مۇيەسسەر ئاباھامىت

مارالبېشى ناھىيەسىنىڭ دۆلەتباغ يېزىسى چاجاڭ كەنتىدىن كەلگەن شىرئەلى ئەيسا 3 – قارارلىق ئاپتونوم رايونلۇق ئاساسىي قاتلام مەدەنىيەت قابىللىرىنى تەربىيەلەش كۇرسىغا قاتناشقان يېشى ئەڭ كىچىك كۇرسانت. ئۇ كۇرس ئاخىرلىشىدىغان كۈنى ماڭا مۇنداق دېدى: بۇ بىر نەچچە كۈنلۈك كۇرستا يېڭى بىلىملەرنى ئىگىلىدىم، پەرزەنتلەر ئۈچۈن ئائىلە تەربىيەسىنىڭ ئىنتايىن مۇھىملىقى، دۆلەتنىڭ قانۇن – تۈزۈملىرى، شۇنىڭدەك نېمىنىڭ توغرا، نېمىنىڭ خاتالىقى توغرىسىدا بىر قەدەر چوڭقۇر چۈشەنچىگە ئىگە بولدۇم.
شىرئەلى ئەيسا 1995 – يىلى تۇغۇلغان بولۇپ، بۇ يىل 20 ياشقا كىرىپتۇ، توي قىلىپ بىر بالىلىق بوپتۇ. ئۇ ماڭا مۇنداق دېدى: بۇرۇن قانۇننى چۈشەنمىگەنلىكىم ئۈچۈن، يېشىم توشمىسىمۇ ئاتا – ئانامنىڭ قارشى تۇرۇشىغا قارىماي توي قىلىۋېلىپ، بىر بالىنىڭ ئاتىسى بولدۇم، مۇشۇ سەۋەبلىك كەنتتىن مېنى يېزىلىق ھۆكۈمەتتە قانۇن ساۋاتلىرىنى ئۆگىنىشكە ئەۋەتتى. ئۆگىنىشنىڭ ماڭا بۇنداق تەسىر قىلىدىغانلىقىنى ئويلاپمۇ باقماپتىكەنمەن، شۇ قېتىمقى كۇرستا ناھىيە ۋە ۋىلايەتتىن كەلگەن ئوقۇتقۇچىلارنىڭ لېكسىيەسىنى ئاڭلاپ، نېمىنىڭ قانۇنلۇق، نېمىنىڭ قانۇنسىزلىقىنى چوڭقۇر چۈشەندىم. يېقىنقى يىللاردىن بۇيان، ئاپتونوم رايونىمىزنىڭ بىر قىسىم جايلىرىدا زوراۋانلىق، تېررورلۇق ۋەقەلىرىنى پەيدا قىلغانلارنىڭ كۆپىنچىسى ياشلار ئىكەن، ئۇلار نادان بولغانلىقى، قانۇن بىلمىگەنلىكى، توغرا – خاتانى پەرق ئېتەلمىگەنلىكى ئۈچۈن، ئاسانلا دىن ئەسەبىيلىرىنىڭ قايمۇقتۇرۇشىغا ئۇچراپ، ئاق – قارىنى پەرق ئەتمەيلا بۇنداق ئىشلارغا قېتىلىپ قالىدىكەن. مەن ياش بولغانلىقىم ئۈچۈن ياشلارنىڭ، قۇرداشلىرىمنىڭ كۆڭلىنى چۈشىنىمەن، شۇڭا ئۆزۈم تەلەپ قىلىپ تەشۋىقات گۇرۇپپىسىغا قاتناشتىم. ناھىيەمىزدە كېۋەز كۆپ تېرىلىدۇ، شۇڭا مەن كېۋەز تېرىش توغرىسىدىكى پەن – تېخنىكا بىلىملىرىنى ئۆگىنىپ، ياشلارغا ‹‹قانداق قىلغاندا كېۋەزدىن ياخشى ھوسۇل ئالغىلى بولىدۇ›› دېگەن تېمىدا لېكسىيە سۆزلىگەچ، پارتىيەنىڭ قانۇن – نىزاملىرىنى، ئادىل سىياسەتلىرىنى ئۇلارغا يەتكۈزدۈم، بۇنىڭ ئۇلارنىڭ تۇرمۇشىنى ياخشىلاشقا ئاز – تولا پايدىسى بولۇپلا قالماي، يەنە كاللىسىدىكى تۈگۈنلەرنى يېشىشتا خېلى ياخشى ئۈنۈمى بولدى. بۇ قېتىمقى كۇرستا ئاپتونوم رايونىمىزدىكى مۇتەخەسسىسلەرنىڭ لېكسىيەلىرىنى ئاڭلاپ، تەشۋىقاتچىلىقنى تاللىغانلىقىمدىن پەخىرلەندىم، پەرزەنتلەر ئۈچۈن ئائىلە تەربىيەسىنىڭ ئىنتايىن مۇھىملىقىنى ھېس قىلدىم. كۇرسقا كېلىشتىن بۇرۇن بالىنى قانداق تەربىيەلەش، ئۇنىڭغا ئائىلىنىڭ ئىللىقلىقىنى قانداق يەتكۈزۈش توغرىسىدا ئويلاپمۇ باقماپتىكەنمەن، يامان يوللاردا ماڭغان بالىلارنىڭ كۆپىنچىسىنىڭ ئالغان ئائىلە تەربىيەسى ياخشى بولمىغان ئىكەن.
دادام ئوقۇمىغان، ساۋاتسىز ئادەم بولسىمۇ، ئۆگىنىشىمگە ئالاھىدە كۆڭۈل بۆلىدۇ، ئۇ مېنىڭ كۇرستا تەربىيەلىنىپ باشقىچە ئادەم بولغانلىقىمدىن ئىنتايىن خۇش. ئۇ دائىم‹‹ساۋاتسىزلىق، قارا قورساقلىق مەن بىلەنلا كەتسۇن، سەن بىلىمسىز بولۇپ قالما، تىرىشىپ ئۆگەن››، دەپ نەسىھەت قىلىدۇ.
يۇرتۇمغا قايتىپ بارغاندىن كېيىن، پارتىيە، ھۆكۈمەتنىڭ، دادامنىڭ مەندىن كۈتكەن ئۈمىدىنى يەردە قويماي، ياشلارنى توغرا يولغا يېتەكلەش ئۈچۈن تىرىشىپ ئۆگىنىمەن، بۇ قېتىم ئۈرۈمچى شەھىرىدە كۆرگەن، ئاڭلىغانلىرىمنى يۇرتداشلىرىمغا يەتكۈزىمەن ھەم ياخشى تەشۋىقاتچى بولۇش ئۈچۈن داۋاملىق تىرىشىمەن.