چىيەنخۇا تورى خەۋىرى لەگلەك تورى تەرجىمىسى تېررورلۇق ھۇجۇمى يۈز بېرىپ، بىر سائەتكە يەتمىگەن ۋاقىت ئىچىدە فىرانسىيە زۇڭتۇڭى خوللاند سۆز قىلىپ: ‹‹بۇ شەك-شۈبھىسىزكى بىر قېتىملىق تېررورلۇق ھۇجۇمى›› دېدى. خوللاند مۇنداق بىلدۈردى: فىرانسىيەدە يېقىنقى بىر نەچچە ھەپتىدە بىر نەچچە تېررورلۇق ھۇجۇم قىلىش سۇيىقەستى تارماق قىلىندى، فىرانسىيە ھۇشيارلىقىنى كۈچەيتىپ، بۇنىڭغا ئوخشاش تېررولۇق ھۇجۇملىرىنىڭ يەنە يۈز بېرىشىنىڭ ئالدىنى ئالىدۇ. فىرانسىيە زۇڭلى مەھكىمىسىمۇ ئارقىدىنلا پارىژنىڭ تېررورلۇققا قارشى تۇرۇش دەرىجىسىنى ئەڭ يۇقىرى دەرىجىگە كۆتۈرگەنلىكىنى جاكارلىدى.

تېررورلۇق ھۇجۇمى نېمىشقا پارىژدا يۈز بېرىدۇ؟

ئەمەلىيەتتە پارىژ يېقىنقى يىللاردىن بۇيان بىر قەدەر يۇقىرى دەرىجىدىكى تېررورلۇققا قارشى تۇرۇش ھالىتىنى ساقلاپ كەلگەن. بېكەتلەر، ئايرودۇرۇملار ۋە ئاساسلىق ساياھەت مەنزىرە رايونلىرىدا دائىم تولۇق تەييارلىقتىكى ساقچىلارنىڭ چارلاپ يۈرگىنىنى كۆرگىلى بولىدۇ. پارىژدىكى ئاساسلىق ساياھەت نۇقتىسى بولغان ئېيفېل مۇنارى يېقىنقى بەش يىلدا كۆپ قېتىم ساختا بومبا تەھدىتىگە ئۇچرىغان.

فىرانسىيەدە ياۋروپا بويىچە مۇسۇلمانلار ئەڭ كۆپ، فىرانسىيە تارىختا مۇستەملىكە دۆلىتى بولۇش سۈپىتى بىلەن، شىمالىي ئافرىقا، غەربىي ئافرىقا قاتارلىق جايلاردىكى مۇسۇلمان دۆلەتلەر بىلەن ئەنئەنىۋى ئالاقىدە بولۇپ كەلگەن، ئىستاتىستىكا قىلىنىشىچە، فىرانسىيەدە تەخمىنەن 6 مىليون مۇسۇلمان ياشايدىكەن. يېقىنقى نەچچە يىلدا فىرانسىيە ھەربىي ئىشلار ۋە دىپلوماتىيە جەھەتتە لىۋىيەدىن تارتىپ ئافرىقىنىڭ مالىغىچە، ئاندىن ئوتتۇرا شەرقتىكى سۇرىيە ۋە ئىراققىچە ئاكتىپ سىڭىپ كىرگەن، شۇڭا تەبىئىيلا ‹‹چەتتە قاراپ تۇرۇش›› قا ئامالسىز. غەربىي ئافرىقا، ئوتتۇرا ئافرىقا ۋە ئوتتۇرا شەرق رايونلىرىدا رادىكال ئۇنسۇرلارنىڭ فىرانسىيەلىكلەرنى تۇتقۇن قىلىش دېلولىرى كۆپ قېتىم يۈز بەرگەن. ئۇنىڭدىن باشقا فىرانسىيەدە نۇرغۇن كىشى رادىكال تەشكىلات ‹‹ئىسلام خەلىپىلىكى›› گە قاتناشقان، ئەنگلىيەلىك تۇتقۇننى ئۆلتۈرۈۋەتكەن ئىككى نەپەر رادىكال ئۇنسۇرنىڭ دەل فىرانسىيەلىك ئىكەنلىكى ئېنىقلانغان.

