جاھان ئاگېنتلىقى 7-ماي خەۋىرى؛ لەگلەك تورى تەرجىمىسى: سۇرىيە ئۆكتىچىلەر ئىتتىپاقى، قولتۇق دۆلەتلىرى ھەمكارلىق تەشكىلاتىنىڭ « رىيادتا ئۆتكۈزۈلمەكچى بولغان سۇرىيە ئۆكتىچلەر يىغىنى» تەكلىپىگە ئىجابىي قارىغانلىقىنى ئېلان قىلدى.
سۇرىيە ئۆكتىچى ۋە ئىنقلابچى كۈچلەر ئىتتىپاقى باش كاتىبى يەھيا مەكتەبى، رىياد تەرەپتىن كەلگەن « ئۆكتىچىلەر يىغىنىغا قاتنىشى تەكلىپى» گە ئىجابى قارايدىغانلىقىنى ۋە قوبۇل قىلىدىغانلىقىنى ئېلان قىلدى. مەكتەبى، «قولتۇق ھەمكارلىق تەشكىلاتىنىڭ سۇرىيە ئىنقىلابىغا قىلغان ياردىمىگە مىننەتدارمىز» دەپ جاۋاپ قايتۇردى. مەكتەبى، سەئۇدى ئەرەبىستان باشچىلىقىدىكى قولتۇق ھەمكارلىق تەشكىلاتىنىڭ رولىنىڭ مۇھىملىقىنى تىلغا ئ‍ېلىپ، بۇنىڭ ئەسەدتىن كېيىنكى ئۆتكۈنچى مەزگىلدە ۋە سۇرىيەنىڭ يېڭىدىن قۇرۇلۇشى ئۈچۈن زور ھەسىسە قوشىدىغانلىقىنى ئېيتتى. مەكتەبى، سۇرىيە ئۆكتىچىلىرىنىڭ سىياسىي ھەل قىلىش چارىسىنى ئوتتۇرغا قويۇشتا چىڭ تۇرىدىغانلىقى ۋە مۇزاكىرىلەرنىڭ توختاپ قالغان يەردىن داۋاملىشىشىنى خالايدىغانلىقىنى ئېيتتى. مەكتەبى يەنە، سۇرىيە ئىنقلابىنىڭ بىرىنجى نىشانى ئەسەدنى تەختتىن چۈشۈرۈش ئىكەنلىكىنى تەكىتلەپ، سۇرىيە ئۆكتىچىلىرى ئىتتىپاقىنىڭ قاتناشماقچى بولغان ھەر قانداق مۇزاكىرىدە مۇشۇ مەقسەتتە قاتنىشىدىغانلىقىنى ئوتتۇرغا قويدى. ئۆكتىچلەر يىغىنى ئېچىش تەكلىپى سەئۇدى ئەرەبىستان پايتەختى رىيادتا 5-ماي ئۆتكۈزۈلگەن قولتۇق ھەمكارلىق تەشكىلاتى يىغىنىدا ئوتتۇرغا قويۇلغان ئىدى. قولتۇق ھەمكارلىق تەشكىلاتىغا ئەزا دۆلەتلەر پۈتۈن سۇرىيەلىك ئ‍ۆكتىچىلەرنى رىيادتا ئۇچراشتۇرىدىغان بىر چوڭ يىغىنى ئېچىش تەكلىپىنى سۇنغان ئىدى. يىغىننىڭ ئېچىلىش ۋاقتى ۋە قاتناشقۇچىلارنىڭ تىزىملىكى تېخىچە ئېلان قىلىنمىدى.
رىيادتا 5-مايدا ئېچىلغان قولتۇق ھەمكارلىق تەشكىلاتى يىغىنىدا سەئۇدى ئەرەبىستان پادىشاھى سەلمان ئىبنى ئابدۇلئەزىز سۇرىيە كىرزىسىنىڭ ھەل قىلىنىش نوقتىسىدا جەنۋە.1 قارارىنى مۇۋاپىق كۆرىدىغانلىقىنى تىلغا ئالغان. پادىشاھ سەلمان مۇنداق دېگەن؛ « سۇرىيە كىرزىسىنىڭ مۇساپىسى ئۇزاردى. قېرىنداش سۇرىيە خەلقىنىڭ قىيىنچىلىقلىرى كۆپەيدى، تېرور كەڭ تارقالدى، بىز جەنۋە.1 يىغىنىدا ماقۇللانغان ۋە ئەسەد ھۆكۈمىتى بىلەن ۋەكىللىرى قاتناشمايدىغان بىر ھۆكۈمەت قۇرۇش قارارىنى تىنچلىق ۋە مۇقىملىق ئۈچۈن چىقىش يولى دەپ قارايمىز».