يەر شارى خەۋەر تورى 18-ئاپرېل خەۋىرى؛ لەگلەك تورى تەرجىمىسى: ئىراق ۋە شام ئىسلام دۆلىتى ISIS تەشكىلاتى، ئىراقنىڭ ئەنبار ئۆلكىسىنڭ مەركىزى رامادىنى قورشاۋغا ئېلىپ، رايۇننىڭ مەركىزىگە ھۇجۇم قىلدى، مەركىزى ھۆكۈمەت بىناسى ئەتراپىدىكى بىر قانچە رايۇن ۋە بىنانى كونترول قىلىۋالدى.
ئەنبار ۋىلايىتى تېرورغا قارشى كۈرەش ئەترىتى باش قۇماندان ياردەمچىسى ئابدۇلئەمىر ھازراجى، ISIS نىڭ شەھەر مەركىزىگە ھۇجۇم قىلغانلىقىنى، ئارمىيە ۋە ئارمىيەگە ياردەم بەرگەن شىئە قۇراللىقلىرى «ئەل ھاشىد ئەل شابى» گۇرۇپپىسى بىلەن قاتتىق تۇقۇنۇشقانلىقىنى ئېيتتى. بىخەتەرلىك خادىملىرى ئەلجەزىرە مۇخبرىغا سۆز قىلىپ، رايۇندىكى تۇقۇنۇشلاردا 9 كىشىنىڭ ئۆلگەنلىكىنى، 40 كىشىنىڭ يارىلانغانلىقىنى بىلدۈردى.
ھازراجى، ئامېرىكا رەھبەرلىكىدىكى بىرلەشمە ئىتتىپاق قىسىملىرىنىڭ رامادىنىڭ ئىچىدە بىر قانچە نوقتىلاردا ISIS نىڭ نىشانلىرىغا ھاۋادىن زەربە بەرگەنلىكىنى ئېيتتى. ئىراق ئارمىيسىنىڭ ئېيتىشىچە، بىرلەشمە ئىتتىپاق ئايرۇپىلانلىرى تەرىپىدىن رامادىنىڭ ئەبۇ غانىم، ئەبۇ سۇدە، ئەبۇ ماھال ۋە ئەبۇ فەرراج رايۇنلىرىدا ISIS قۇراللىقلىرى يۇشۇرۇنغان ئورۇنلارغا ھاۋادىن قاتتىق زەربە بېرىلگەن. ۋە بۇ ھۇجۇملاردا 43 نەپەر ISIS قۇراللىقى ئۆلتۈرۈلگەن.
ئەلجەزىرە مۇخبىرى ناسىر شەدىد، ISIS تەشىلاتنىڭ رامادى مەركىزى ئەتراپىنى قورشاپ بېسىپ كىرگەنلىكىنى ئېيتتى، بۇنىڭدىن بۇرۇن ISIS تەشكىلاتى بىرلەشمە ئىتتىپاقنىڭ ھاۋا ھۇجۇملىرىدىن كېيىن رايۇندىكى كېڭىيىشى توختىغان ئىدى.
ئىراق باش مىنىستىرى ھەيدەر ئىبادى، 2015-يىلى 15-ئاپرېل چارشەنبە كۈنى ئەنباردىكى ھاببانىيە ھەربىي بازىسىنى زىيارەت قىلىپ، تىكرىتنىڭ ISIS نىڭ قولىدىن قايتۇرۇلغىنىدىن كېيىنكى ئىككىنجى نىشاننىڭ ئەنبار ئىكەنلىكىنى ئېيتقان ئىدى.
ISIS تەشكىلاتى 2014-يىلى 10-ئىيۇندىن باشلاپ ئىراقنىڭ ئىككىنجى چوڭ شەھىرى مۇسۇلنى كونترول قىلىۋالغان ئىدى، ئۇنىڭدىن كېيىن ئىراقتىكى بىر قانچە مۇھىم رايۇنلارنى ئىگىلىۋېلىپ كېڭىيشنى داۋاملاشتۇرغان ئىدى. ISIS سۇرىيەدە كەڭرى زېمىنغا ئىگە بولغاندىن كېيىن «خەلىپىلىك» ئېلان قىلىپ «ئىسلام دۆلىتى» قۇرغانلىقىنى جاكارلاپ «ئىسلام دۆلىتى» گە «ھىجرەت» قىلىشقا چاقىرىق قىلغان ئىدى.
ئامېرىكا باشچىلىقىدىكى 60 دۆلەتتىن تەشكىللەنگەن بىرلەشمە ئىتتىپاق  سىنتەبىردىن باشلاپ سۇرىيە ۋە ئىراقتىكى ISIS  نوقتىلىرىغا ھاۋادىن زەربە بەرگەن. ئامېرىكا دۆلەت مۇداپىئە مىنىستىرلىكى  باياناتچىسى سىتېۋ ۋارىن، ئاۋغۇست ئ‍ېيىدىن بۇيان بىرلەشمە ئىتتىپاق قىسىملىرىنىڭ ئىراق ۋە سۇرىيەدە ISIS كە تەۋە 3 مىڭ 222 نوقتىغا زەربە بەرگەنلىكىنى ئ‍اشكارىلىدى، بۇ نىشانلار ئارىسىدا 58 تانكا، 184 ھەربىي ماشىنا، 637 ھەربىي ئورۇن ۋە 980 بازا ياكى بىنا بار.