2015-يىلىدىن باشلاپ شىنجاڭدا ھەق ئېلىش ئىجازەتنامىسىنى يىللىق تەكشۈرۈش خىزمىتى توختىتىلىدۇ، بۇ ئۈرۈمچى شەھىرىدىكى 1500 دىن ئارتۇق ھەق ئېلىش ئورنىنىڭ يىللىق تەكشۈرۈشكە قاتناشمايدىغانلىقىدىن دېرەك بېرىدۇ.

16-مارت مۇخبىرنىڭ شىنجاڭ ئۇيغۇر ئاپتونوم رايونلۇق تەرەققىيات-ئىسلاھات كومىتېتىدىن ئىگىلىشىچە، ھەق ئېلىش ئورۇنلىرى باھا تارماقلىرى تەستىقلىغان ھەق ئېلىش ئىجازەتنامىسىنى ھەق ئېلىش ئاساسى قىلىدىكەن. مەسىلەن، ساياھەت مەنزىرە نۇقتىلىرىنىڭ كىرىش بېلىتى ھەققى، يۇقىرى سۈرئەتلىك تاشيول ھەققى، مائارىپ-تەربىيەلەش ھەققى قاتارلىقلار.

ئىگىلىنىشىچە، ھەق ئېلىش ئىجازەتنامىسى تۈزۈمى 1993-يىلىدىن باشلاپ يولغا قويۇلغان.

دۆلەت تەرەققىيات-ئىسلاھات كومىتېتى، مالىيە مىنىستىرلىقى يېقىندا تارقاتقان ‹‹ھەق ئېلىش ئىجازەتنامىسى تۈزۈمىنى بىكار قىلىش جەريانى ۋە بىكار قىلىشتىن كېيىنكى نازارەت قىلىپ باشقۇرۇش خىزمىتىنى كۈچەيتىش توغرىسىدا ئۇقتۇرۇش›› تىكى بەلگىلىمىگە ئاساسەن، بۇ يىل 1-يانۋاردىن باشلاپ مەملىكەت بويىچە ھەق ئېلىش ئىجازەتنامىسىنى يىللىق تەكشۈرۈش خىزمىتى بىرتۇتاش توختىتىلىدىكەن، شارائىتى بار جايلار ھەق ئېلىش ئىجازەتنامىسى تارقىتىش خىزمىتىنى ماس قەدەمدە توختىتىدىكەن ياكى بىكار قىلىدىكەن. 2016-يىل 1-يانۋاردىن باشلاپ مەملىكەت بويىچە ھەق ئېلىش ئىجازەتنامىسى تۈزۈمى بىرتۇتاش بىكار قىلىنىدىكەن.