تارىم تور بېكىتى

ئاپتورى: ئاينىسا قادىر

دەسلەپكى ئاپتوبۇسقا ئۈلگۈرەلمەي قېلىشتىن ئەنسىرەپ جىددىيلىشىپ كەتكەن ئوسمان ئاپتوبۇسقا چىقىپ سەل دېمىنى ئېلىۋالغاندىن كېيىن، ئولتۇرغانلارغا بىر قۇر كۆز يۈگۈرتۈپ، يان تەرىپىگە شۇنداق قارىدى - دە، كۆڭلى ۋاللىدە يورۇپ كەتتى. ئۆزى بىلەن تەڭ قۇراملىق ئىللىق چىراي بىر چوكان ئۇنىڭغا قاراپ يېقىملىق كۈلۈپ قويدى.
−− ياخشىمۇ سىز؟ −− دېدى ئوسمان.
ئاڭغىچە ئاپتوبۇسنىڭ ئالدى تەرىپىگە ئورۇنلاشتۇرۇلغان تېلېۋىزور ھەرىكەتكە كېلىپ، ئامېرىكىنىڭ بىر كىنوسى قويۇلدى. گەرچە ئوسماننىڭ كۆزى تېلېۋىزوردا بولسىمۇ، ئەمما كاللىسىغا ھېچنېمە كىرمەيتتى. بەك ئوبدان بولدى، يولۇچىلارنىڭ ئىچىدە مۇشۇ چوكان خېلى چىرايلىقكەن، شۇنچىۋالا ئۇزۇن يولدا مۇشۇنداق ساھىبجاماللار بىلەن يانمۇيان ئولتۇرۇش نېمىدېگەن كۆڭۈللۈك - ھە؟ قەيەرلىك بولغىيتتى؟ كىچىككىنە بىر ناھىيەدىمۇ مەن تونۇمايدىغان مەزلۇملار باركەن دېسە. »يول ئازابى گۆر ئازابى« دېگىنى قايسى ئەخمەقنىڭ پەتىۋاسىكىنە، ئىشقىلىپ بۇ سەپەر مەن ئۈچۈن خەيرلىك بولىدىغاندەك تۇرىدۇ، يەنە بىر ئاز ۋاقىت ئۆتسۈنچۇ قېنى، تاغدىن - باغدىن گەپ قىلىپ، ئۈرۈمچىگە بارغۇچە كونا تونۇشلاردەك بولۇپ قالىمىز. ئۆزىمۇ بىر چىرايلىق سالام قىلدى، شۇنىڭدىن قارىغاندا ئۇ ئانچە بوينى قاتتىق مۇز چىرايلاردىن ئەمەسكەن، مەنمىغۇ بوش ئەرلەردىن ئەمەس، قايسى قازانلاردا قايناپ، نېمە ئىشلارنى كۆرمىگەن بىز... ئوسمان شۇلارنى ئويلاپ چوكانغا نېمە دەپ گەپ تاشلاشنى بىلەلمەي، خىيال قايناملىرىدا گاڭگىراپ مۈگدەك بېسىپ ئولتۇرغىنىدا، تۇيۇقسىز مۈرىسىگە بىر نەرسە تەگكەندەك بولدى. ئەسلىدە ئۇنىڭ يېنىدىكى چوكان ئۇخلاپ قالغان بولۇپ، بېشى ئۇنىڭ مۈرىسىگە سىيرىلىپ چۈشكەنىدى. ئوسماننىڭ خۇشاللىقتىن كۆزلىرى يۇمۇلۇپ كەتتى، ئۇ چوكاننى ئويغىتىۋەتمەسلىك ئۈچۈن ناھايىتى ئېھتىيات بىلەن ئولتۇرۇپ، ئۇنىڭ دېرىزىدىن چۈشكەن كۈن نۇرىدا پارقىراپ تۇرغان قوڭۇر رەڭلىك بۈدۈر چاچلىرى، سۈتتەك ئاپپاق يۈزلىرى، ھىلال ئايدەك قويۇق، ئەگمە قاشلىرى، تال - تال كىرپىكلىرى، جىنەستىدەك نېپىز لەۋلىرىنى بىمالال كۆزەتتى. چوكان دەرھال كۆزىنى ئېچىپ، ئوپۇل - توپۇل ئۆزىنى تۈزەشتۈرۈپ، قەددىنى رۇسلاپ ئولتۇردى - دە:
−− كەچۈرۈڭ، بايا ئۇخلاپ قالغاچقا ھېچنېمىنى سەزمەپتىمەن، −− دېدى.
