈرگەنلىكىنى قەيت قىلىنغان، بۇنى ئىسلام دۇنياسىنىڭ گۈللەنگەن دەۋرى دەپمۇ ئاتىغان، بۇ زاماندا قاھىرە كۈتۈبخانىسى قاتارلىق داڭلىق كۈتۈنخانىلاردا ھەقىقەتەنمۇ مىليۇنلاپ كىتابلار ساقلانغانلىقى ئېنىق (يۈكسەلنىڭ دەسلەپكى يازمىسىدا بۇ مەنبەلەرمۇ ناھايىتى ئىنىق كۆرسىتىلىپتۇ)، ئەمدى شۇ دەۋىردىكى رايۇنىمىزغا قايتىپ كەلسەك، ئۇيغۇر تارىخىنى ئوقۇغانلا كىشى ئۇيغۇرلارنىڭمۇ نەق شۇ دەۋردە ئەدەبىيات-سەنئەت، بىناكارلىق، نەققاشلىق ۋە جۇغراپىيە قاتارلىق ساھەلەردە كۆز يۇمغۇسىز نەتىجىلەرنى ياراتقانلىقى، نۇرغۇنلىغان دۇنياۋى ئالىملىرىمىزنىڭ يېتىشىپ چىققانلىقى، قىسقىسى ھەتتا پۈتكۈل ئاسىيادا ئەرەب پارس تىللىرىنى ئۈگىنىش، ئەسەرلەرنى ئەرەب پارس تىللىرىدا يېزىش شۇ دەۋرگە نىسبەتەن مودا ھەم ئىلىملىك ھېسابلانغان دەۋرلەردە تۈركى تىلىنىڭ (يەنى ئوتتۇرا ئاسىيادا ئىشلەتكەن تىل، جۈملىدىن ئۇيغۇر تىلى دېيىشكە تامامەن ھەقلىقمىز) ئەرەب پارس تىللىرى بىلەن بەسلىشەلۈگۈدەك ھەتتا ئۇنىڭدىن ئېشىپ چۈشكۈدەك دەرىجىدە ئىكەنلىكىنى كۆرۈپ يېتىش ئانچە تەس ئەمەس، دېمەك بىر مىللەتنىڭ ئىلىم پەن ساھەسىدە تەرەققى قىلماي تۇرۇپ بۇنچىلىك نەتىجىلەرنى قولغا كەلتۈرمىگى مۇمكىن ئەمەسلىكىنى ھەممىمىز بىلىمىز، شۇنىڭغا ئوخشاشلا ئەرەب پارس ئالىملىرىدىن ئېشىپ چۈشكۈدەك نەتىجىلەرنى ياراتماي تۇرۇپ، تۈركىي تىلنىڭ ئەرەب پارس تىللىرىغا تەسىر كۆرسۈتەلىگۈدەك ھالەتكە كېلىشى مۇمكىن ئەمەسلىكىنىمۇ ئوبدان بىلىمىز، دېمەك بۇنىڭغا ھېچقانداق دەلىل ئىسپاتلار كەتمەيدۇ، تارىخنىڭ ئۆزىلا ئىسپات خالاس، ئەلۋەتتە شۇ دەۋىرلەردە رايۇنىمىز كۈتۈبخانىلىرىمىزدا ساقلانغان نۇرغۇنلىغان كىتاب يازمىلار كېيىنكى ئاپپاق خۇجا دەۋرى، مەدەنىيەت ئىنقىلابى قاتارلىق رايۇنىمىزنى جاھالەت قاپلىغان دەۋرلەردە ئىنتايىن كۆپ ساندىكىلىرى يۇقىتىلىپ بىزگە ئىنتايىن چەكلىك بولغان قىسمىلا يېتىپ كەلگەن بولسىمۇ، ئەمما بىز شۇ سەلتەنەتلىك تارىخىمىزنى ئاساس قىلىپ بولسىمۇ بۇ يەردە مىليۇنلاپ سۆزىنى ئىشلىتىشكە ھەقلىقمىز. خوش، ئەمدى بىزنىڭ تالاش تارتىش قىلىدىغىنىمىز بۇلارمۇ؟ ياق، تارىخ پەقەتلا تارىخ، مەيلى يورۇق بولسۇن ۋە ياكى قاراڭغۇ بولسۇن، تارىخ ئۇ پەقەتلا ئۆتۈپ كەتكەن ئىشلارغا ۋەكىللىك قىلىدۇ خالاس، بىزنىڭ قىلىدىغىنىمىز ئۇ تارىخلارنى تارىخشۇناسلارنىڭ تەتقىق قىلىشىغا قويۇپ قويۇپ، كېيىنكى ئەۋلادلارغا تېخىمۇ شانلىق تارىخلارنى يارىتىشتۇر، يۈكسەلنىڭ بۇ يازارىدىكى مەركىزى ئىدىيەمۇ مانا مۇشۇ، شۇنىڭ ئۈچۈن دوستلار زېھنىمىزنى تارىختىكى ‹‹ مىليۇنلاپ ›› قا قارىتىۋالماي، كەلگۈسىدىكى ‹‹ مىليۇنلاپ ›› نى يارىتىشقا قارىتىشىمىز كېرەك، شۇنىڭ ئۈچۈن كەڭ دوستلارنىڭ قايتىدىن تېمىغا قايتىپ كېلىشىنى ئۈمىد قىلىمەن…
راستىنى ئېيتسام، يازمىنى ئوقۇۋېتىپ،يۈكسەل ئەپەندىمنىڭ يۈرىكىنى بىز ئاز بىلگەندەك بولدۇميۇ، ئەمما ئاخىرى تولۇق ئاياغلاشمىغان يازما بىلەن، دېمەكچى بولغان پىكىرنىڭ تېرەن مۇناسىۋىتىنى ھىچ تاپالمىدىم…
ئەمدى باش تىمىنى ھىس قىلدىم!
بۇماقالىدىكى ئىلىم پەن ئالىملىرىنىڭ ئەقىدە-ئىتىقادقا يۈكسەل ئېيتقاندىنمۇ بەكرەك سەل قارايدىغانلىقى مىنى دائىم ئويلاندۇرۇپ قويدىغان بىر مەسىلە. لېكىن مەن ئويلايمەن، ھەقىقەت ھامان بىر كۈنى ئاشۇ بىلىملىك ئۇستازلىرىمىزنىڭ كۆز ئالدىغا ھامان ئايان بولۇدۇ. ھەر دائىم باشقىلار بىلەن مۇشۇ ئشلار توغۇرلۇق سۆھبەتتە بولۇپ قالساق، ئۇ قارڭغۇ تەرەپلەرنى قىلچىمۇ كۆز ئالدىمغا كەلتۈرمەيمەن. ئۇلارغا بولغان ھۆرمىتىمگە قىچىمۇ نۇقسان يەتكۈزمەسلىككە تىرىشىمەن.
مەن ئەڭ ياخشىسى كۆپچىلىكنىڭ پىكىرى داۋام ئەتكەنگە قەدەر ساقلاي، كۆپلىگەن ئېنكاسلار مېنى
بەكلا گاڭگىرتىپ قويدى ، ئاخىرلاشقاندا تىما بىلەن ئېنكاسنى بىرلەشتۈرۈپ ئوقىمىسام بولمىدى.
مەنمۇ شاھ مەردانجان بىلەن بىر قاراشتا
يۈكسەل ئىنىمىزنىڭ بۇ يازمىسىدا بىر نەرسە كەمدەكلا!
ئىنكاس يېزىۋاتقانلار ياكى يازماي كۆرۈۋاتقانلار بۇ ھەقتە ئويلىشىپ باققانمىدۇ؟!
مەن ئويلاشتىم، لېكىن دەماللىققا ئوتتۇرىغا قويۇشنى خالىمىدىم، مەزكۇر يازما ئىنكاس-باھالار بىلەن مەلۇم باسقۇچنى بېسىپ ئۆتكەندىن كېيىن، ئوبدانراق بىر توختىلىشىنى لايىق تاپتىم.
زادى نېمە كەم بۇ يازمىدا ؟ …
ياخشى يېزىلغان ماقالە ئىكەن!
نۆۋەتتىكى ئۇيغۇر جەمئىيىتىمىزدە، ئۆزى زىيالىي، لېكىن 5 ۋاق نامازنى تاشلىماي ئوقۇيدىغان، پەن بىلەن دىننى بىرلەشتۇرۈپ، ئۆزىنى روناق تاپقۇزىۋاتقانلار قارىنداشلىرىمىز ھەم بار.