فىرانسىيەدە بۇلتۇر دېكابىردا ئۇدا 3 كۈن ساقچىغا ۋە پۇقرالارغا ھۇجۇم قىلىش ۋەقەسى يۈز بەرگەن بولۇپ، بۇ ۋەقەلەرنىڭ كۆپ قىسمىدا ئىسلام رادىكال ئۇنسۇرلىرىنىڭ خۇسۇسىيەتلىرى بار. گەرچە فىرانسىيە ھۆكۈمىتى بۇ 3 دېلونىڭ مۇناسىۋىتىگە ئېنىق بىر نەرسە دېيەلمىگەن بولسىمۇ، لېكىن ئىككى نەپەر جىنايەتچى ‹‹ئاللاھنىڭ تەڭدىشى يوق›› دەپ توۋلىغان، شەك – شۈبھىسىزكى بۇ ئىسلام رادىكال تەشكىلاتىنىڭ كۈشكۈرتۈشى ۋە تەشۋىقاتى بىلەن مۇناسىۋەتلىك. فىرانسىيە زۇڭلىسى ۋائۇلس بۇنىڭدىن ئىلگىرى فىرانسىيەنىڭ ئەزەلدىن بۇنىڭغا ئوخشاش ئېغىر دەرىجىدىكى تېررولۇق ھۇجۇمىغا ئۇچرىمىغانلىقىنى ئوچۇق – ئاشكارا بايان قىلغان.

نېمىشقا ‹‹چارلى ھەپتىلىك ژۇرنىلى›› ھۇجۇم ئوبيېكتى بولىدۇ؟

‹‹چارلى ھەپتىلىك ژۇرنىلى›› فىرانسىيەدىكى داڭلىق ساتىرىك ژۇرنال، فىرانسىيە تاراتقۇلىرىنىڭ سىياسىي ئەھۋاللارنى كىنايە قىلىش ئەنئەنىسى بار، داڭلىق ‹‹ئۆردەك ئاۋازى گېزىتى›› مۇ ئاساسلىقى سىياسىي شەخسلەرنى مەسخىرە ئوبيېكتى قىلغان بولۇپ، كۆپ قېتىم سوتقا ئەرز قىلىنغان. ‹‹چارلى ھەپتىلىك ژۇرنىلى›› بولسا تېخىمۇ قاپ يۈرەك بولۇپ، 2012-يىللىرى ئىسلام دىنىدىكى مۇھەممەد پەيغەمبەرنىڭ ھەجىۋى رەسىمىنى سىزىپ چىققان، شۇنداقلا شۇ دەۋردە داڭق چىقارغان ‹‹چېقىلىشقا بولمايدۇ›› دېگەن فىلىمنى باش تېما قىلغان، بۇنىڭ مازاق قىلىش پۇرىقى ئىنتايىن كۈچلۈك بولغان. ‹‹چارلى ھەپتىلىك ژۇرنىلى›› ئىلگىرى يەنە مۇھەممەد پەيغەمبەرنىڭ يېرىم يالىڭاچ ھالىتىنى ھەجىۋىلەشتۈرۈپ سىزىپ چىققان.

‹‹چارلى ھەپتىلىك ژۇرنىلى›› دىنغا ئالاقىدار ھەجىۋى رەسىملەرنى چىقارغانلىقى ئۈچۈن كۆپ قېتىم ئاگاھلاندۇرۇشقا ئۇچرىغان، نەچچە يىل ئىلگىرى ئۇلارنىڭ ئىشخانىسى كۆيدۈرگۈچ بومبىنىڭ ھۇجۇمىغا ئۇچرىغان. شۇ قېتىملىق ھۇجۇمدا ‹‹چارلى ھەپتىلىك ژۇرنىلى›› نىڭ ئاساسلىق ھەجۋى رەسىمچىلىرىدىن 4 كىشى قازا قىلغان. فىرانسىيە تاراتقۇلىرىنىڭ خەۋىرىگە قارىغاندا، نەق مەيداندىكىلەر ھۇجۇم قىلغۇچىلارنىڭ ‹‹بىز پەيغەمبەر ئۈچۈن قىساس ئالدۇق›› دەپ ۋارقىرىغىنىنى ئاڭلىغان.

ھۇجۇم قىلىش ۋەقەسى خەلقى ئالەم ئالدىدا يۈز بەرگەن بولۇپ، كىشىنى چۆچۈتىدۇ. فىرانسىيە تاراتقۇلىرى ئۇزاقتىن بۇيانقى فىرانسىيەنىڭ كۆچمەنلەر سىڭىپ كىرىش سىياسىتى ۋە دىپلوماتىيە سىياسىتى ئۈستىدە ئويلىنىشقا باشلىدى.(

.

لەگلەك تورى ئۈندىدار سالونىنى قۇشۇۋېلىڭ ،ئىزدەش نومۇرى :LEGLEK