−− ھېچقىسى يوق، بۇ قانچىلىك ئىشتى، −− دېدى ئوسمان ۋە سورىدى، −− ئەجەب يالغۇز سەپەرگە چىقىپسىزغۇ؟
−− دوختۇرغا كۆرۈنەي دېگەن.
−− نېمە؟ سىز ھېچبىر كېسەلدەك ئەمەسقۇ؟ −− ھەيرانلىق بىلەن قايتىلاپ سورىدى ئوسمان.
−− سىزگە ئېيتىش تازا مۇۋاپىق ئەمەس. ئەڭ ياخشىسى سورىمايلا قويۇڭ.
−− نېمىشقا؟
−− بۇ گەپنى ئەرلەرگە دېيىش ئەپسىز. مىجەزىم يوق دېگەندىكىن بولدى ئەمەسمۇ؟ −− دېدى چوكان ئۇيالغاندەك كۆزلىرىنى ئەپقېچىپ.
−− مەنمۇ توي قىلىپ بولغان ئادەم، شۇڭا خىجىل بولۇشىڭىزنىڭ ھاجىتى يوق. قېنى ئېيتىڭە، ياردىمىم تېگىپ قالامدۇ تېخى.
−− ئەسلىي دېمەيدىغان گەپتى، ئادەمنى تەڭقىسلىقتا قويۇپ ئەجەب زورلاپ كەتتىڭىز، سىزگە ئېيتسام، مەن توي قىلغىلى ئۈچ يىل بولغان بولسىمۇ تېخىچە بالىلىق بولالمىدىم، يولدىشىم ئىككىمىز ناھىيە ئىچىدىكى دوختۇرخانىلارغا كۆرۈنگەن بولساقمۇ ھېچبىر كېسەل بايقالمىدى. ئاخىر ئۈرۈمچىگە چىقىپ تەكشۈرتۈش قارارىغا كېلىپ قالدىم.
چوكان بۇ گەپلەرنى دەپ بولۇپ، خىجىل بولغاندەك لېۋىنى چىشلەپ قويدى.
−− يولدىشىڭىزچۇ؟
−− سىزنىمۇ تەكشۈرتۈپ باقايلى دېسەم، مەندە چاتاق يوق، ئۆزىڭىز بېرىڭ، دەپ قوشۇلمىدى.
−− شۇنداقتىمۇ بىرگە بېرىشى كېرەكقۇ!
−− ۋايجان، ئەجەب بىئارام بولۇپ كېتىۋاتىمەنغۇ، −− دېدى چوكان توساتتىن مەيدىسىگە يېنىك مۇشتلاپ.
−− نېمە بولدىڭىز؟ −− دېدى ئوسمان جىددىيلىشىپ.
