چاۋشيەننىڭ ۋودىرود بومبىسى سىناق قىلغانلىقىنى ئېلان قىلىشى پۈتكۈل خەلقئارا جەمئىيەتنىڭ بىردەك ئەيىبلىشىگە ئۇچرىدى. ئامېرىكا دۆلەت ئىشلىرى كاتىپى كېررى 7-يانۋار مۇنۇلارنى بىلدۈرۈپ: جۇڭگونىڭ چاۋشيەنگە قاراتقان سىياسىتى ئاللىقاچان مەغلۇپ بولدى، ھازىر چاۋشيەن بىلەن ئالاقە قىلىشتا بۇرۇنقىدەك كونا ئۇسۇللارنى قوللانغان بىلەن ئاقمايدۇ، دېگەن.   كېررى شۇ كۈنى ئۇنىڭ چاۋشيەننىڭ تۆتىنچى قېتىملىق يادرو سىنىقى ئېلىپ بارغانلىق توغرىسىدا جۇڭگو دىپلوماتىيە مىنىستىرى ۋاڭيى بىلەن تېلېفوندا سۆزلەشكەنلىكىنى ئېيتتى.

   كېررى مۇخبىرلارغا مۇنداق دېدى: جۇڭگو ئىلگىرى چاۋشيەن يادرو مەسىلىسىگە قارتا بىز ئىككى تەرەپ ئورتاق رازى بولغان ئالاھىدە ئۇسۇلنى قوللانغان ئىدى، بىز ئۇلارنىڭ پىكىرىگە ھۆرمەت قىلىپ، ئۇلارنىڭ چاۋشيەن يادرو مەسىلىسىنى ھەل قىلىشىغا يېتەرلىك ۋاقىت بەرگەن ئىدۇق. بۈگۈن جۇڭگو تەرەپ بىلەن سۆزلەشكەن ۋاقتىمدا مەن ئېنىق قىلىپ ئۇلارنىڭ بۇ ئۇسۇلىنىڭ ئاقمايدىغانلىقىنى دەپ قويدۇم، بىز چاۋشيەن بىلەن ئالاقە قىلىشتا يەنە بۇرۇنقىدەك كونا ئۇسۇلنى قوللانساق بولمايدۇ.

   جۇڭگو ھۆكۈمىتىنىڭ ئۇچۇرىغا قارىغاندا، دىپلوماتىيە مىنىستىرلىكى ۋاڭيى 7-يانۋار كەچتە ئامېرىكا دۆلەت  ئىشلىرى كاتىپى كېررى بىلەن تېلېفوندا سۆزلەشكەن. ئىككى تەرەپ جۇڭگو ئامېرىكا مۇناسىۋىتى، چاۋشيەن يېرىم ئارىلىنىڭ ۋەزىيىتى ۋە ھەمدە ئىران يادرو مەسىلىسى قاتارلىق مەسىلىلەردە ئۆز ئارا پىكىر ئالماشتۇرغان.

  كېررى ئامېرىكا تەرەپنىڭ چاۋشيەن يادرو مەسىلىسىگە قارتا مەيدانىنى ئېنىق قىلىپ چۈشەندۈرگەن، ھەمدە يەنە نۆۋەتتىكى ۋەزىيەتتە جۇڭگو تەرەپ بىلەن زىچ ئالاقە باغلاپ تۇرىدىغانلىقىنى ئېيتقان.

   ۋاڭيى تەكىتلەپ مۇنداق دېدى: جۇڭگو  تەرەپ چاۋشيەن يېرىم ئارىلىنىڭ يادروسىزلىشىش نىشانى ئۈچۈن پۈتۈن كۈچى بىلەن تىرىشىدۇ، ھەمدە يېرىم ئارالنىڭ تىنچ مۇقىم بولۇشىدا چىڭ تۇرىدۇ. جۇڭگو تەرەپ ئامېرىكا تەرەپنى ئۆز ئىچىگە ئالغان بارلىق تەرەپلەر بىلەن ئۆز-ئارا پىكىر ئالماشتۇرىدۇ.

   جۇڭگو بىلەن چاۋشيەننىڭ مۇناسىۋىتى كۆپ يىللاردىن بويان ئىزچىل يېقىن بولۇپ كەلگەنلىكتىن، خەلقئارا جەمئىيەت ئىزچىل جۇڭگونىڭ چاۋشيەن يادرو كىرىزىسىنى ھەل قىلىشىغا چوڭ ئۈمىد باغلىغان.

     ئەنگلىيە تاراتقۇلىرىنىڭ خەۋىرىدە دېيىلىشچە، سىرتقى ساھەدىكىلەر مۇنداق دەپ قارايدىكەن: جۇڭگونىڭ چاۋشيەنگە تەدبىر قوللىنىشنى كېچىكتۈرۈپ كېلىشى ئاساسلىقى چاۋشيەننىڭ ھاكىمىيىتىنىڭ ئاغدۇرۇلۇپ كېتىپ بۇنىڭدىن پەيدا بولىدىغان مۇساپىرلار كىرىزىسىنىڭ جۇڭگوغا تەسىر كۆرسىتىشى، ھەمدە كورېيەنىڭ چاۋشيەن يېرىم ئارىلىنى بىرلىككە كەلتۈرگەندىن كىيىن ئامېرىكىنىڭ بۇ رايوندا تەسىر دائىرىسىنىڭ تېخىمۇ كۆپىيىپ كېتىشىدىن ئەنسىرەيدۇ.