ئۈچ ئاچا-سىڭىل ئوخشاش بىر كۈندە توي قىلدى، ئانىسى 12 سائەتتىن كېيىن ئۆلۈپ كەتتى... بېكىي بولسا مېھرى مۇھەببەتكە تولغان بىر ئايال ۋە ئانا بولۇپ، تۆت يىل ئىلگىرى ئۇنىڭ راك كېسىلىگە گىرىپتار بولغانلىقى ئېنىقلانغان. ئۇ كۆكرەك راكى بىلەن ئىزچىل كۈرەش قىلىپ كەلگەن بولسىمۇ، 2013-يىلىغا كەلگەندە، ئۇنىڭ سالامەتلىكىدە مەسىلە كۆرۈلۈشكە باشلىغان. ئۇنىڭ ھاياتى كۈنسېرى ئاز قېلىۋاتقاچقا، ئۇنىڭ ئۈچ قىزى ئانىسى ئالەمدىن ئۆتۈشتىن بۇرۇن ئۇنى ھەيران قالدۇرغىدەك ئىشتىن بىرنى قىلىپ، ئانىسىغا بولغان مۇھەببىتىنى ئىپادىلىمەكچى بولغان.

      سارا، كەيلى ۋە جۇدىي ئۈچ قىزنىڭ يېشى ئايرىم-ئايرىم ھالدا 19 ياش، 21 ياش ۋە 22 ياش بولۇپ، ئۈچى ئوخشاش بىر كۈندە ئۆزلىرىنىڭ بولغۇسى ئېرى بىلەن توي قىلغان.

ئانىسىنىڭ كېسىلى كۈنسېرى يامانلىشىپ كەتكەنلىكتىن، ئۇلار ئانىسىنىڭ ئۆزلىرىنىڭ توي مۇراسىمىنى ئۆز كۆزى بىلەن كۆرۈشىنى ئۈمىد قىلغان.

بېكىي توي مۇراسىمىغا قاتناشقان ئەڭ ئاخىرقى مىنۇتلاردا، كۆز ياشلىرى بىلەن بالىلىرىنى باغرىغا بېسىپ سۆيدى.

توي مۇراسىمىدىن 12 سائەت ئۆتكەندە، قىزلىرىنىڭ بەختلىك ئائىلىسى بولغانلىقىنى كۆرگەن ئانا خاتىرجەم ھالدا بۇ دۇنيا بىلەن ۋىدالاشتى.

‹‹بۇ بىر خىل خۇشاللىق بىلەن ئازاب ئارىلاشقان بىر خىل تۇيغۇ، ئۇ بىز بىلەن بىللە بولغانلىقتىن بىز ناھايىتى خۇشال، بىراق بۇ بىزنىڭ ئۇنىڭ بىلەن قىلغان ئەڭ ئاخىرىقى چوڭ ئىشىمىز›› دەيدۇ جۇدىي توي مۇراسىمىدىن كېيىن.

بۇ سۈرەت بېكىي تېخى راك كېسىلىگە گىرىپتار بولغانلىقىغا دىياگنوز قويۇلمىغان ۋاقىتتا تارتىلغان بولۇپ، قىزلىرى بىلەن بولغان مۇناسىۋىتى ناھايىتى يېقىن ئىدى.

بېكىينىڭ بىرىنچى قېتىملىق خىمىيەلىك داۋالىشى غەلىبىلىك بولغان بولسىمۇ، دوختۇر راك ھۈجەيرىلىرىنىڭ باشقا ئەزالىرى ۋە جىگەرگە كېڭىيىپ كەتكەنلىكىنى بايقىغان.

25 يىل بىللە ياشىغان يولدىشى ئايالىدىن ئايرىلىپ قانداق قىلىشنى بىلەلمەي قالغانلىقىنى بىلدۈردى.

   ھاياتى ئەڭ ئاخىرىقى باسقۇچقا بېرىپ قالغان بولسىمۇ، بېكىي يەنىلا كۈچى ۋە مۇھەببىتىنى سەرپ قىلىپ، Facebook تا ئائىلىسىدىكىلەرنىڭ مەڭگۈ يادىدىن چىقمىغۇدەك ئەڭ ئاخىرىقى مۇنداق بىر ئۇچۇرنى قالدۇردى: ‹‹قەدىرلىك ئېرىم، چىرايلىق ئۈچ قىزىم ۋە ئانام ماڭا ھەر قەدەمدە ھەمراھ بولدى، مەن تولىمۇ بەختلىك››.