−− كۆڭلۈم ئاينىپ كېتىۋاتىدۇ، گاھىدا ماشنىغا چىقسام مۇشۇنداق بىئارام بولۇپ كېتىمەنغۇ - تاڭ، −− دېدى چوكان، ئاندىن سومكىسىدىن چىرايلىق قاتلانغان پۇراقلىق قەغەزنى چىقىرىپ، ئاغزىنى توسۇپ ئولتۇردى. ئاڭغىچە ئاپتوبۇس بىر كىچىك بازاردا توختاپ، يولۇچىلارنى سېلىپ بولغۇچە بولغان ئارىلىقتا، ئوسمان چاققانلىق بىلەن يەرگە چۈشۈپ ئىككى قۇتا ئىچىملىك بىلەن بىر مۇنچە يېمەكلىك ئېلىپ چىقىپ، چوكاننىڭ ئېتىكىگە قويدى ۋە:
−− بىر نەرسە يېگەچ ماڭسىڭىز بىئارام بولمايسىز، −− دېدى.
−− ئاۋارە بولۇپ، نېمانچە كۆپ ئالغانسىز، −− دېدى چوكان تەبەسسۇم بىلەن.
−− ھە راست! تۇخۇمنىڭ ئىسسىقىدىن ئالغان، سوۋۇپ قالماستا يەۋېلىڭ، −− دېدى ئوسمان.
−− بولماسمىكىن!
−− نېمىشقا؟
−− پۇرىقى ئالدى - كەينىمىزدىكىلەرنى بىئارام قىلىپ قويارمىكىن.
−− نېمە چاتىقىمىز، ئۇلارنىڭ پۇلىغا ئالمىغاندىكىن.
−− ئاممىۋى سورۇن ئەمەسمۇ، شۇڭا باشقىلارنى ھۆرمەتلىمىسەك بولمايدۇ، مۇنداق بولسۇن، تۇخۇمنى ئېلىپ قويۇپ كەچتە ياتىقىڭىزدا يېمەمسىز؟
−− مېنىڭ ياتاقتا ياتىدىغىنىمنى قانداق بىلىسىز؟ −− دېدى ئوسمان.
−− ئۆزۈمچە دەپ قويدۇم، ئۆيىڭىز بارمىدى - يا؟
−− ياق، راستلا ياتاققا چۈشىمەن، سىزچۇ؟
−− مەن تۇغقانلارنىڭ ئۆيىگە كەتمەكچى.
−− ئەستا، ئىككىمىز بىر مېھمانخانىغا چۈشكەن بولساق قانداق ياخشى بولاتتى - ھە؟
−− ياخشى بولغۇدەك نېمىسى بار؟
−− بايىقى تۇخۇملارنى بىللە ئولتۇرۇپ يەۋەتمەمدۇق، ئۇ ئەسلىدىمۇ سىزنىڭ نېسىۋىڭىز ئىدى.
−− مۇشۇ نەچچە تال تۇخۇم بىلەن مېھمان قىلامسىز؟
−− چاقچاق، ئەگەر سىزلا خالىسىڭىز بىرەر رېستوراننى كۆتۈرە ئالغۇچىلىكىم بار جۇمۇ، قانداق، سىناپ باققۇڭىز بارمۇ؟
−− بولمايدۇ، مەن ئەزەلدىن ياتاقتا يېتىپ باقمىغان، دوستلىرىمنىڭ ئۆيىدىمۇ قونۇپ باققان ئەمەسمەن. چوڭلار كىچىكىمدىنلا بەك چىڭ تۇتقاچقا ئۆزۈممۇ ئۆگىنىپ قاپتىمەن...
ئاپتوبۇستىكىلەرنىڭ بەزىلىرى ئۇيقۇغا كەتكەن، يەنە بەزىلىرى مۈگدەك باسقان كۆزلىرىنى يۇمۇپ خىيال قايناملىرىغا غەرق بولغان، يەنە بەزىلىرى كۆرگۈسى كەلمىسىمۇ تېلېۋىزورغا قاراپ ئولتۇرغان بولۇپ، پەقەت ئوسمانلا ناھايىتى سەگەك ھەم خۇشال ئىدى. ئاپتوبۇس گاھى يېشىل بوستانلىق مەھەللىلەردىن، گاھى ئادەمسىز چۆللەردىن، كۆجۈم - كۆجۈم مەھەللىلەردىن ئۆتۈپ، ئۈرۈمچىگە يېتىپ كەلدى.