دادامنىڭ ئېيتىپ بېرىشىچە، كېريە ناھىيىسىدىكى قەۋىمشەھىدان مازىرىدىلام نەچچە مىڭ كىتاپ ساقلىناتتىكەن. كېيىن مەدەنىيەت ئىنقىلاۋىنىڭ بۇرانلىرى ئۇچۇرتۇپ كېتىپتۇ.
ئىلىم ۋە بىلىم …..
ئەقلىمنى بىلگىنىمىدە مىنى ئىلىم ئۆگىنىسەن دەپ بىر لىگەن مانتا بىلەن بىر قارىمدا ئۇقۇغۇنىمنى بىلىمەن ، كىيىن مەكتەپتە بىلىمنى ئۆگەندىم ….
ئىلىم بىلەن بىلىم ئىككىسى مىنىڭچە قارىمۇ – قارشى سۆز ئەمەس بەلكى جۈپ سۆز بولسا كىرەك ، چۈنكى مەن ئەگەر بىلىمگىلە ئېسىلغان بولسام ھازىرقى مەن پەقەت ماددىغا ئېسىلىۋالدىغان ، ئېينىشتىيندەك ئاخىرى ماددىدىن سەۋەبى نەتىجىلەرگە ئېرىشەلمەي جان تالىشىشقا سەۋەبدار بولۇپ قېلىشىم مۇمكىنتى ، لېكىن ئىلىمنى ھورۇنلىق قىلىپ ئازراق ئۈگەنلىكىم ئۈچۈن تىنىمدە ئېقىۋاتقان قانلار ۋە يۈرۈكۈمدىكى بىر روھىمنىڭ تەندىن باشقا بىر يىمىرىلمەس ماددا بارلىقىنى بىلىپ شۇنىڭدىن تۇغۇلغان ئىتقاد نىشان بىلەن ، سەۋەب نەتىجىلەرنى ماسلاشتۇرۇپ كېلىۋاتقان بىر ياش بولۇشۇم بىلەن ، ئازغىنە ۋاقىتتىن كىيىن قېرىلىق باسقاندا مەندە يەنە قانچىلىك ئىلىم ۋە بىلىم تەپچىيدىكىن شۇنىڭغىمۇ گۇمانىم بار … چۈنكى ئىلىمسىزلىك ، ھۇرۇنلۇق ، جاھالىيەت دەۋرىدىكى بۇ ئۇرۇقلارنىڭ مەندە بىخ تارتىپ روھلىرىمدا كۆكلەپ كىتىشىدىن ئەنسىرەيمەن …..
يازمىنىڭ پاساھەتلىك، ئويناق تىلىدىن دىلىم سۆيۈندى، ئەپسۇس بەزى قېرىنداشلىرىمنىڭ «شۇ دەۋردە پالانى كۇتۇبخانىدا زادى نەچچە پارچە كىتاب ساقلانغانىكەن؟ دەلىل- ئسپاتى نېمىكەن؟» دېگەندەك سىركە- پىياز سۆزلىرىدىن كۆڭلۈم غەشلەندى.مەنچە بولسا زادى نەچچە پارچە كىتاب ساقلانغانلىقىنى بەك بىلگۈسى كەپ كەتكەن قېرىنداشلىرىم يۈكسەل ئەپەندىنىڭ مۇشۇ يازمىسىدا دېيلگەن ئۇچۇرلارنى يىپ ئۇچى قىلىپ يەنىمۇ ئىنچىكىلەپ ئىزدىنىپ باقسۇن، ھەم ئىزدىنىش ھاسىلاتلىرىدىن بىزلەرنى خەۋەردار قىلىپ قويسۇن، شۇندىلا بەس- مۇنازىرىنى ئىلمىي ئېلىپ بارغىلى بولىدۇ. يۈكسەل ئەپەندىنىڭ ئوشبۇ يازمىسىنىڭ قىممىتى بىزگە پالانى، پۈكۈنى كۇتۇبخانىلاردا قانچە پارچە كىتاب ساقلانغانلىقدىن ئۇچۇر بېرىش ئەمەس، بەلكى تەپەككۇرىمىزنى، داتلاشقان ۋە داتلىشىش ئالدىدا تۇرۇۋاتقان قەلبلىرىمىزنى قانچىلىك دەرىجىدە غىدىقلىيالىغانلىقىدا، شۇنداقلا بىزنىڭ بۇ يازمىدىن قانچىلىك روھىي ئۇزۇق ئالالىغانلىقىمىزدا.
ھەقىقەتەن ياخشىى تىما بوپتۇ .