تۆت سائەت ئوسمان ئۈچۈن تۆت مىنۇتتەكلا ئۆتۈپ كەتتى. ئۇلار بىر - بىرىگە قىيالمىغان ھالدا ئايرىلىشتى.
−− ھەي، ئىسمىڭىز نېمە؟ −− سورىدى ئوسمان يىراقلاپ كېتىۋاتقان چوكاننىڭ كەينىدىن توۋلاپ.
−− مېھرىبان.
نېمىدېگەن چىرايلىق ئىسىم، خۇددى »ئالتۇن ئۈزۈككە، ياقۇت كۆز« دېگەندەك، ئىسمى ئۆزىگە خويمۇ ياراشقانىكەن. مېھرىبان تاكسى بىلەن دوستى تېلېفوندا ئېيتىپ بەرگەن رېستورانغا بىردەمدىلا يېتىپ كەلدى.
−− جېنىم دوستۇم، ئامانمۇ سىز؟ يولدا جاپا چەكمىگەنسىز؟ −− دېدى دوستى زەمىرە قىزغىنلىق بىلەن ئۇنى قۇچاغلاپ.
−− ياقەي، نېمىگە جاپا چېكەتتىم، يولبويى مېھمان بولۇپ دەڭا.
−− بوش قىزلاردىن ئەمەس جۇمۇ بىزنىڭ مېھرىبان، ئېيتىڭە، قانداقراق بىرىكەن؟
−− خېلى مەرد، قولى ئوچۇق بولۇپلا قالماي ئۆزىمۇ قاملاشقانىكەن، يۈرىكىنىڭ بىر پارچىسى مەن بىلەن كەتتىغۇ دەيمەن، ھى... ھى...
−− ۋاي بىچارە، تورغا ئىلىنىپ بوپتۇ - دە؟!
−− شۇنداق بولمايچۇ، قاراپ تۇرۇڭ، ئەتە تېلېفون قىلىپ ساراڭ بولۇپ كەتمىسە مانا مەن. ھە راست، باشقىلار يېتىپ كەلمەپتىغۇ؟
−− سەلىمجان سەل كېچىكىپ قالىدىغان ئوخشايدۇ، ئالىمنىڭ كېلىدىغان ۋاقتى بولۇپ قالدى. بوينىڭىزدىكىسى ئۆتكەندە ئالىم سوۋغا قىلغان زەنجىر شۇمۇ؟
−− ھەئە، ئۇنى خۇش بولۇپ قالسۇن دەپ ئاتايىن تاقاپ چىقتىم دەڭە.
ئىشىكنىڭ چېكىلىشى بىلەن ئۇلارنىڭ سۆھبىتى ئۈزۈلدى.
* * *
دېگەندەك، ئەتىسى سائەت 00:9 بولا - بولمايلا مېھرىباننىڭ تېلېفونى سايراشقا باشلىدى.
−− مانا دېمىدىممۇ، ئوسماندىن كەپتۇ، −− دېدى مېھرىبان دوستىغا قاراپ، ئاندىن ئۇنى شۈك تۇرۇشقا شەرەتلەپ، تېلېفوننى ئالدى:
−− ۋەي، ياخشىمۇسىز؟ مەنما، تېخى دوختۇرخانىدا، ئىشلىرىم چۈشتىن كېيىن ئاخىرلىشىدىغاندەك تۇرىدۇ، بولىدۇ، شۇنداق بولسۇن.
−− يوتقاندىن چىقماي تۇرۇپ مەن دوختۇرخانىدا دەپ كەتكىنىنى، ئاۋازىنىمۇ راست كېسەللەردەك چىقىرىپ، −− دېدى زەمىرە تۇمشۇقىنى پۈرۈشتۈرۈپ.